އުޒްބެކިސްތާންގައި ކުރިއަށްދިޔަ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ޗެމްޕިއަންޝިޕްގައި، އެންމެ ރަނގަޅު ކުޅުމެއް ދެއްކި އިންޑިވިޖުއަލް ކުޅުންތެރިޔާގެ ޓްރޮފީ، ރާއްޖޭގެ ގައުމީ ޓީމުގެ ކެޕްޓަން، އިސްމާއިލް ސާޖިދު (ކުޑަކާއްޓެ) ހޯދައިފި އެވެ.
ހަ ގައުމު ވާދަކުރި މި މުބާރާތުން ރާއްޖޭން ފަސް ވަނަ ހޯދިއިރު، މޮޅުވީ ކުޅުނު ހަ މެޗުގެ ތެރެއިން ދެ މެޗުންނެވެ. އެއީ، ލީގު ބުރުގެ ފަހު މެޗުން ތަޖިކިސްތާން އަަތުންނާއި ރޭންކިން މެޗުގައި ތަޖިކިސްތާން އަތުންނެވެ.
ރާއްޖޭން މުބާރާތުގައި ކުޅުނު ހުރިހާ މެޗެއްގައި ވެސް ކުޑަކާއްޓެ ވަނީ އިންޑިވިޖުއަލީ މޮޅު ކުޅުމެއް ދައްކައިފަ އެވެ. އިންޑިވިޖުއަލް ކުޅުންތެރިންގެ ރޭންކިން، (ސްޕައިކް، ބްލޮކް އަދި ސާވް) އަށް ބަލާއިރު، ކުޑަކާއްޓެ އުޅެނީ އެންމެ ކުރީގަ އެވެ. އެ ގޮތުން، ކުޑަކާއްޓެ އަށް ވަނީ، ސްޕައިކަށް 99 ޕޮއިންޓް، ބްލޮކް އަށް ނުވަ ޕޮއިންޓް އަދި ސާވް އަށް ލިބުނު ދެ ޕޮއިންޓާ އެކު، ޖުމްލަ އެކު، 110 ޕޮއިންޓް ލިބިފަ އެވެ. ދެ ވަނައިގައި އޮތް، ތުރުކުމެނިސްތާންގެ ވެއިސޯވް ބޭރަމްގެލްޑީ އަށް ލިބުނީ، 95 ޕޮއިންޓެވެ.
ރޭންކިންގައި ދެން އެންމެ ރަނގަޅު ދިވެހި ކުޅުންތެރިއަކީ ހުސެއިން ޝަމާއިލް އެވެ. އޭނާ ވަނީ، 69 ޕޮއިންޓް ހޯދައިފަ އެވެ. ނުވަ ވަނައިގައި އޮތް ޝަމާއިލް ވަނީ 62 ޕޮއިންޓް ހޯދައި، ހަތަރު ބްލޮކް އަދި ތިން ސާވިސް ކާމިޔާބުކޮށްފަ އެވެ.
މުބާރާތުގެ ޗެމްޕިއަންކަން، ކިރްގިސްތާނުން ހޯދީ ފައިނަލުގައި އުޒްބެކިސްތާން އަތުން 3-0 އިން މޮޅުވެގެންނެވެ. ތިން ވަނަ އަށް ދޭ ލޯ މެޑަލް ހޯދީ، އަފްގާނިސްތާން އަތުން 3-0 އިން މޮޅުވި، ތުރުކުމެނިސްތާން އެވެ.
