ރައީސް ޑރ. މުހައްމަދު މުއިއްޒުއަށް ލިބިވަޑައިގަންނަވާ މުސާރައިގެ 50 ޕަސަންޓު ދެ އަހަރު ވަންދެން ނުނަގަންވަން މިއަދު ނިންމަވައި އެކަން އިއުލާން ކުރައްވައިފި އެވެ.
ރައީސް މުއިއްޒު "އެކްސް" ގައި ކުރެއްވި ޕޯސްޓެއްގައި ވިދާޅުވީ 2025 ގެ ބަޖެޓް ހުށަހަޅާއިރު ދައުލަތުގެ ހަރަދު ކުޑަ ކުރުމުގެ ގޮތުން އަންނަ އަހަރުން ފެށިގެން ދެ އަހަރު ވަންދެން އެމަނިކުފާނުގެ މުސާރައިން 50 ޕަސަންޓު ނުނަންގަވާ ގޮތަށް ހަމަޖައްސަން އަންގާފައިވާ ކަމަށެވެ.
ރައީސް މުއިއްޒުގެ މުސާރައިގެ ގޮތުގައި ލިބިވަޑައިގަންނަވަނީ 100،000ރ. އެވެ. 50 ޕަސަންޓު މުސާރައިގެ ގޮތުގައި ނުނަންގަވާނަމަ، އެމަނިކުފާނަށް ލިބިވަޑައިގަންނަވާނީ 50،000ރ. އެވެ.
ކުރީގެ ރައީސް އަބްދުﷲ ޔާމީން 2013 ގައި ވެރިކަމަށް ވަޑައިގަތުމަށްފަހު ނެންގެވީ ދެބައިކުޅަ އެއްބައި މުސާރަ އެވެ. ނަމަވެސް ވެރިކަމުގެ ފަހު އަހަރު ފުލް މުސާރަ ނަންގަވަން ފެއްޓެވި އެވެ.
ރައީސް މުއިއްޒު ވަނީ އެމަނިކުފާނުގެ މުސާރައިގެ އިތުރުން ސިޔާސީ މަގާމުތަކުގައި ތިއްބަވާ ބޭފުޅުންގެ މުސާރައިން 10 ޕަސަންޓު އަދި ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން ވެސް 10 ޕަސަންޓު ކުރިއަށް އޮތް ދެ އަހަރަށް އުނިކުރަން ނިންމަވާފަ އެވެ.
އޭގެއިތުރުން ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90،000ރ. ކަމަށް ވެސް ކަނޑަ އަޅުއްވާފަ އެވެ. ބައެއް ކުންފުނިތަކުގެ އޮނިގަނޑު އޮތް ގޮތުން މިހާރު 100،000ރ. އަށްވުރެ ގިނައިން މުސާރައިގެ ގޮތުގައި ލިބެ އެވެ.
ޝަރުއީ ދާއިރާގެ އިސްވެރިންނާއި ރައްޔިތުންގެ މަޖިލީހުގެ މެންބަރުންގެ މުސާރައިން ވެސް 10 ޕަސަންޓު އުނި ކުރުމަށް ރައީސް މުއިއްޒު ވަނީ ނިންމަވާފަ އެވެ.
މުސާރަ އުނިކުރާ މުވައްޒަފުންގެ ތެރޭގައި 12،000ރ. އަށްވުރެ ދަށުން މުވައްޒަފުން ނުހިމެނެ އެވެ.
ރައީސްގެ މުސާރަ އާއި ސިޔާސީ މުވައްޒަފުންގެ އިތުރުން ސަރުކާރު މުވައްޒަފުންގެ މުސާރައިން ވަކި ޕަސަންޓެއް ކުޑަ ކުރަން ނިންމީ ސަރުކާރުގެ މާލީ ހާލަތު ދަށްވެފައިވާ ދަނޑިވަޅެއްގަ އެވެ. މިގޮތުން، 228 ސިޔާސީ މުވައްޒަފުން ވެސް ވަކި ކުރަން ވަނީ ނިންމަވާފަ އެވެ.
