ފަލަސްތީނުގެ ރައްޔިތުންނަށް އެހީވުމަށް ދައުލަތުގެ މީޑިއާ ޕީއެސްއެމްއިން ބޭއްވި ޓެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) އާ ހަވާލުކުރި ލިޔުން ދޭން ދެކޮޅު ހެދުމުން ކުރިމަތިވި ފާޑުކިޔުންތަކުގެ ސަބަބުން، އެން ފަހުން އެ ލިޔުންތައް ރޭ އާންމުކޮށްފި އެވެ.
މި ލިޔުންތައް ހޯދުމަށް މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫހުން ހުށަހެޅުމުން މިހާތަނަށް ފޮރިން މިނިސްޓްރީން ޖަވާބެއް ނުދެ އެވެ. އެ މައްސަލަ ބަލައި އިންފޮމޭޝަން ކޮމިޝަނުގެ އޮފީހުން އޮކްޓޯބަރު 17، ގައި ނިންމީ ފަސް ދުވަހުގެ ތެރޭ އެ ލިޔުންތައް ދިނުމަށެވެ. ނަމަވެސް އެ އެންގުމަށް ސަރުކާރުން އަމަލެއް ނުކުރެ އެވެ.
އެ މުއްދަތު ހަމަވެ، ވުޒާރާގެ ޖަވާބެއް ނުލިބުމުން މި ނޫހުން ވާނީ އެ ލިޔުންތައް ދޭން ފޮރިން މިނިސްޓްރީން ދެކޮޅު ހެދި ހަބަރު ގެނެސްދީފަ އެވެ. އެ ހަބަރާއެކު އާންމުންގެ ފާޑުކިޔުން އަމާޒުވުމާއެކު އެ ވުޒާރާއިން އެ ލިޔުންތަކާއެކު ބަޔާނެއް ނެރުނީ ރޭ ދަންވަރު އެވެ.
އެ ބަޔާނާއެކު، ޓެލެތޯނުން ލިބުނު 19 މިލިއަން ރުފިޔާ، މަރުކަޒީ ބޭންކު އެމްއެމްއޭ އިން ފޮނުވިކަމުގެ ލިޔުމާއި، އެ ފައިސާ ޖަމާކުރި އެމެރިކާގެ ބޭންކުން ދީފައިވާ ލިޔުން ވެސް އާންމުކޮށްފައިވެ އެވެ.
އެ ފައިސާ އަންރުވާއިން ހަރަދުކުރާނެ ޕްރޮގްރާމުތައް ކަނޑައެޅުމަށް އެ ފަރާތާއެކު ދިވެހި ސަރުކާރުން މަޝްވަރާކުރަމުންދާކަމަށް ވެސް ބަޔާނުގައި ބުނެފައިވެ އެވެ.
ނަމަވެސް، މި މައުލޫމާތު ހޯދުމަށް ހުށަހެޅި އާރުޓީއައި އަށް ޖަވާބެއް ނުދީ، އައިކޮމްގެ ނިންމުމާ ވުޒާރާއިން ހިލާފުވި ސަބަބެއް ނެރުނު ބަޔާނުގައި ނުބުނެ އެވެ.
ސަރުކާރުން އިސް ނަގައިގެން މިފަދަ ޓެލެތޯނެއް ބާއްވައި ފަލަސްތީނުގެ ރައްޔިތުންނަށް އެހީވުމަށް ނިންމީ އިޒްރޭލުން ގާޒާގައި ހިންގަމުންދާ ނަސްލުހޭދުކުރުމުގެ ސަބަބުން ކުރިމަތިވެފައިވާ އިންސާނީ ކާރިސާއާ ގުޅިގެންނެވެ.
އެ ޓެލެތޯނުގައި ހުޅުވި ފަންޑަށް ރައީސް މުއިއްޒުގެ ދެ ކަނބަލުންގެ އިތުރުން ވަޒީރުންނާއި މަޖިލިސް މެންބަރުން އަދި ސަރުކާރުގެ ކުންފުނިތަކުންވެސް ފައިސާ ހަދިޔާކުރި އެވެ.
