އަނިޔާވެރިކަމާއި ބިރުވެރިކަމުގެ ތެރޭގައި ފުރާނަ އަތް މައްޗަށް ލައިގެން ރައްޔިތުން ވި ގުރުބާނީން ހޯދި ގާނޫނުއަސާސީގައި އެކަށައަޅާފައިވާ ހެޔޮވެރިކަމާއި ހިންގުމުގެ ނިޒާމާއި، މިނިވަންކަމާއި ހައްގުތައް ނިގުޅައި ގަތުމަށް ރައީސް ޑރ. މުހއްމަދު މުއިއްޒު މިހާރު އެ ކުރައްވާ ހުތުމުހުތާރު މަސައްކަތްތަކުން، ޒަމާންތަކަކަށް މި ރާއްޖެ ހަލާކުގެ ތެރެއަށް ވެއްޓިގެންދާނެ ކަމަށް ދަ ޑިމޮކްރެޓްސްގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
އިލެކްޝަންސް ކޮމިޝަން އާއި އޭސީސީގެ ރައީސް އާއި ނައިބު ރައީސް ސީދާ ރައީސުލްޖުމްހޫރިއްޔާ އައްޔަން ކުރާ ގޮތަށް ގާނޫނަށް ގެންނަ ބަދަލާ ގުޅޭ ގޮތުން، ކުރިން ރައީސް އޮފީހުގެ މިނިސްޓަރުކަމާއި، 18 ވަނަ ރައްޔިތުންގެ މަޖިލީހުގެ މެންބަރުކަން ކުރެއްވި ޝިފާޒު "އަދަދު" ނޫހަށް ވިދާޅުވީ ބާރުތައް މުށުތެރެއަށް ލެއްވުމަށް ރައީސުލްޖުމްހޫރިއްޔާ މަސައްކަތް ކުރެއްވިޔަސް، އެކަމަށް ދައުލަތުގެ ބަންޑާރަ ނައިބު ރުހުން ނުދޭނަމަ ނުވާނެ ކަމަށެވެ.
"ބަންޑާރަ ނައިބުގެ ޒިންމާ ވަރަށް ބޮޑު މިހާރު މިއޮތް ނިޒާމު މިއޮތް ގޮތަށް ބޭއްވުމަށް، ހަރުދަނާ ކުރުމަށް. އޭގެ ބަދަލުގައި ސަރުކާރަކަށް ފަހަތަށް ފިޔަވަޅު އެޅުމަށް ގާނޫނުތައް ބަދަލުކުރުމަށް، އެ މަފުހޫމުތައް އޮޅައިލުމަށް ސަރުކާރަށް ބާރުވެރިވާ ބޭފުޅަކަށް ބަންޑާާރަ ނައިބު ވީމަ ނޫނީ މި ކަމެއް ނުކުރެވޭނެ،" ޝިފާޒު ވިދާޅުވި އެވެ.
"އެހެންވީމަ މި ނިޒާމު ހަލާކުކޮށްލުމަށް އެންމެ ބޮޑު ޒިންމާއެއް އެންމެ ބޮޑު ބާރެއް ސަރުކާރަށް ދެއްވާ ފަރާތަކަށް ވާނީ ބަންޑާރަ ނައިބު. އެޓާނީ ޖެނެރަލް އާއި ރައީސުލްޖުމްހޫރިއްޔާ ނުގުޅިއެއް މިކަމެއް ނުވާނެ."
ނިމިގެން ދިޔަ ރައްޔިތުންގެ މަޖިލީހުގެ ވިލިމާލޭ ދާއިރާގެ މެންބަރެއްގެ ގޮތުގައި ވެސް ހުންނެވި އުޝާމު މަޖިލީހުގައި ފެނިގެން ދިޔައީ ތަންދޮރު ދަންނަ، ނަޒާހަތްތެރި، އަދި ގާނޫނީ ބޭފުޅެއްގެ ގޮތުގައި ކަމަށާއި ނިމިގެން ދިޔަ ރިޔާސީ އިންތިހާބުގެ ދެ ވަނަ ބުރުގައި ވެސް އޭނާ ހުންނެވީ މުއިއްޒު ވެރިކަމަށް ވަޑައިގެންފާނެތީ ކަންބޮޑުވެފައި ކަމަށް ޝިފާޒު ފާހަގަ ކުރެއްވި އެވެ.
"އޭރުވެސް އެގޮތަށް ހުރެފައި މަގާމު ލިބުނީމަ މި އެނގުނީ އެއީ ވެސް މަގާމު ލިބުނީމަ ދުލި ބަދަލުކުރައްވައި، ދެ ދުލުން ވާހަކަ ދައްކަވާ ބޭފުޅެއް ކަން،" އޭނާ ވިދާޅުވި އެވެ.
އިލެކްޝަންސް ކޮމިޝަނާއި އޭސީސީގެ ރައީސް އާއި ނައިބު ރައީސް ސީދާ ރައީސުލްޖުމްހޫރިއްޔާ ހިޔާރު ކުރާ ގޮތަށް ބަދަލުކުރާތީ ފާޑުކިޔުން އަމާޒުވުން ރައީސް މުއިއްޒު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ އެއްވެސް މުއައްސަސާއަކަށް ނުފޫޒު ނުފޯރުވާނެ ކަމަށެވެ.
ރައީސްގެ އެ ޕޯސްޓުގައިވާ ވާހަކަތައް ދެކޮޅު ނުޖެހޭ ކަމަށާއި ރަނގަޅު ނިޔަތުގައި ކަންކަން ގެންދާން ބޭނުންނަމަ މިހާރު އޮތް ނިޒާމު ހަރާބުނުކޮށް ބާއްވާނެ ކަމަށް ޝިފާޒު ވިދާޅުވި އެވެ.
މިހާރު މިނިވަން ކޮމިޝަންތަކަށް މެންބަރުން އައްޔަން ކުރަނީ މަޖިލީހުގެ ތެރެއިންނެވެ. އަދި ކޮމިޝަންތަަކުގެ ރައީސް އާއި ނައިބު ރައީސް އައްޔަން ކުރަނީ، އެ ކޮމިޝަންތަކުގެ މެންބަރުންގެ ތެރެއިން އެ ބޭފުޅުން އަމިއްލަ އަށެވެ.
މަޖިލީހުގައި ޕީއެންސީގެ ސުޕަ މެޖޯރިޓީ އޮތުން، މިހާރު އޮތް ނިޒާމު ބަދަލު ނުކޮށް ވެސް ރައީސް ބޭނުންވާ ބަޔަކު ކޮމިޝަންތަކަށް އައްޔަން ކުރެވޭނެ ކަމަށާއި ނަމަވެސް އެ މަގު ހިޔާރުނުކޮށް ސީދާ ބާރު މުށުތެރެއަށް ލުމަކީ ހުދުމުހުރާތުވުމަށް ދައްކަވާ މަންޒަރެއް ކަމަށް ވެސް ޝިފާޒު ފާހަގަ ކުރެއްވި އެވެ.
މިކަންކަން ނުހުއްޓުވައިފި ނަމަ ކުރިއަށް އޮތް ތަނުގައި ހާލަތު ގޯސްވެގެން ދާނެ ކަމަށް ވެސް އޭނާ ވިދާޅުވި އެވެ.
އޭސީސީ އާއި އީސީގެ ރައީސް އާއި ނައިބު ރައީސް ސީދާ ރައީސުލްޖުމްހޫރިއްޔާ އައްޔަން ކުރާ ގޮތަށް ގާނޫނު ބަދަލުކުރާތީ އެކަމާ ދެކޮޅަށް މިއަދު ހެނދުނު އެމްޑީޕީން މުޒާހަރާ އަށް ނުކުމެވެ.
