މިލާން (އޮކްޓޫބަރު 31) - އިޓާލިއަން ލީގުގައި ރޭ އެމްޕޮލީ އަތުން 3-0 އިން އިންޓަ މޮޅުވިއިރު، ޔުވެންޓަސް އާއި ޕާމާ 2-2 އިން އެއްވަރުވެ، މޮންޒާ އަތުން 2-0 އިން މޮޅުވި އެޓަލަންޓާ ލީގުގެ ތިން ވަނަ އަށް ޖެހިލައިފި އެވެ.
ލީގުގެ އެއް ވަނައިގައި ނަޕޯލީ އަށް 10 މެޗުން 25 ޕޮއިންޓް ލިބިފައިވާއިރު، ދެ ވަނައިގައި އޮތް އިންޓަ އަށް 10 މެޗުން ވަނީ 21 ޕޮއިންޓް ލިބިފަ އެވެ. އެޓަލަންޓާ އަށް 10 މެޗުން 19 ޕޮއިންޓް ލިބިފައިވާއިރު، ޔުވެންޓަސްގެ އޮތީ 10 މެޗުން 18 ޕޮއިންޓެވެ.
އެމްޕޮލީ ދަނޑުގައި ކުޅުނު މެޗުގައި އިންޓަގެ ލަނޑުތައް ޖެހީ ޑަނިއޭލޭ ފްރަޓޭސީ ދެ ގޯލާއި ލައުޓާރޯ މާޓީނޭޒް އެވެ. މި މެޗުގައި، އެމްޕޮލީގެ ސަބާ ގޮގްލިއަޑިޝޭ އަށް ފުރަތަމަ ހާފުގައި ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ރަތް ކާޑެއް ދެއްކި އެވެ.
ޔުވެންޓަސް ދަނޑުގައި ކުޅުނު މެޗުގައި ޕާމާގެ ޑިފެންޑަރު، އެންރީކޯ ޑެލް ޕްރާޓޯ އެ ޓީމަށް ލީޑުނަގައިދީފައިވަނިކޮށް، ވެސްޓަން މެކްކެނީ ޔުވެންޓަސް އަށް އެއްވަރުކޮށްދިނެވެ. ޕާމާ އިން ފުރަތަަމަ ހާފު ނިންމާލީ ދެ ވަނަ ފަހަރަށް ލީޑުނަގައިގެންނެވެ. އެ ގޮތުން އެ ޓީމުގެ ލަނޑު ޖެހީ، ސިމޯން ސޯމް އެވެ. ދެ ވަނަ ހާފް ފަށައިގެން ޔުވެންޓަސް އަށް އެއްވަރުކޮށްދިނީ ޓިމޮތީ ވެއާ އެވެ.
މޮންޒާ ކޮޅަށް އެޓަލަންޓާ އިން ލަނޑުތައް ޖެހީ ބަދަލަކަށް ކުޅެން އެރި ލަޒާ ސަމަރްޑްޒިޗް އާއި ޑަވިޑޭ ޒަޕަކޯސްޓާ އެވެ.
