މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) މުވައްޒަފުންނަށް މުސާރައިގެ 50 ޕަސެންޓު ޑޮލަރުން ދެނީ ގާނޫނާއި ސެންޓްރަލް ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ އެންގުމާ ވެސް ހިލާފަށް ކަން "އަދަދު" ނޫހަށް އެނގިއްޖެ އެވެ.
ޑޮލަރުން މުސާރަ ނުދިނުމަށް އެމްއެމްއޭ އިން އެމްއޭސީއެލް އަށް، ޑިސެމްބަރު 18، 2023 ގައި އަންގާފައިވެ އެވެ. އެ ސިޓީގެ ކޮޕީއެއް މި ނޫހަށް ލިބިފައިވެ އެވެ.
އެ ސިޓީގައި ބުނެފައި ވަނީ ޑޮލަރުން މުސާރަ ދިނުމަކީ އެމްއެމްއޭގެ ގާނޫނުގެ 24 ވަނަ މާއްދާ އާއި އެ އޮތޯރިޓީގެ ގަވާއިދާ ހިލާފު ކަމެއް ކަމަށެވެ.
އެމްއެމްއޭ ގާނޫނުގެ 24 ވަނަ މާއްދާގެ ރ. ގައި ބުނެފައި ވަނީ ރާއްޖޭގައި މުއާމަލާތް ކުރުމުގައި ބޭނުން ކުރެވޭނެ ވަކި ފައިސާއެއް ނުވަތަ ފައިސާތަކެއް އޮތޯރިޓީއިން ކަނޑައަޅާފައިވާ ނަމަ، މުއާމަލާތް ކުރުމުގައި އެ ފައިސާއެއް ނުވަތަ ފައިސާތަކެއް ފިޔަވައި އެހެން ފައިސާއެއް ބޭނުން ކުރުމަކީ މަނާ ކަމެއް ކަމަށެވެ.
އެ އޮތީރިޓީގެ ގަވާއިދުގެ 5 ވަނަ މާއްދާގައި ބުނެފައިވަނީ ގަވާއިދުގައި އިސްތިސްނާކޮށްފައިވާ މުއާމަލާތްތައް ފިޔަވައި ރާއްޖޭގައި ކުރާ ހުރިހާ ވިޔަފާރިއެއްގެ ހުރިހާ އެއްޗެއްގެ އަގާއި މަސައްކަތުގެ އަގާއި ހިދުމަތުގެ އަގާއި ފީ އާއި ކުލި ފަދަ ތަކެތީގެ އަގު އަދާ ކުރުމަށް ދިވެހި ރުފިޔާ ފިޔަވާ އެހެން ފައިސާއެއް ބޭނުން ކުރުމަކީ މަނާ ކަމެއް ކަމަށެވެ.
"ވީމާ މަތީގައި ހަވާލާދެވިފައިވާ މޯލްޑިވްސް އެއާޕޯޓްސް ކޮމްޕެނީ ލިމިޓެޑުގެ ނިންމުމަކީ [މުސާރައިގެ ބައެއް ޑޮލަރުން ދިނުމަކީ] މި އޮތޯރިޓީގެ ގާނޫނު އަދި މަނިޓަރީ ގަވާއިދާ ހިލާފު ނިންމުމެއް ކަމުގައި ވާތީ، ތިޔަ ކުންފުނީގެ މުވައްޒަފުންގެ މުސާރަ އެއްކޮށް ދިވެހި ރުފިޔާއިން ދިނުމަށް އަންގަމެވެ،" އެމްއެމްއޭގެ ސިޓީގައިވެ އެވެ.
ޑޮލަރުން މުސާރަ ނުދިނުމަށް ޕީސީބީ، އަދި ފިނޭންސް މިނިސްޓްރީން ވެސް އެމްއޭސީއެލްއަށް އަންގާފައިވެ އެވެ. ނަމަވެސް އެންގުންތައް ބޮލާލައި ޖަހައި، މުސާރައިގެ ބައެއް ޑޮލަރުން ދަނީ ދެމުންނެވެ.
މުސާރައިގެ ބައެއް ޑޮލަރުން ދިނުން ހުއްޓާނުލައި ކުރިއަށް ގެންދާނެ ކަމުގެ ޔަގީންކަން އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފު ސޮއިކުރައްވައި މުވައްޒަފުންނަށް އަންގާރަ ދުވަހު ފޮނުވި މެމޯގައި ދީފައިވެ އެވެ. މުސާރައިގެ ބައެއް އޮލަރުން ދިނުމުގެ އެ އިނާޔަތަށް އެއްވެސް ބަދަލެއް ނާންނާނެ ކަމުގެ ފުރިހަމަ ޔަގީންކަން ރައީސް ޑރ. މުހައްމަދު މުއިއްޒު ވެސް ދެއްވާފައިވާ ކަމަށް މުވައްޒަފުންނަށް ފޮނުވި މެމޯގައިވެ އެވެ.
އެމްއޭސީއެލްގައި 3،000 އަށް ވުރެ ގިނަ މުވައްޒަފުން ވަޒީފާ އަދާކުރަމުން ގެންދެ އެވެ.
