ކުރީ ސަރުކާރުން އިންޑިއާއާއެކު ސޮއިކުރި އެއްބަސްވުންތަކުގެ މައްސަލަ ބެލުމަށް ރައްޔިތުންގެ މަޖިލީހުގެ ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އަށް، ހިތަދޫ މެދު ދާއިރާގެ މެންބަރު އަހްމަދު އަޒާން ހުށަހެޅުއްވި މައްސަލަ ކުރިއަށް ނުގެންގޮސް، ބާއްވާފައި އޮންނަތާ ހަތަރު މަހަށް ވުރެ ގިނަ ދުވަސް ވެއްޖެ އެވެ.
އިންޑިއާއާއެކު ހަދާފައިވާ ތިން އެއްބަސްވުމެއްގެ މައްސަލަ 241 ކޮމިޓީގެ ސަބް ކޮމިޓީއެއް އެކުލަވާލައި އިންކުއަރީއެއް ހިންގަން އަޒާން ހުށަހެޅުއްވީ މިދިޔަ ޖޫން މަހު 10 ގައެވެ. އެ ދުވަހު ފާސްކުރީ އިންޑިއާ އާއި ދިވެހިރާއްޖެއާ ދެމެދު ވެފައިވާ ހައިޑްރޯގްރަފީ އެއްބަސްވުމުގެ ކަންކަމާއި، އުތުރު ތިލަފަޅު އެއްބަސްވުމުގެ ޕްރޮސެސް ހިނގާފައިވާ ގޮތް ބެލުމަށް އަދި ޑޯނިއާ މަތިންދާބޯޓުގެ އެއްބަސްވުމުގެ ކަންކަން ބެލުމަށެވެ.
ރައްޔިތުންގެ މަޖިލީހުގައި ޕީއެންސީ ތަމްސީލްކުރައްވާ ބައެއް މެންބަރުން އަދަދު ނޫހަށް ވިދާޅުވީ އެ މައްސައިގެ އެއްވެސް މަސައްކަތެއް، އިތުރު ބައްދަލުވުމެއް ވެސް ކުރިއަށް ނުގެންގޮސް ބާއްވާފައި އޮތީ، ސަރުކާރުގެ އެންމެ މަތިންނާއި ޕާޓީގެ ލީޑަޝިޕުން އެ މައްސަލަތައް ކުރިއަށް ނުގެންދަން އިރުޝާދު ދީފައި އޮތުމުންނެވެ.
"އެ ނޫންނަމަ މިހާ ދުވަސްވާއިރު އެ މައްސަލަތައް ބަލާނެ ދެއްތޯ. އެހެން ކަންކަން ވެސް އެދަނީ ނިންމަމުން، ބަދަލުވެސް ކުރަމުން" މެންބަރަކު ވިދާޅުވި އެވެ.
އޭނާ އިޝާރާތް އެ ކުރެއްވީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ރަސްމީގެ، މުރައިދޫގޭގެ މުވައްޒަފުންގެ މައުލޫމާތު ހާމަ ކުރަން ނުފެންނަ ކަމަށް ސަލާމަތީ ހިދުމަތްތަކާ ބެހޭ ކޮމިޓީން ނިންމިތާ ގަޑިއިރު ތަކެއް ފަހުން، އެ މައުލޫމާތު ހާމަކުރަން ކޮމިޓީން ނިންމި ނިންމުމަށެވެ.
އެކަން އެގޮތަށް ބަދަލުކުރީ ރައީސް ޑރ. މުހައްމަދު މުއިއްޒުގެ އިރުޝާދަށް ކަމަށް، ކޮމިޓީގެ ބައެއް މެންބަރުން ވިދާޅުވި އެވެ.
އިންޑިއާގެ އެއްބަސްވުންތަކާ ގުޅޭ ގޮތުން އަދަދު ނޫހަށް ކުރިން ވާހަކަ ދެއްވި ބައެއް މެންބަރުން ވިދާޅުވީ އެ މައްސަލަ ޕާކުކޮށްފައި އޮތީ ރައީސް މުއިއްޒު އަންގަވައިގެން ކަމަށެވެ. އަދި އެ މައްސަލަ އަޒާން ހުށަހެޅުއްވުމުން ވެސް ރައީސް މުއިއްޒު ކޯފާވިކަން ވެސް ބައެއް މެންބަރުން ވިދާޅުވި އެވެ.
ރިޔާސީ އިންތިހާބުގައި ދިވެހި ރައްޔިތުން ރައީސް ޑރ. މުހައްމަދު މުއިއްޒަށް ވޯޓު ދެއްވި އެންމެ ބޮޑު އެއް ސަބަބަކީ ދިވެހިރާއްޖޭގެ މިނިވަންކަމާއި އިސްތިގުލާލު ކަށަވަރުކުރުމަށްޓަކައި އަދި މިނިވަންކަމަށް އުނިކަން އަންނަ ގިނަ ކަންތައްތަކެއް ހިނގާފައި ހުރިކަން ރައްޔިތުންނަށް ގަބޫލުކުރެވިގެން ކަމަށް ކޮމިޓީގެ ބައްދަލުވުމެއްގައި އަޒާން ވިދާޅުވެފައިވެ އެވެ.
"އަޅުގަނޑުމެން މި ކޮމިޓީގެ އެންމެ ބޮޑު އެއް ޒިންމާއަކަށްވާން ޖެހޭނީ އަޅުގަނޑުމެން އޭރު ދެއްކި ވާހަކަތައް، ސަރުކާރު ހޯދަން އަޅުގަނޑުމެން ދެއްކި ވާހަކަތައް އަޅުގަނޑުމެން އެބަޖެހޭ ބަލައި ތަހުގީގުކުރަން،" އޭނާ ވިދާޅުވި އެވެ.
"ދިވެހިރާއްޖޭގެ މިނިވަންކަމާއި އިސްތިގުލާލަށް އަސަރުކުރާފަދަ ކަންތައްތަކެއް ހިނގާފައި ހުރިކަން އެއީ އެނގޭ ކަމެއް. އެހެންވީމ،ާ މި ކޮމިޓީނ،ް ގާނޫނުއަސާސީން މި ކޮމިޓީއަށް ދީފައި މި އޮތް ބާރު ބޭނުން ކޮށްގެން އަޅުގަނޑުމެން އެބަޖެހޭ މި ކަންތައްތައް ތަހުގީގުކުރަން."
އަޒާން ހުށަހެޅުއްވި މައްސަލަ ކުރިއަށް ގެންދިޔުން ހުއްޓުވާފައި ވާއިރު، އިންތިހާބުގައި ރައީސް މުއިއްޒު އާއި ޕީޕީއެން/ޕީއެންސީން އިންޑިއާއާ ގުޅޭ ގޮތުން ދެއްކި އެއްވެސް ވާހަކައެއް އަދި ތަންފީޒެއް ނުކުރެ އެވެ.
އިންޑިއާގެ ހެލިކޮޕްޓަރާއި ޑޯނިޔާ މަތިންދާ ބޯޓެއް ފޮނުވައެއް ނުލަ އެވެ. ހަމައެކަނި ކުރި ކަމަކީ އެ އުޅަނދުތައް ދުއްވަން އަސްކަރީ ޔުނިފޯމުގައި ތިބި މީހުންގެ ބަދަލުގައި، އިންޑިއާގެ ހިންދުސްތާން އޭރޮނެޓިކްސް ކުންފުނީގެ އެއްބަސްވުމުގައި ތިބި އިންޑިއާ މީހުން ގެނައުމެވެ.
