ލަންޑަން (އޮކްޓޫބަރު 28) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑް 2-1 އިން ވެސްޓް ހޭމް ޔުނައިޓެޑް އަތުން ބަލިވިއިރު، ޗެލްސީން 2-1 އިން ނިއުކާސަލް ޔުނައިޓެޑް އަތުން މޮޅުވެ، އާސެނަލާއި ލިވަޕޫލް 2-2 އިން އެއްވަރުވެއްޖެ އެވެ.
ޔުނައިޓެޑް ކޮޅަށް ވެސްޓް ހޭމްގެ ކްރައިސެންސިއޯ ސަމާވިލް ގޯލު ޖެހިތާ މާގިނައިރެއްނުވެ، ކަސެމީރޯ ވަނީ ޔުނައިޓެޑަށް އެއްވަރުކޮށްދީފަ އެވެ.
އެކަމަކު، ޔުނައިޓެޑްގެ ޑިފެންޑަރު، މަތައިސް ޑި ލިޓް އޭރިއާތެރެއިން ވެސްޓް ހޭމްގެ ޑެނީ އިންގްސް އަށް ފައުލުކުރި ކަމަށް ބަލައި، ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން ދަނޑުގައި ހުރި މޮނީޓަރުން ވެސް ކަށަވަރުކުރުމަށް ފަަހު ދިން ޕެނަލްޓީ ޖެރަަޑް ބޮވެން ވަނީ ކާމިޔާބުކޮށް ޖެހިޖެހިގެން ތިން ވަނަ ސީޒަނުގައި ވެސްޓް ހޭމް އަށް އަމިއްލަ ދަނޑުގައި ޔުނައިޓެޑް އަތުން މޮޅެއް ހޯދައިދީފަ އެވެ.
ޗެލްސީން ރޭގެ މެޗު ކާމިޔާބުކުރިއިރު، ލަނޑުތައް ޖެހީ ނިކޮލަސް ޖެކްސަން އާއި ކޯލް ޕާމާ އެވެ. ނިއުކާސަލްގެ ހަމައެކަނި ލަނޑު ޖެހީ އަލެކްސަންޑަ އިސާކް އެެވެ.
ލިވަޕޫލް ކޮޅަށް އާސެނަލްގެ ފުރަތަމަ ލަނޑު ޖެހީ ބުކާޔޯ ސަކާ އެވެ. ލިވަޕޫލުން އެއްވަރުކުރީ ވާޖިލް ވެން ޑައިކް ޖެހި ގޯލުންނެވެ. މިކޭލް މެރީނޯ ވަނީ އާސެނަލަށް ޖަހައިދިން ފުރަތަަ ލަނޑާ އެކު ފުރަތަމަ ހާފު ނިމުމުގެ ކުރިން އަލުން އެ ޓީމަށް ކުރިހޯދައިދީފަ އެެވެ. އެކަމަކު، މެޗު ނިމެން 10 މިނިޓަށް ވެފައި ވަނިކޮށް މުހައްމަދު ސަލާހު ވަނީ ލަނޑު ޖަހައި، ލިވަޕޫލަށް އެއްވަރުކޮށްދީފަ އެވެ.
ކްރިސްޓަލް ޕެލަސް އިން ވަނީ އަމިއްލަ ދަނޑުގައި ރޭ ކުޅުނު މެޗުން 1-0 އިން ޓޮޓެންހަމް ހޮޓްސްޕާސް ބަލިކޮށްފަ އެވެ.
ލީގުގެ އެއް ވަނައިގައި ސިޓީ އޮތީ ނުވަ މެޗުން 23 ޕޮއިންޓާ އެކު އެވެ. ދެ ވަނައިގައި އޮތް ލިވަޕޫލަށް ނުވަ މެޗުން 22 ޕޮއިންޓް ލިބިފައިވާއިރު، ތިން ވަނައިގައި އޮތް އާސެނަލަށް ވަނީ ނުވަ މެޗުން 18 ޕޮއިންޓް ލިބިފަ އެވެ. ހަތަރެއްގައި އޮތް އެސްޓަން ވިލާ އަށް ވެސް ނުވަ މެޗުން 18 ޕޮއިންޓް ލިބިފައިވާއިރު، ފަސް ވަނައިގައި އޮތް ޗެލްސީ އަށް ނުވަ މެޗުން ވަނީ 17 ޕޮއިންޓް ލިބިފަ އެވެ.
ނުވަ މެޗުން 13 ޕޮއިންޓާ އެކު ޓޮޓެންހަމް އޮތީ ލީގުގެ އަށް ވަނައިގަ އެވެ. އަދި ޔުނައިޓެޑަށް ނުވަ މެޗުން ލިބުނު 11 ޕޮއިންޓާ އެކު އޮތީ ލީގުގެ 14 ވަނައިގަ އެވެ.
