"އަދަދު" އިން ހެދި ތަހުގީގީ ޑޮކިއުމެންޓަރީ "ޖީ ސްކީލާން" އަށް އިނާމު ލިބުނު މަންޒަރު ޕީއެސްއެމް އިން ލައިވް ކުރުމުން، މީޑިއާ ކައުންސިލުގައި ޕީއެސްއެމް ތަމްސީލު ކުރާ އެ ކައުންސިލުގެ ރައީސް އަހުމަދު މުސްތަފާ ކުންފުނިން ކަނޑާލި މައްސަލަ މާލޭގެ މޭޔަރު އާދަމް އާޒިމް ކުށްވެރި ކުރައްވައިފި އެވެ.
ސޯޝަލް މީޑިއާ ޕްލެޓްފޯމް އެކްސްގައި އާޒިމް ކުރެއްވި ޕޯސްޓެއްގައި ވިދާޅުވީ، މީޑިއާގެ އަޑު ކެނޑުމަށް ނުވަތަ ޕްރޮފެޝަނަލް ނަޒާހާތްތެރިކަމަށް އަދަބު ދިނުމަކީ ޑިމޮކްރަސީއަށް އޮތް ހުރަހެއް ކަމަށެވެ.
"މީޑިއާގެ އަޑު ކެނޑުމަށް ނުވަތަ ފަރުދުންގެ ޕްރޮފެޝަނަލް ނަޒާހަތްތެރި ކަމަށް އަދަބު ދިނުމަކީ މި ޑިމޮކްރެޓިކް ތަނބުތައް ބަލިކަށިކުރާނޭ ކަމެއް. މިނިވަން ނޫސްވެރިކަމާއި ނޫސްވެރިކަމުގެ މިނިވަންކަން ހިމާޔަތްކުރުމަށް އަޅުގަނޑުމެން އެންމެން ހިތްވަރާއެކު ތެދުވަން ޖެހޭ،" އާޒިމް ވިދާޅުވި އެވެ.
އޭގެ އިތުރުން، ޑިމޮކްރަސީ ހިފަހައްޓައި ކުރިއަރުވަން މިނިވަން މީޑިއާއަކަށް ފުރުސަތު ދޭންޖެހޭ ކަމަށް ވެސް އާޒިމް ވިދާޅުވި އެވެ.
"މިނިވަން މީޑިއާއަކީ ޑިމޮކްރަސީގެ ހަތަރުވަނަ ބާރު، މީޑީއާއަކީ ޑިމޮކްރަސީ ހިފަހައްޓައިދޭ އެއް ތަނބު. މި ގައުމުގެ ނޫސްވެރިކަމުގެ މާހައުލު އޮންނަންވާނީ، ހާމަކަން ބޮޑުކޮށް މަސައްކަތް ކުރެވޭ ގޮތަށް، ޖަވާބުދާރީ ކުރުމުގެ ޒިންމާ އުފުލޭ ގޮތަށް، ނޫސްވެރިންނަށް މައުލޫމާތު ލިބޭ ގޮތަށް،" އޭނާ ވިދާޅުވި އެވެ.
ޕީއެސްއެމް އިން ވަކި ކުރިއިރު، މުސްތަފާ ހުންނެވީ ނިއުސް އޮޕަރޭޝަންސް މެނޭޖަރުގެ މަގާމުގަ އެވެ. އިއްޔެ ވަޒީފާއިން ވަކި ކުރިއިރު، ޕީއެސްއެމްގައި އޭނާ 30 އަހަރު ވަނީ ހިދުމަތްކޮށްދީފަ އެވެ.
"ޖީ ސްކީލާން" އަކީ މިހާރުގެ ރައީސް ޑރ. މުހައްމަދު މުއިއްޒުގެ ބައްޕާފުޅު އަވަހާރަވި ފަހުން ބައްޕާފުޅުގެ އަނބިކަނބަލުން މާލެ ވަޑައިގަތުމަށް މަސައްކަތް ކުރުމުން ރާއްޖެ ނާރުވައި ޑީޕޯޓްކޮށްލި މައްސަލައަށް ތައްޔާރުކޮށްފައިވާ ތަހުގީގީ ޑޮކިއުމެންޓަރީއެކެވެ.
