މި އަހަރުގެ ބާކީ އޮތް ބަޔަށް ދާނެ ހަރަދުތައް ލަފާކޮށް އިއްޔެ މަޖިލީހަށް ހުށަހެޅި ސަޕްލިމެންޓަރީ ބަޖެޓުގެ ބޮޑު ބައެއް ސަރުކާރު ހިއްސާވާ ކުންފުނިތަކަށް ހަރަދުކުރަން ނިންމާފައިވާކަން ބަޖެޓު ތަފުސީލުތަކުން ދައްކައިފި އެވެ.
މަޖިލީހަށް ބަޖެޓު ހުށަހަޅުއްވަމުން ފިނޭންސް މިނިސްޓަރު މޫސާ ޒަމީރު އިއްޔެ ވަނީ ހުށަހަޅާ ޖުމްލަ 5.1 ބިލިއަން ރުފިޔާގެ ބަޖެޓުގެ ބޮޑު ބަޔަކީ ކެޕިޓަލް ކޮންޓްރިބިއުޝަން އަދި ސަބްސިޑީގެ ގޮތުގައި ހިމަނާފައިވާ ހަރަދުތައް ކަމުގައި ވިދާޅުވި އެވެ. މީގެ ތެރެއަށް ސަރުކާރު ކުންފުނިތައް މެދުވެރިކޮށް ހިންގާ ޕީއެސްއައިޕީ މަޝްރޫއުތަކަށް ދޫކުރާ ފައިސާ ހިމެނުމުން ބަޖެޓުގެ ބޮޑު ބަޔެއް ދާނީ މި ކުންފުނިތަކަށެވެ.
ފިނޭންސް މިނިސްޓްރީން އާންމުކޮށްފައިވާ ސަޕްލިމެންޓަރީ ބަޖެޓު ފޮތުން އެނގޭ ގޮތުން ސަބްސިޑީ ދިނުމަށާއި ކެޕިޓަލް ދޫކުރުމަށް ބަޖެޓުގައި ޖުމްލަ 1.46 ބިލިއަން ރުފިޔާ ހިމަނާފައިވެ އެވެ. އެއީ ޖުމްލަ ބަޖެޓުގެ %28 އެވެ.
އޭގެ ތެރެއިން ކެޕިޓަލް ކޮންޓްރިބިއުޝަން އަށް ހިމަނާފައިވަނީ 441.4 މިލިއަން ރުފިޔާ އެވެ. މި އަހަރަށް ފާސްކުރި ބަޖެޓަށްވުރެ ސަރުކާރުގެ ކުންފުނިތަކަށް ކެޕިޓަލް ދޫކުރާ މިންވަރު އިތުރުކުރަން ސަޕްލިމެންޓަރީ ބަޖެޓުގައި މި އަދަދު ހިމެނީ އެ ކުންފުނިތަކުން ގެންދާ މަޝްރޫއުތަކަށާއި ކުންފުނިތަކުގެ ކޭޝްފްލޯ ހަމަޖެއްސުމަށް ކަމަށް ފިނޭންސުން ބުންޏެވެ.
ސަޕްލިމެންޓަރީ ބަޖެޓުގައި ހިމަނައިގެން ކެޕިޓަލް ދޫކުރަނީ ސަރުކާރުގެ ހަތަރު ކުންފުންޏަކަށެވެ. އެއީ ފަހި ދިރިއުޅުން ކޯޕަރޭޝަން، ފެނަކަ، އާރުޑީސީ، އަދި ފަންޑް މެނޭޖްމަންޓް ކޯޕަރޭޝަނެވެ. މީގެއިތުރުން މި ސަރުކާރުން އަލަށް ގާއިމުކުރި ޑިވެލޮޕްމަންޓް ބޭންކުގެ ހިދުމަތް ފެށުމަށް ބޭނުންވާ ކެޕިޓަލް ދޫކުރަނީ ވެސް ސަޕްލިމެންޓަރީ ބަޖެޓުންނެވެ.
ބަޖެޓު ފޮތުގައިވާ ގޮތުން، ސަބްސިޑީގެ ގޮތުގައި ސަޕްލިމެންޓަރީ ބަޖެޓުން ސަރުކާރު ކުންފުނިތަކަށް އެއް ބިލިއަނަށްވުރެ ގިނަ ރުފިޔާ ދޫކުރާނެ އެވެ.
ސަޕްލިމެންޓަރީ ބަޖެޓުގައި ސަބްސިޑީގެ ގޮތުގައި ބިލިއަނެއް ހިމެނީ، މި އަހަރަށް ސަރުކާރަށް ފާސްކުރި ބަޖެޓުގައި އަންދާޒާކުރި ގޮތަށް ނިމިދިޔަ ޖުލައި މަހާ ހަމައަށް ސަބްސިޑީ ރިފޯމުގެ ސިޔާސަތުތައް ތަންފީޒުކުރަން ނުފެށުމާއި އަހަރު ނިމުމުގެ ކުރިން ވެސް އެކަން ވާނެ ކަމަށް ނުބެލެވޭތީ ކަމަށް ބަޖެޓު ފޮތުގައިވެ އެވެ.
މީގެ ކުރިން ސަރުކާރުން ވަނީ މި އަހަރު ނިމުމުގެ ކުރިން ސަބްސިޑީ ރިފޯމުގެ މަސައްކަތް ފެށޭނެ ކަމަށް ތަކުރާރުކޮށް ބުނެ، އެކި ތާރީހުތައް ދީފަ އެވެ.
ބަޖެޓުގައި ހިމެނީ ސަބްސިޑީގެ ތެރޭގައި ފެނަކައިގެ ކޭޝްފްލޯ ހަމަޖެއްސުމަށާއި ބަޖެޓުގައި ނުހިމަނާ ދޫކުރި ރޯދަ މަހުގެ ކަރަންޓު ޑިސްކައުންޓާއި މިސްކިތްތަކުގެ ޓެރިފް ދަށްކުރުމުގެ ސަބަބުން ހޭދަވި ހަރަދު ވެސް ހިމެނެ އެވެ. ހޫނުގަދަވެ ކަރަންޓު ބޭނުންކުރާ މިންވަރު އިތުރުވުން، ކަރަންޓު ސަބްސިޑީ އިތުރުވީ ސަބަބެއްގެ ގޮތުގައިވެ އެވެ.
ކާބޯތަކެތީގެ އަގު ހެޔޮކުރުމަށް ދޫކުރާ ސަބްސިޑީއަށް ދާ ހަރަދު އިތުރުވި ސަބަބުތަކުގެ ތެރޭގައި ރޯދައާ ދިމާކޮށް ކާޑު ބެހުން ހިމެނެ އެވެ. އެއީވެސް ފާސްކުރި ބަޖެޓުގައި ނުހިމެނޭ ހަރަދެކެވެ. އަދި، ވެމްކޯއިން ނަގަމުން އަންނަ ފީތައް ކުޑަކުރުމުގެ ސަބަބުން ކުނި މެނޭޖްކުރުމަށް ސަރުކާރުން ދޫކުރާ ސަބްސިޑީގެ މިންވަރުވެސް އިތުރުވެފައިވާކަން ފިނޭންސުން ވަނީ ހާމަކޮށްފަ އެވެ.
