ސިނާއީ ބޭނުމަށް ހުޅުމާލޭގެ ދެ ވަނަ ފިޔަވަހިން މި ހިނގާ އޮކްޓޯބަރު މަހު ވިއްކަން އިއުލާނު ކުރި ބިންތަކުގެ ބޮޑުމިން ކުޑަކޮށް، އަގު ވެސް ތިރި ކުރުމަށްފަހު ހައުސިން ޑިވެލޮޕްމަންޓް ކޯޕަރޭޝަނުން އަލުން މިއަދު އިއުލާނެއް ނެރެފި އެވެ.
އޮކްޓޯބަރު 2، ގައި އެޗްޑީސީން އިއުލާނު ކުރީ އިންޓަގްރޭޓެޑް ހަބުން 12 ބިމެއް ވިއްކުމަށެވެ. އެއީ 3746 އަކަފޫޓުގެ އަށް ބިމަކާއި 3689 އަކަފޫޓުގެ ހަތަރު ބިމެކެވެ. ނަމަވެސް މިއަދު އިއުލާނު ކުރި ގޮތުން މިހާރު 16 ބިން އެ ސަރަހައްދުން ވިއްކާނެ އެވެ. އެއީ 1538 އަކަފޫޓުގެ 12 ބިމާއި 1515 އަކަފޫޓުގެ ހަތަރު ބިމެވެ.
ކުރިން ކުރި އިއުލާނުގައި ބުނެފައި ވަނީ ބީލަން ފެށޭ އަގަކީ އަކަފޫޓަކަށް 7500ރ. ކަމަށެވެ. ނަމަވެސް މިއަދު ކުރި އިއުލާނުގައި އެ އަގު ވަނީ އަކަފޫޓަކަށް 5500ރ. އަށް ތިރިކޮށްފަ އެވެ.
ބިން ގަނެވޭނީ އުމުރުން 18 އަހަރުވެފައިވާ ދިވެއްސަކަށް ނުވަތަ 100 ޕަސެންޓު ދިވެހި ކުންފުންޏަކަށެވެ. އެންމެ ގިނަވެގެން ގަނެވޭނީ ތިން ބިމެވެ.
ބިން ގަތުމަށް ބިޑު ހުށަހަޅަންޖެހޭނީ އެޗްޑީސީގެ އޮންލައިން ޕޯޓަލް މެދުވެރިކޮށެވެ. މިހާރު އެ ފުރުސަތު ވަނީ ހުޅުވާލައިފަ އެވެ. ނަމަވެސް ބިޑު ބަންދުވާ ތާރީހެއް އެޗްޑީސީން ބުނެފައެއް ނުވެ އެވެ.
