މި އަހަރުގެ ޖުމްހޫރީ ދުވަހާ ގުޅިގެން ނޮވެމްބަރު 10، އަކީ ވެސް ސަރުކާރު ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު ކަނޑަޅުއްވައިފި އެވެ.
ރައީސް އޮފީހުން މިއަދު ބުނީ، އެގޮތަށް ނިންމެވީ ޖުމްހޫރީ ދުވަސް (ނޮވެމްބަރު 11،) އަކީ ރަސްމީ ބަންދު ދުވަހަކަށް ވާތީ އޭގެ ކުރިއަށް އޮތް 10 ވަނަ ދުވަހަކީ ރަސްމީ ދުވަހެއްގެ ގޮތުގައި އޮތް އޮތުން ބަދަލުކުރައްވައި ޗުއްޓީ ދިގުކުރެއްވުމަށް ކަމަށެވެ.
މި އަހަރުގެ ނޮވެމްބަރު 10، ވަނީ އާދިއްތަ ދުވަހަކަށެވެ. ރައީސްގެ ނިންމެވުމާއެކު ނޮވެމްބަރު 8، ވާ ހުކުރު ދުވަހުން ފެށިގެން ޖުމްހޫރީ ދުވަހުގެ ނިޔަލަށް ސަރުކާރު ބަންދުވާނެ އެވެ.
ރާއްޖޭގައި ޖުމްހޫރީ ދުވަސް ފާހަގަކުރަނީ ޒަމާންވީ ރަސްކަމުގެ ނިޒާމަކުން ޖުމްހޫރިއްޔަަތަކަށް 1968 ވަނަ އަހަރު ބަދަލުވުމުންނެވެ. މި އަހަރު ފާހަގަކުރާނީ ރާއްޖޭގެ 55 ވަނަ ޖުމްހޫރީ ދުވަހެވެ.
ނިމިދިޔަ ވެރިކަމާއި މި ވެރިކަން ފިޔަވާ ރާއްޖޭގައި ރައީސްކަން ކުރެއްވި ރައީސުން ވެރިކަމުގެ ހުވާ ކުރެއްވީ ވެސް ޖުމްހޫރީ ދުވަހު އެވެ. ނަމަވެސް ރައީސް މުއިއްޒު އަދި ކުރީގެ ރައީސް އިބްރާހިމް މުހައްމަދު ސޯލިހު ހުވާ ކުރެއްވީ ނޮވެމްބަރު 17، ގަ އެވެ.
