ރާއްޖެއިން ވޭޕް މަނާ ކުރަން ނިންމުމުން، މާލޭގައި ރަޖިސްޓާ ކޮށްގެން ވޭޕް އާއި ވޭޕް ފްލޭވާ ވިއްކާ ހުރިހާ ފިހާރަތަކެއް މިއަދުން ފެށިގެން މުއްދަތެއް ނެތް ގޮތަށް ބަންދުކޮށްފި އެވެ.
"އަދަދު" އަށް އެނގިފައިވާ ގޮތުގައި ވޭޕް ވިއްކާ ފިހާރަތައް ގުޅިގެން ފިހާރަތައް ބަންދުކުރީ ސަރުކާރުން ކުއްލި ގޮތަކަށް އެ ވިޔަފާރި ކުރުން މަނާ ކުރުމުން އެކަމަށް ހައްލެއް ލިބެންދެން ކަމަށް ބުނެ އެވެ.
"މީގައި އެބަހުރި ވަރަށް ބައިވަރު ކޮންސާންސްތައް. ލޯން ނަގައިގެން މި ވިޔަފާރި ކުރާ މީހުން އެބަ އުޅޭ. އެކަށީގެންވާ ވަގުތެއް ވެސް ނުލިބުނު،" ވޭޕް ވިޔަފާރި ކުރާ މީހަކު ބުންޏެވެ.
އޭނާ ބުނީ ފިހާރައަށް ނަގާފައި ތިބި މުވައްޒަފުން ވަކި ކުރަން ފަށަން ވެސް ޖެހޭ ކަމަށާއި އެކަން ވެސް ކުރަން ޖެހޭނީ ވަކި މުއްދަތެއް ތެރޭގައި ކަމަށެވެ.
ބަންދުކުރި ވޭޕް ވިއްކާ ފިހާރަތަކުގެ ތެރޭގައި ނެނޯސްޓިކް މޯލްޑިވްސް، ބްރޯކް އެންޑް ބިޒީ، ޕޮޑް ސޯލްޓް، ސިލްވާ ސްމޯކް އަދި ޕަފް ކްލަބް ހިމެނެ އެވެ.
ރާއްޖެއަށް ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ނޮވެމްބަރު 15، އިން ފެށިގެން އެތެރެ ކުރުން މަނާކޮށް، ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިސްތިހާރު ކުރުމާއި ހިލޭބެހުން ޑިސެމްބަރު 15، އިން ފެށިގެން މަނާ ކުރުމަށް ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ.
އެކަމާ ގުޅިގެން ވޭޕް ވިޔަފާރި ކުރަމުންދާ މީހުން އަންނަނީ ކަންބޮޑުވުން ފާޅުކޮށް، ސަރުކާރުން ކުއްލި ގޮތަކަށް އެފަދަ ނިންމުމެއް ނިންމުމުގެ ކުރިން މަޝްވަރާ ނުކުރުމުން ހިތްހަމަނުޖެހުން ފާޅު ކުރަމުންނެވެ.
ރާއްޖެއިން ވޭޕް މަނާ ކުރަން ނިންމުމާ ގުޅިގެން އާންމުންގެ ހިޔާލު ވަނީ ދެކަފިވެފަ އެވެ. މިގޮތުން، ބައެއް އާންމުން އެކަމަށް ތައުރީފް ކުރަމުން އަންނައިރު، ސަރުކާރަށް ދިން ވަގުތު ކުޑަވުމުން ބައެއް މީހުން އަންނަނީ އެކަމަށް ފާޑު ކިޔަމުންނެވެ.
އޭގެ އިތުރުން ރާއްޖެއިން ހަމައެކަނި ވޭޕް މަނާކޮށް، ދުންފަތުގެ ބާވަތްތައް މަނާ ނުކުރާތީ ވެސް އަންނަނީ ސުވާލު އުފައްދަމުންނެވެ. ސަރުކާރުން ވަނީ ދުންފަތުގެ ބާވަތްތަކުން ޑިއުޓީ ބޮޑު ކުރަން ނިންމާފަ އެވެ.
