ކޮންމެ އަހަރަކު ދިރާގުން ބާއްވާ ރާއްޖޭގެ އެންމެ ބޮޑު ދުވުމުގެ ހަރަކާތް ކަމަށްވާ ދިރާގު މޯލްޑިވްސް ރޯޑް ރޭސް 4،400 ދުވުންތެރިންނާ އެކު މާދަމާ ހުޅުމާލޭގައި ބޭއްވުމަށް ތައްޔާރުވެއްޖެ އެވެ.
އެ ދުވުމުގައި ހުޅުމާލޭ ސެންޓްރަލް ޕާކުގައި މިރޭ ފަތިހު ފުރަތަމަ ފަށާނީ ހާފް މެރަތަން އަދި 10 ކިލޯ މީޓަރު ދުވުމެވެ. އެ ދުވުން ކުރިއަށް ގެންދިޔުމަށް ހަމަޖެހިފައި ވަނީ ފަތިހު 05:00 އިން ފެށިގެން ހެނދުނު 09:00 އާ ހަމައަށެވެ.
ސްކޫލުތަކުގެ އިތުރުން އޮފީސްތަކާއި ރިސޯޓްތަކަށް ކުރިއަށް ގެންދާ ފަސް ކިލޯ މީޓަރު ދުވުން ކުރިއަށް ގެންދަން ހަމަޖެހިފައި ވަނީ ހަވީރު 04:00 އިން ފެށިގެން އިރުއޮއްސި 06:00 ޖެހުމާ ހަމައަށެވެ.
މިފަހަރު އަލަށް ބާއްވާ އޮފީސް އަދި ރިސޯޓް ކެޓަގަރީން 90 އަށްވުރެ ގިނަ ޓީމު ވަނީ ބައިވެރިވެފަ އެވެ.4
ދުވުމުގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުރުވުމަށާއި ފަންޑްރެއިޒް ކުރުމުގެ ފުރުސަތު ލިބިގެންދާނެ އެވެ.
އެގޮތުން ދިރާގުން މި އަހަރުގެ އިވެންޓުގައި އެންޑޯސްކޮށްފައިވާ 12 އެންޖީއޯތަކުގެ ތެރެއިން ބައިވެރިވެރިންގެ އެންމެ ގިނަ ނޮމިނޭޝަން ލިބޭ ޖަމިއްޔާއަކަށް އެ ފަރާތްތަށް ރޭވިފައިވާ ޕްރޮގްރާމްތައް ފެށުމަށް އެހީތެރިވުމުގެ ގޮތުން ޖުމްލަ ދެލައްކަ ރުފިޔާގެ ފައިސާގެ އެހީތެރިކަން ދިރާގުން ދޭނެ އެވެ.
ދިރާގު މޯލްޑިވްސް ރޯޑްރޭސްއަކީ ރާައްޖޭގައި މިގޮތަށް ބާއްވަމުންދާ ބައިނަލްއަގުވާމީ ހަމައެކަނި ދުވުމެވެ.
އެ ދުވުން ކުރިއަށްދާއިރު މަގުމަތީގައި އަންހެނުން ހިންގާ ކުދި ވިޔަފާރިތަކުން ހަރަކާތްތެރިވާނެ ކަމަށާއި ކުޑަކުދިންނަށް ހާއްސަ ޒޯންތަކުގައި ވެސް އެކި ހަރަކާތްތައް ކުރިއަށްދާނެ ކަމަށް ދިރާގުން ބުންޏެވެ.
އޭގެއިތުރުން ރޯޑް ރޭސް ނިންމާލުމަށްފަހު މާދަމާ ރޭ 08:30 އިން 11:00 ޖެހުމާ ހަމައަށް ރޮކެޓް ލީގް އަދި އީއޭއެފްސީ 25 ކުރިއަށް ގެންދިޔުމަށް ވަނީ ހަމަޖެހިފަ އެވެ.
