މި އަހަރަށް ފާސްކުރި ބަޖެޓުން ހަރަދުތައް ހަމަނުޖެހޭނެތީ ބަޖެޓު ސަޕްލިމެންޓުގެ ގޮތުގައި ފަސް ބިލިއަނަށް ވުރެ ގިނަ ރުފިޔާ ހޯދަން ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހެޅި ސަޕްލިމެންޓަރީ ބަޖެޓަށް އެއްވެސް ބަދަލެއް ނުގެނެސް ފާސްކޮށްފި އެވެ.
މި ބަޖެޓު ދިރާސާކުރުމަށް އެކުލަވާލި ކޮމިޓީން ބައްދަލުވުންތަކެއް ބާއްވާ ފިނޭންސް މިނިސްޓަރު މޫސާ ޒަމީރު އަދި މަރުކަޒީ ބޭންކު އެމްއެމްއޭގެ ގަވަރުނަރު އަހުމަދު މުނައްވަރުވެސް ހާޒިރުކުރި އެވެ. ނަމަވެސް އެ ބައްދަލުވުމަށް މި އަހަރަށް ފާސްކުރި ބަޖެޓުން ހަރަދުކުރި ގޮތުގެ ތަފުސީލު ހާމަކުރުމާ ދެކޮޅަށް ކޮމިޓީން އޮތީ ފާސްކޮށްފަ އެވެ.
މަޖިލީސް އަދި ކޮމިޓީގައި އޮތް ސަރުކާރުގެ ފުރިހަމަ މެޖޯރިޓީއާއެކު މި އަހަރުގެ ބާކީ ބަޔަށް ހުށަހެޅި ފަސް ބިލިއަން ރުފިޔާގެ ބަޖެޓަށް ކޮމިޓީ މަރުހަލާގައި އެއްވެސް ބަދަލެއް ނުގެނެ އެވެ. ވޯޓުގައި ބައިވެރިވި 86 މެންބަރުންގެ ތެރެއިން ބަޖެޓު ފާސްކުރުމަށް ވޯޓު ދެއްވީ 75 މެންބަރުންނެވެ. ބަޖެޓު ފާސްކުރުމާ ދެކޮޅަށް ވޯޓު ދެއްވީ އިދިކޮޅު އެމްޑީޕީގެ 11 މެންބަރުންނެވެ.
ސަޕްލިމެންޓަރީ ބަޖެޓުގެ އުސްއަލިތައް
- ޕީއެސްއައިޕީއަށް - ދެ ބިލިއަން ރުފިޔާ
- ސަބްސިޑީއަށް - 1.02 ބިލިއަން ރުފިޔާ
- ސަރުކާރު ކުންފުނިތަކަށް ފައިސާ ދޫކުރަން - 441.4 ބިލިއަން ރުފިޔާ
- ކޮންޓިންޖެންސީ ބަޖެޓަށް - 650 މިލިއަން ރުފިޔާ
- ސްޓޫޑެންޓު ލޯނު ދޫކުރުމަށް - 458.4 މިލިއަން ރުފިޔާ
- މެޑިކަލް ކޮންސިއުމަބަލްސްއަށް - 200 މިލިއަން ރުފިޔާ
- ބޭސްފަރުވާގެ އެހީއަށް - 262.6 މިލިއަން ރުފިޔާ
- މުސާރަ އާއި އުޖޫރައަށް - 24.4 މިލިއަން ރުފިޔާ
އޭގެ އިތުރުން ޕީއެސްއައިޕީ މަޝްރޫއުތަކަށް ކުދި އަދަދުތަކުން ބަޖެޓު ކުރުމަށް ފަހު ހުއްޓިފައި ހުރި ޕްރޮޖެކްޓުތައް ހިންގުން މި ސަރުކާރަށް ޖައްސާފައިވާ ކަމަށް ވެސް ފިނޭންސުން ބުންޏެވެ. އަދި މިކަން މިގޮތަށް ކުރީ މިދިޔަ އަހަރުގެ ތެރޭގައި މި މަޝްރޫއުތައް ބޮޑެތި އަދަދުތަކުން ކޮންޓްރެކްޓު ކުރުމަށް ފަހު އެޑްވާންސް ޕޭމަންޓުތައް ދޫކުރުމަށް ފަހުގައި ކަމަށް ވެސް އެ މިނިސްޓްރީން ބުނެފައިވެ އެވެ.
ހަމައެހެންމެ ފާއިތުވި އަހަރުގެ ބިލުތަކަށް ފައިސާ ދެއްކުމަށާއި، އަލަށް ފަށާފައިވާ މެގަ މަޝްރުއޫތަކުގެ ދުވެލި އަންދާޒާކުރި މިންވަރަށް ވުރެ ބާރަށް ހިނގާފައިވާތީ އެ މަޝްރޫއުތަކަށް ފައިސާ ދެއްކުމަށް ވެސް ބަޖެޓު ސަޕްލިމެންޓު ކުރަން ޖެހޭ ކަމަށް ފިނޭންސުން ބުނެފައިވެ އެވެ. ސަޕްލިމެންޓު ކުރާ ފަސް ބިލިއަންގެ ތެރެއިން ދެ ބިލިއަން ހަރަދު ކުރަނީ ޕީއެސްއައިޕީއަށެވެ.
