ފެންނަމުން ދަނީ މި ސަރުކާރުން އިތުރުކުރި ސިޔާސީ މަގާމްތަކަށް މުސާރަ ދޭން ވެގެން ދައުލަތުގެ އެހެން ހުރިހާ މުވައްޒަފުން ގުރުބާންވާން ޖެހޭތަން ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު މިރޭ ވިދާޅުވެއްޖެ އެވެ.
އަމީރު "އެކްސް" ގައި ކުރެއްވި ޕޯސްޓެއްގައި ވިދާޅުވީ ސަރުކާރުން އިތުރަށް ނެގި ސިޔާސީ މީހުންނަށް އެކަނި ވެސް މަހަކު 50 މިލިއަން ރުފިޔާ ބަޖެޓުން ހަރަދު ކުރާ ކަމަށާއި 10 ޕަސަންޓް ކަނޑާލިއަސް 45 މިލިއަން ރުފިޔާ ދައްކާނީ ދައުލަތުގެ ބަޖެޓުން ކަމަށެވެ.
"ވައުދުވި ގޮތާއި ދިމާ އިދިކޮޅަށް ސިޔާސީ މީހުން ހާހުން އިތުރުކޮށް، ހަރަދުތައް ބޮޑުކޮށް، ސަރުކާރުގެ ފައިނޭންސިން ސްޓްރެޓެޖީ ފެއިލްވެ، މާލީ ކަންތައްތައް މެނޭޖް ނުކުރެވި، އޭގެ ނޭދެވޭ އަސަރު މިހާރު އިގްތިސާދަށް ވެސް ކުރާ ތަން. ސަރުކާރުން ހަރަދު ކުޑަކުރަންޖެހޭ،" އަމީރު ވިދާޅުވި އެވެ.
ދުނިޔޭގެ އިގްތިސާދީ ބޮޑު ކާރިސާއަށް ގައުމަށް ދިމާ ނުވާކަން ފާހަގަކުރައްވާ އަމީރު ވިދާޅުވީ ފެންނަމުން މިދަނީ ސަރުކާރުގައި ތިބި މީހުންގެ ނާގާބިލުކަމުން އަމިއްލައަށް ނެތް ހާލަތެއް އުފައްދައިގެން އޭގެއިން އަރައިގަނެވިގެން ނޫޅެވޭތަން ކަމަށެވެ.
އެގޮތުން އަމީރު ވިދާޅުވީ ދައުލަތަށް ކޮންމެ މަހަކު ވެސް ދައުލަތަށް ހަރަދު ހަމަޖެއްސޭ ވަރަށް ފައިސާ ވަންނަ ކަމަށާއި ދައްކަން ހުރި ލޯނުތަކަށް ފައިސާ ހޯދޭނެ ގޮތްތައް ފަހިވެ ހުރިކަމަށް ބުނެ ސަރުކާރުން ދެއްކި ވާހަކަ ދިމާނުވި ކަމަށެވެ.
"ދުނިޔެ އޮތީ އިގްތިސާދީ ބޮޑު ކާރިސާ އެއްގައެއް ނޫން. ކޮވިޑް-19 ފަދަ އާލަމީ ވަބާއެއް އޮތީކީ ނޫން. ބާޒާރުގައި ތެލުގެ އަގު ހުރީ އެވްރެޖްކޮށް ހުންނަ ވަރަށް. މި އަދު މި ފެންނީ ބައެއްގެ ނާގާބިލްކަމުން އަމިއްލައަށް ނެތް ހާލަތެއް އުފައްދައިގެން އޭގެއިން އަރައިނުގަނެވިގެން އުޅޭތަން،" އަމީރު ވިދާޅުވި އެވެ.
އަމީރު މިހެން ވިދާޅުވީ އަންނަ އަހަރުގެ ބަޖެޓު ހުށަހަޅާއިރު ސިޔާސީ މުވައްޒަަފުންނާއި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރަ ކުޑަކުރަން ނިންމާފައިވާކަން ރައީސް ޑރ. މުހައްމަދު މުއިއްޒު މިރޭ އަންގަވާފައި ވަނިކޮށެވެ.
ރައީސް ނިންމެވީ ސިޔާސީ މަގާމުތަކުގައި ތިއްބަވާ ބޭފުޅުންނާއި ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންނާއި މިނިވަން މުައައްސަސާތަކުގެ އިސްވެރިން އަދި ޝަރުޢީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން މުސާރައިން 10 ޕަސެންޓު ކަނޑާލުމަށެވެ.
އެ ފިޔަވަޅުތައް އަޅާއިރު 12,000ރ. އިން ދަށުން މުސާރަ ލިބޭ މީހުން އިސްތިސްނާ ވާނެ ކަމަށް ރައީސް ވިދާޅުވި އެވެ.
