ބެންކް އޮފް މޯލްޑިވްސް (ބީއެމްއެލް) ސްކޫލު ކުދިންގެ ފެތުމުގެ 20 ވަނަ މުބާރާތުގެ އެންމެ މޮޅު ފެތުންތެރިންނަށް ގާޒީ ސްކޫލުގެ އިބްރާހީމް ޔުއާން ޝަމީމް، ގިޔާސުއްދީން އިންޓަނޭޝަނަލް ސްކޫލުގެ މަރިޔަމް އައިރާ ޝިރުނީލް، ގިޔާސުއްދީން އިންޓަނޭޝަނަލް ސްކޫލުގެ ޒުކައިން ޢަބްދުﷲ ޙަނީފު، ފިންލޭންޑް އިންޓަނޭޝަނަލް ސްކޫލުގެ އަމްނާ ތަޒްކިޔާ މިރުޝާދު، ގިޔާސުއްދީން ސްކޫލުގެ އިޒްޔާން ނާޒިމް، ގިޔާސުއްދީން ސްކޫލްގެ އަޔާނާ ޢަރީފު އަދި ވީލާ އިންޓަނޭޝަނަލް ހައިސްކޫލުގެ މުޙައްމަދު ރިހާން ޝިހާމް ހޮވިއްޖެ އެވެ.
ސްވިމިން އެސޯސިއޭޝަން އޮފް މޯލްޑިވްސް އިން އިންތިޒާމްކުރި މި މުބާރާތުގައި، މާލޭގެ 21 ސްކޫލަކުން ބައިވެރިވި ސްކޫލު ކުދިންގެ ފެތުމުގެ މުބާރާތް ކުރިއަށްދިޔައީ، މި މަހު 12 އިން 17 އަށް، ހުޅުމާލޭ ސްޕޯޓްސް ކޮމްޕެލްކްސް ސްވިމިން ޕޫލުގަ އެވެ.
ތަފާތުގެ ފަސް އުމުރުފުރާގެ އިތުރުން، އެލީޓް އެތުލީޓް ވިތު ޑިސްއެބިލިޓީ (އީއޭޑީ) ގުރޫޕް ހިމެނޭހެން 480 އަށް ވުރެ ގިނަ ދަރިވަރުން ބައިވެރިވި މިމުބާރާތުގައި ފެތުންތެރިން ވަނީ 25، 50، 100، 200 މީޓަރު ފްރީސްޓައިލް ރޭހާއި 25، 50، 100 މީޓަރު ބެކްސްޓްރޯކް ރޭހާއި، 25، 50، 100 މީޓަރު ބްރެސްޓް ސްޓްރޯކް ރޭހުގެ އިތުރުން 25، 50، 100 މީޓަރުގެ ބަޓަފްލައި ރޭހާއި 100، 200 މީޓަރުގެ މިޑްލޭ ރޭހުގެ އިތުރުން ސްކޫލުތަކަށް ހާއްސަކޮށް ބޭއްވި ފްރީސްޓައިލް ރިލޭ އަދި މިޑްލޭ ރިލޭ ރޭސްތައް ފުރިހަމަ ކޮށްފަ އެވެ.
ޔުއާން، ހޯދީ ޖޫނިއާ އޭ (12 އަހަރުން ދަށުގެ) ފިރިހެން ކުދިންގެ ބައިންނެވެ. އައިރާ، އެންމެ މޮޅު ފެތުންތެރިޔާގެ މަޤާމު ހޯދީ ޖޫނިއާ އޭ (12 އަހަރުން ދަށުގެ) އަންހެން ކުދިންގެ ބައިންނެވެ. ޒުކައިން، އެންމެ މޮޅު ފެތުންތެރިޔާގެ މަޤާމު ހޯދީ ޖޫނިއާ ބީ (14 އަހަރުން ދަށުގެ) ފިރިހެން ކުދިންގެ ބައިންނެވެ. ތަޒްކިޔާ، އެންމެ މޮޅު ފެތުންތެރިޔާގެ މަޤާމު ހޯދީ ޖޫނިއާ ބީ (14 އަހަރުން ދަށުގެ) އަންހެން ކުދިންގެ ބައިންނެވެ. އަދި އިޒްޔާން، އެންމެ މޮޅު ފެތުންތެރިޔާގެ މަޤާމު ހޯދީ ސީނިއާ އޭ (16 އަހަރުން ދަށުގެ) ފިރިހެން ކުދިންގެ ބައިންނެވެ. އަޔާނާ، އެންމެ މޮޅު ފެތުންތެރިޔާގެ މަޤާމު ހޯދީ ސީނިއާ އޭ (16 އަހަރުން ދަށުގެ) އަންހެން ކުދިންގެ ބައިންނެވެ. އަދި، ރިހާން، އެންމެ މޮޅު ފެތުންތެރިޔާގެ މަޤާމު ހޯދީ ސީނިއާ ބީ (18 އަހަރުން ދަށުގެ) ފިރިހެން ކުދިންގެ ބައިންނެވެ.
ގިޔާސުއްދީން އިންޓަނޭޝަނަލް ސްކޫލްގެ ކުދިން ޓްރޮފީ ހިފައިގެން.---- ފޮޓޯ: ސްވިމިން އެސޯސިއޭޝަން
މުބާރާތުގެ އެންމެ މޮޅު ސްކޫލަކީ ގިޔާސުއްދީން
މުބާރާތުގެ އެންމެ މޮޅު ސްކޫލަކަށް ހޮވުނީ، ގިޔާސުއްދީން އިންޓަނޭޝަނަލް ސްކޫލު އެވެ.
މި މުބާރާތުގައި ފެތުންތެރިން ވާދަކުރި ގިނަ ޢުމުރުފުރާތަކުން އެއް ވަނަ ހޯދައި ޖޫނިއާ ގުރޫޕާއި ސީނިއާ ގުރޫޕުން އެންމެ މޮޅު ސްކޫލުގެ ވަނަ ހޯދައި މުޅި މުބާރާތުގެ އެންމެ މޮޅު ސްކޫލުގެ ވަނަ ގިޔާސުއްދީން އިން ހޯދި އެެވެ. މުބާރާތުގެ ޖޫނިއާ އޭ ގުރޫޕުގެ އަންހެން ކުދިންގެ އެއް ވަނަ ސްކޫލު އަދި ސީނިއާ ގުރޫޕުގެ އަންހެން ކުދިންނާއި ފިރިހެން ކުދިންގެ އެއް ވަނަ ހޯދީ ވެސް ގިޔާސުއްދީން އިންޓަނޭޝަނަލް ސްކޫލް އެވެ.
ޖޫނިއާ ގުރޫޕާއި ސީނިއާ ގުރޫޕުން ދެ ވަނަ ހޯދައި މުބާރާތުގެ ދެ ވަނަ ސްކޫލުގެ މަޤާމު ހޯދާފައިވަނީ އިސްކަންދަރު ސްކޫލް އެވެ.
ޖޫނިއާ އޭގެ ފިރިހެން ކުދިންގެ އެއް ވަނަ ސްކޫލަކަށް ހޮވުނީ އަޙްމަދިއްޔާ އިންޓަނޭޝަނަލް ސްކޫލެވެ. ޖޫނިއާ އޭ ގެ އަންހެން ކުދިންގެ ދެ ވަނަ ސްކޫލަކަށް ހޮވުނީ އިސްކަންދަރު ސްކޫލެވެ. ޖޫނިއާ އޭ ގެ އަންހެން ކުދިންގެ ތިން ވަނަ ސްކޫލަކަށް ހޮވުނީ މުހުޔިއްދީން ސްކޫލެވެ. ޖޫނިއާ އޭގެ ފިރިހެން ކުދިންގެ ދެ ވަނަ ސްކޫލަކަށް ގާޒީ ސްކޫލު ހޮވުނުއިރު ޖޫނިއާ އޭ ގެ ފިރިހެން ކުދިންގެ ތިން ވަނަ ސްކޫލަކަށް ހޮވުނީ މަޖީދިއްޔާ ސްކޫލް އެވެ.
މި މުބާރާތުގެ ޖޫނިއާ ބީގެ ފިރިހެން ކުދިންގެ އެއް ވަނަ ސްކޫލަކަށް ހޮވުނީ ފިންލޭންޑް އިންޓަނޭޝަނަލް ސްކޫލް އެވެ. ޖޫނިއާ ބީގެ އަންހެން ކުދިންގެ އެއް ވަނަ ސްކޫލަކަށް ހޮވުނީ ޖަމާލުއްދީން ސްކޫލެވެ. ޖޫނިއާ ބީ ގެ ފިރިހެން ކުދިންގެ ދެ ވަނަ ސްކޫލަކަށް ހޮވުނީ ގިޔާސުއްދީން އިންޓަނޭޝަނަލް ސްކޫލް އެވެ. ޖޫނިއާ ބީގެ އަންހެން ކުދިންގެ ދެ ވަނަ ސްކޫލަކަށް ހޮވުނީ ފިންލޭންޑް އިންޓަނޭޝަނަލް ސްކޫލް އެވެ. ޖޫނިއާ ބީގެ ފިރިހެން ކުދިންގެ ތިން ވަނަ ސްކޫލަކަށް އިސްކަންދަރު ސްކޫލު ހޮވުނުއިރު އަންހެންކުދިންގެ ތިން ވަނަ ސްކޫލަކަށް ހޮވުނީ ގިޔާސުއްދީން އިންޓަނޭޝަނަލް ސްކޫލް އެވެ.
މުބާރާތުގެ ސީނިއާ ގުރޫޕުގެ ފިރިހެން ދެ ވަނަ ސްކޫލަކަށް އިސްކަންދަރު ސްކޫލު ހޮވުނުއިރު، އަންހެން ދެ ވަނަ ސްކޫލަކަށް ހޮވުނީ ކަލާފާނު ސްކޫލް އެވެ. އަދި ފިރިހެން ދެ ވަނަ ސްކޫލަކަށް ހޮވުނީ އަޙްމަދިއްޔާ އިންޓަނޭޝަނަލް ސްކޫލެވެ. އަންހެން ތިން ވަނަ ސްކޫލަކަށް ހޮވުނީ އިސްކަންދަރު ސްކޫލެވެ.
