ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީގެ ޑިރެކްޓަރު ޖެނެރަލަކަށް ހުންނެވި އަދި ގިނަ އަހަރުތަކެއް ވަންދެން އެ މިނިސްޓްރީގައި މަސައްކަތް ކުރައްވާފައިވާ ފާތިމަތު ޝާނާ ފާރޫގު ރައީސް އޮފީހުގެ ސިޔާސީ މަގާމަކަށް ވަޑައިގަންނަވައިފި އެވެ.
"އަދަދު" އަށް މައުލޫމާތު ލިބިފައިވާ ގޮތުގައި ޝާނާ ވަނީ ރައީސް އޮފީހުގެ މަސައްކަތަށް މިއަދު ނިކުމެވެޑައިގެންފަ އެވެ. ނަމަވެސް، އޭނާ ފޯނަށް ޖަވާބު ނުދެއްވާތީ، ހަވާލުވެވަޑައިގަތީ ސީދާ ކޮން މަގާމަކާ ކަން އަދި ކަށަވަރެއް ނުކުރެވުނެވެ. މި މައުލޫމާތު ހިއްސާކޮށްދޭން މެސެޖުގެ ޒަރިއްޔާއިން އޭނާ އަރިހު ވާނީ އެދިފަ އެވެ.
އާންމުންނަށާއި ނޫސްވެރިންނަށް ޝާނާ އެނގެނީ މިނިސްޓްރީގެ ފަރާތުން ތަރައްގީގެ މަޝްރޫއުތަކުގައި ސޮއިކުރައްވާ ބޭފުޅާގެ ގޮތުގަ އެވެ. އެގޮތުން ކުރީގެ ރައީސް އަބްދުﷲ ޔާމީންގެ ސަރުކާރުގެ ދުވަސްވަރުން ފެށިގެން އެކި މަޝްރޫއުތައް ހިންގުމުގެ އެއްބަސްވުންތަކުގައި ދައުލަތުގެ ފަރާތުން އޭނާ ސޮއިކުރައްވާފައިވެ އެވެ.
ކޮންސްޓްރަކްޝަން މެނޭޖުމަންޓާއި ކޮންސްޓްރަކްޝަން ލޯއިން މަތީ ތައުލީމު ހާސިލުކުރައްވާފައިވާ ޝާނާގެ ލިންކްޑްއިން ޕްރޮފައިލްގައިވާ ގޮތުގައި އޭނާ ސަރުކާރާ ގުޅުނީ އޭރުގެ ހައުސިން އަދި އިންފްރާސްޓްރަކްޗާ މިނިސްޓްރީގެ ޕްރޮޖެކްޓު ކޯޑިނޭޓަރެއްގެ ގޮތުގައި ޖުލައި، 2006 ގަ އެވެ. އެ މިނިސްޓްރީގެ ޑިރެކްޓަރު ޖެނެރަލަކަށް އިސްކުރީ އޮގަސްޓު، 2015 ގަ އެވެ.
ރައީސް އޮފީހުގެ ސިޔާސީ މަގާމަކަށް ޝާނާ ވަޑައިގެންނެވިއިރު، ދާދި ފަހުން ރައީސް ޑރ. މުހައްމަދު މުއިއްޒު ވަނީ ސިޔާސީ މަގާމުތަކަށް ކުރާ ހަރަދު ކުޑަކުރުމުގެ މަސައްކަތް ފަށާފައިވާ ކަން އިއުލާންކުރައްވާފަ އެވެ. މިގޮތުން ކުރިއަށް އޮތް ހަފުތާއެއްހާ ދުވަހުގެ 228 މީހަކު ވަޒީފާއިން ވަކިކުރާނެ ކަމަށް ރައީސް ވިދާޅުވެފައިވެ އެވެ.
ރައީސް އޮފީހުން އެންމެ ފަހުން ހިއްސާކޮށްފައިވާ ތަފާސްހިސާބުތަކުގައިވާ ގޮތުގައި، ސެޕްޓެމްބަރު މަސް ފެށުނުއިރު އެ އޮފީހުގައި 345 މުވައްޒަފުން އެބަތިއްބެވެ.
