އިންޑިއާގެ ފުރަތަމަ މަތިންދާބޯޓު އުފައްދާ ކާރުހާނާ، ޓާޓާ އެއާކްރާފްޓް ކޮމްޕްލެކްސް ގުޖުރާތުގެ ވާޑޯޑަރާ ސިޓީގައި އިއްޔެ ހުޅުވައިފި އެވެ.
އެކަމަށް ބޭއްވި ހާއްސަ ރަސްމިއްޔާތެއްގައި އެ ކާރުހާނާ ހުޅުވައިދެއްވީ އިންޑިއާގެ ބޮޑުވަޒީރު ނަރެންދުރަ މޯދީ އަދި ސްޕެއިންގެ ރައީސް ޕެޑްރޯ ސަންޗޭޒް އެވެ.
އެ ކާރުހާނާއިން އުފެއްދުމަށް ހަމަޖެހިފައި ވަނީ ސީ-295 ގެ އަސްކަރީ މަތިންދާބޯޓެވެ.
ސްޕެއިންގެ އެއާބަސް އާއި އިންޑިއާގެ ޓާގާ ކުންފުނި ހަދާފައިވާ އެއްބަސްވުމުގެ ދަށުން އެ ކާރުހާނާގައި ފުރަތަމަ އުފައްދާނީ 40 މަތިންދާ ބޯޓެވެ.
އެ ރަސްމިއްޔާތުގައި ވާހަކަ ދައްކަވަމުން މޯދީ ވިދާޅުވީ މުސްތަގުބަލުގައި ކާރުހާނާގައި އުފައްދާފައިވާ މަތިންދާބޯޓުތައް އެހެން ގައުމުތަކަށް އެކްސްޕޯޓު ކުރާނެ ކަމަށެވެ.
އެ ކާރުހާނާއިން މަތިންދާބޯޓު އުފެއްދުމަށްފަހު، އެ ބޯޓަށް ދޭނެ އިތުރު ހިދުމަތްތަކުގެ ފެސިލިޓީ ވެސް ވަނީ ގާއިމު ކޮށްފަ އެވެ. އެގޮތުން ބޯޓުގެ މެއިންޓަނަންސް ވެސް އެތަނުން ކުރެވެ އެވެ.
ސީ-295 ގެ އަސްކަރީ މަތިންދާބޯޓުން ކާގޯ ފޮނުވުމާއި، ޓެކްޓިކަލް ޓްރާންސްޕޯޓަށާއި، ސަވައިލަންސް، މެޑިކަލް އިވެކުއޭޝަން އަދި ހިއުމެނިޓޭރިއަން އެއިޑްގެ ބޭނުމަށް ބޭނުން ކުރެވެ އެވެ.
