ޒުވާނުންގެ ދުވަސް މިއަދު ފާހަގަ ކުރަމުން އަންނައިރު، 18 އަހަރު ފުރޭ ޒުވާނުންގެ ހައްގުތައް ސަރުކާރުން ނިގުޅައިގަންނަމުންދާ ކަމަށް އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.
ސިނގިރޭޓާއި ދުންފަތުގެ ބާވަތްތައް ގަނެވޭ އުމުރު 18 އަހަރުން 21 އަހަރަށް މަތި ކުރަން ސަރުކާރުން ވަނީ ނިންމައިފަ އެވެ. ސީދާ ވިދާޅުނުވި ނަމަވެސް ޝާހިދު ފާޑުވިދާޅުވީ އެ ނިންމުމަށް ކަމަށް ބެލެވެ އެވެ. ޝާހިދު ވިދާޅުވީ ޒުވާނުންގެ ހައްގުތައް ހަނި ކުރާތީ އެކަމާ ދެކޮޅަށް އަޑުއުފުލަންޖެހޭ ކަމަށެވެ.
"ޒުވާނުންގެ ދުވަސް މިއަދު ފާހަގަކުރަމުންދާއިރު, 18 އަހަރު ފުރޭ ޒުވާނުންގެ ހައްގުތައް މި ސަރުކާރުން ނިގުޅައިގަނެ ހަނިކުރަމުންގެންދާތީ އެކަމާ ދެކޮޅަށް އެންމެހާ ޒުވާނުން ވެސް މިއަދު އަޑުފުލަންޖެހޭ،" ޝާހިދު ވިދާޅުވި އެވެ.
ސިނގިރޭޓާއި ދުންފަތް ގަނެވޭ އުމުރު މަތި ކުރުމަކީ ބައެއް ގައުމުތަކުން ކުރަމުންދާ ކަމެކެވެ. އެކަމަކު، ރާއްޖެއާ ހިލާފަށް އެ ގައުމުތަކުން އެކަން ތަންފީޒު ކުރަނީ އަހަރުތަކެއް ފަހުންނެވެ. ސަރުކާުރން ބޭނުންވާ ގޮތަށް ސިނގިރޭޓު ގަނެވޭ އުމުރު މަތި ކުރުމުން، މިހާރު ސިނގިރޭޓުގެ އިސްތިއުމާލު ކުރަމުންދާ 18 އަހަރާއި 21 އަހަރާ ދެމެދުގެ މީހުންނަށް ސިނގިރޭޓު ގަތުން މަނާވާނެ އެވެ.
އޭގެ އިތުރުން ވެސް ދުންފަތާއި ސިނގިރޭޓާއި ވޭޕާ ދެކޮޅަށް ސަރުކާރުން ދަނީ ގިނަ ފިޔަވަޅުތަކެއް އަޅަން ތައްޔާރުވަމުންނެވެ. އެގޮތުން ވޭޕް އެތެރެ ކުރުމާއި ބޭނުން ކުރުން މުޅިން މަނާކޮށް، ދުންފަތުގެ އެހެނިގެން ބާވަތްތަކުން ނަގާ ޓެކްސް ބޮޑު ކުރަން ވަނީ ނިންމައިފަ އެވެ.
ސަރުކާރުން ނިންމާފައި ވަނީ ނޮވެމްބަރު 15، އިން ފެށިގެން ވޭޕް އެތެރެ ކުރުން މަނާކޮށް، ޑިސެމްބަރު 15، އިން ފެށިގެން ވޭޕް ބޭނުން ކުރުން ވެސް މަނާ ކުރުމަށެވެ. އަދި ދުންފަތާއި ސިނގިރޭޓުން ނަގާ ޓެކްސް ނޮވެމްބަރު 1، އިން ފެށިގެން ބޮޑު ކުރަން ވެސް ވަނީ ނިންމައިފަ އެވެ.
ސަރުކާރުން ނިންމީ ސިނގިރޭޓަކުން މިހާރު ނަގާ 3ރ. ގެ ޓެކްސް އަށް ރުފިޔާއަށް ބަދަލުކޮށް، ދުންފަތުގެ އެހެން ބާވަތްތަކުން ނަގާ ޑިއުޓީ 50 ޕަސެންޓު ބޮޑު ކުރުމަށެވެ. މަޖިލީހަށް އިއްޔެ ހުށަހަޅައިގެން މިއަދު ބަހުސް ކުރި ބިލުގައި ވެސް އޮތީ އެގޮތަށް ޓެކްސް ބޮޑު ކުރުމަށެވެ.
އެހެންކަމުން މަދު ދުވަސްކޮޅެއްގެ ތެރޭގައި ވޭޕްގެ ވިޔަފާރި ރާއްޖޭގައި މަނާވާނެ އެވެ. އޭގެ ސަބަބުން ވަރަށް ބޮޑެތި ގެއްލުންވާނެ ކަމަށް އެ ވިޔަފާރީގައި އުޅޭ މީހުން ދަނީ ބުނަމުންނެވެ. ވޭޕް މަނާ ކުރުމާ ދެކޮޅަށް އިއްޔެ ބަޔަކު ވަނީ މުޒާހަރާ ވެސް ކޮށްފަ އެވެ.
