އެންޓި ކޮރަޕްޝަން ކޮމިޝަނުން ކުރިއަށް ގެންދިޔަ އެމްއެމްޕީއާރުސީ ތަހުގީގު ބަޔާނުގެ ސަފުހާއެއް ކަމަށް ބުނެ ސޯޝަލް މީޑިއާ އެކްޓިވިސްޓު، ތައްޔިބު ޝަހީމު މިދޔަ އޯގަސްޓު މަހު އެކްސްގައި ހިއްސާކުރި މައުލޫމާތަކާ ގުޅިގެން ފުލުހުންގެ އިދާރާއަށް އޭނާ ހާޒިރުކޮށް ބަޔާން ނަގައިފި އެވެ.
އެކްސްގައި ތައްޔިބު މިއަދު ކުރި ޕޯސްޓެއްގައި ބުނީ އޭނާ ފުލުހަަށް ހާޒިރުކޮށް ބަޔާން ނެގީ އެ މައްސަލަ އޭސީސީން ފުލުހުންނަށް ހުށަހެޅުމުން ކަމަށެވެ.
"މިދިޔަ އޯގަސްޓު މަހު އެކްސް.ކޮމް ގައި ކުރި ޕޯސްޓަކާ ގުޅިގެން އޭސީސީން 'މަށެއް ނޫން' [ކަމަށް] ބުނެ ފުލުހުންނަށް ހުށަހެޅުމުން، ފުލުހުން އަހުރެން ތަހުގީގަށް ހާޒިރުވުމަށް އެންގުމުން ހާޒިރުވެ ބަޔާން ދީފިން،" ތައްޔިބު މިއަދު ކުރި ޕޯސްޓުގައި ބުނެފައިވެ އެވެ.
އޭސީސީގެ ތަހުގީގު ރިޕޯޓެއްގެ ސަފުހާއެއް ކަމަށް ބުނެ އޯގަސްޓު މަހު ތައްޔިބު އެކްސްގައި ހިއްސާކުރި ކަރުދާހުގައި މަޖިލީހުގެ މިހާރު ރައީސް، އަބްދުއްރަހީމް އަބްދުﷲ އަށް އެމްއެމްޕީއާރުސީގެ ފައިސާ ލިބުނުކަމަށެވެ. އަދި އެ މައްސަލަ ތަހުގީގު ކުރަމުން ދިޔައިރު، އެ މައްސަލައިގެ ވީޑިއޯ އާއި ފޮޓޯ ބޭނުން ކޮށްގެން މައްސަލައިގެ އަސްލު ގެއްލޭ ގޮތަށް ފުލުހުންގެ ބައެއް އިސްވެރިން މަސައްކަތް ކޮށްފައިވާ ކަމަށް ވެސް ބުނެފައިވެ އެވެ.
ނަމަވެސް ތައްޔިބު ހިއްސާކުރި ކަރުދާހަކީ އޭސީސީގެ ލިޔެކިޔުމެއް ނޫން ކަމަށް އެ ކޮމިޝަނުން އޭރު ވަނީ ބުނެފަ އެވެ.
އެގޮތުން އޯގަސްޓު 29، ގައި އެ ކޮމިޝަނުން އެކްސްގައި ކުރި ޕޯސްޓެއްގައި ބުނީ ރައްޔިތުންނަށް އޮޅުވާލައި ދޮގު މައުލޫމާތު ފެތުރުމަކީ ކަންބޮޑުވާ ކަމެއް ކަމެއް ކަމަށާއި އެފަދަ އަމަލުތައް ކުށްވެރި ކުރާ ކަމަށެވެ.
އެމްއެމްޕީއާރުސީގެ މައްސަލައިގައި ފުލުހުން ނަގާފައިވާ ކަމަށް ބުނާ ބަޔާނެއް ލީކުކޮށްލި މައްސަލައިގައި މީގެ ކުރިން، މިދިޔަ ސެޕްޓެމްބަރު މަހު ތައްޔިބުގެ ފޯނާއި އިލެކްޓްރޯނިކް ވަސީލަތްތައް ވެސް ކޯޓު އަމުރެއްގެ ދަށުން ފުލުހުން ހިފެހެއްޓި އެވެ. އެ ތަކެތި ފުލުހުން އޭރު ދޫކޮށްލީ 17 ދުވަސް ފަހުންނެވެ.
ކުރީގެ ރައީސް އަބްދުالله ޔާމީންގެ ވެރިކަމުގައި ތައްޔިބު އޭރު ގެންގުޅުން ސިމް ވެސް ފުލުހުން ކްލޯން ކުރި އެވެ. އެއީ ކޯޓު އަމުރެއްގެ ދަށުން ދިރާގުން ފުލުހުންނަށް ފަހިކޮށްދިން ކަމެކެވެ.
ތައްޔިބުގެ ޓްވިޓާ ފޮލޮވަރުންގެ އަދަދު 51,500 އަށްވުރެ އިތުރުއިރު އޭނާ ގެންދަނީ ސަރުކާރަށް ވަރަށް ބޮޑަށް ފާޑުކިޔަމުންނެވެ. މިދިޔަ ސަރުކާރުގައި ޓޫރިޒަމް މިނިސްޓްރީގެ ސީނިއާ އެގްޒެކެޓިވް ޑިރެކްޓަރުގެ މަގާމު ވެސް އޭނާ އަދާކުރި އެވެ.
