ގާޒާއިން ފަލަސްތީނު މީހުންގެ ނަސްލު ނައްތައިލުމަށް ހިންގާ އުދުވާނުގެ އަނިޔާވެރިކަން އިތުރުކޮށް، ގާޒާގެ ރައްޔިތުންނަށް ކާބޯތަކެއްޗާއި ބޭސްފަރުވާ ފޯރުކޮށްދޭ، ޔޫއެން ރިލީފް އެންޑް ވޯކް އެޖެންސީ (އަންރުވާ) ހަރަކާތްތެރިވުން މަނާކުރާ ނިންމައިފި އެވެ.
މިދިޔަ އަހަރުގެ އޮކްޓޯބަރު މަހުން ފެށިގެން އިޒްރޭލުން ގާޒާގެ ރައްޔިތުންނާ ދެކޮޅަށް ހިންގަމުންދާ ޖަރީމާތަކުގައި އެ ޝަހަރުގެ ބޮޑުބައެއް ވީރާނާވެފައި ވާއިރު، ހާލުގައި ޖެހި މަގުމަތިވެފައިވާ އާއިލާތަކަށް ކާބޯތަކެއްޗާއި ބޭސްފަރުވާ ފޯރުކޮށްދޭން މަސައްކަތް ކުރާ މަދު އެެޖެންސީތަކުގެ ތެރޭގައި އަންރުވާ ހިމެނެ އެވެ. ފަލަސްތީނު މީހުންނަށް އެހީވާން އެކި ގައުމުތަކުން ހަދިޔާކުރާ ތަކެތީގެ ބޮޑު ބަޔަކާ ހަވާލުވަނީ ވެސް އެ އެޖެންސީންނެވެ.
ރޮއިޓާސް ބުނި ގޮތުގައި އިޒްރޭލުގައި އަންރުވާ ހަރަކާތްތެރިވުން މަނާކުރަން އިޒްރޭލު ޕާލަމެންޓުން އިއްޔެ "ގާނޫނެއް" ފާސްކުރީ މިދިޔަ އަހަރުގެ އޮކްޓޯބަރުގައި ހަމާސް އިން ދިން ހަމަލާގައި އަންރުވާގެ ހަރަކާތްތެރިން ބައިވެރިވި ކަމަށް ތުހުމަތުކޮށްފަ އެެވެ.
އެގޮތަށް ނިންމައި އެކަން ތަންފީޒުކޮށްފި ނަމަ ގާޒާގައި މިހާރު ވެސް ވަރަށް ހާލުގައި ތިބި ފަލަސްތީނު މީހުންގެ ހާލަތު ވަރަށް ގޯސްވާނެ ކަމަށް އިޒްރޭލަށް މަދަދުވެރިވާ ހުޅަނގު ގައުމުތަކުން ވެސް ދެކޭ ކަމަށް ރޮއިޓާސްގެ ރިޕޯޓްގައި ބުންޏެވެ.
އަންރުވާގެ ކޮމިޝަނާ ޖެނެރަލް ފިލިޕް ލަޒަރިނީ ވިދާޅުވި ގޮތުގައި އިޒްރޭލު ޕާލަމެންޓްގެ އެ ނިންމުމަކީ ޔޫއެންގެ ޗާޓަރާ ހިލާފު ނިންމުމެކެވެ. އެއީ ވަރަށް ނުރައްކާތެރި ނިންމުންތަކެއްގެ ފެށުން ކަމަށް ވެސް އޭނާ ސިފަކުރެއްވި އެވެ.
އަންރުވާ މަނާކުރުމަކީ ބައިނަލް އަގުވާމީ ގާނޫނުތަކާ ހިލާފަށް އިޒްރޭލުން ހިންގާ އެތައް ޖަރީމާއެއްގެ ތެރެއިން އެންމެ ކަމެކެވެ. ހަމާސް އާ ދެކޮޅަށް ކަމަށް ބުނެ މުޅި ގާޒާ ފަނާކޮށް، އާއްމުންގެ 40،000 އަށް ވުރެ ގިނަ މީހުން މަރައި، ގާޒާގެ ހުރިހާ ހޮސްޕިޓަލެއް ހަލާކުކުރުމަކީ ވެސް ބައިނަލް އަގުވާމީ ހުރިހާ ގާނޫނަކާ ހިލާފަށް ހިންގި ޖަރީމާތަކެވެ.
