މި ސަރުކާރުގެ ސިޔާސީ މަގާމުތަކާއި، ސަރުކާރުގެ ކުންފުނިތަކަށް 7،000 އަށްވުރެ ގިނަ މުވައްޒަފުން ނެގިކަން، އެ މައުލޫމާތު އެނގޭ މަސްދަރަކުން ވިދާޅުވެއްޖެ އެވެ.
އަދަދު ނޫހާ ވާހަކަ ދެއްކި މީހާ ވިދާޅުވި ގޮތުގައި، ސިޔާސީ މުވައްޒަފުންގެ ގޮތުގައި 2،000 އާ ގާތްކުރާ އަދަދަށް މީހުން ނަގާފައި ވާއިރު، މި ސަރުކާރު ވެރިކަމާ ހަވާލުވުމަށް ފަހު ކުންފުނިތަކުން 5,000 ވަޒީފާ ދީފައިވެ އެވެ.
ރައްޔިތުންގެ މަޖިލިސް އިންތިހާބާ ދިމާކޮށް ޕީއެންސީން ކުރިމަތިލި ކޮންމެ ކެންޑިޑޭޓަކަށް ވެސް އެވްރެޖުކޮށް 40 ވަޒީފާ ދީފައިވާ ކަމަށް މައުލޫމާތު ދިން ފަރާތުން ވިދާޅުވި އެވެ. މެންބަރުން އެދިވަޑައިގަންނަވާ މީހުންނަށް ގިނައިން ވަޒީފާ ދީފައި ވަނީ ކުންފުނިތަކުންނެވެ.
އެންމެ ގިނަ ވަޒީފާ ދީފައި ވަނީ ފެނަކައިން ކަމަށާއި އެ ކުންފުނިން މަޖިލީހުގެ އިންތިހާބާ ދިމާކޮށް 1800 ވަޒީފާ ދީފައިވާއިރު، އެހެން ކުންފުނިތަކުން 3800 އެއްހާ ވަޒީފާ ދީފައިވާ ކަމަށް، މައުލޫމާތު ދިން ފަރާތުން ވިދާޅުވި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހުށަހެޅުމުން ވެސް ސިޔާސީ މުވައްޒަފުންގެ އަދަދެއް ހާމައެއް ނުކުރެ އެވެ.
ސިޔާސީ މުވައްޒަފުން ގިނަވެ، އަދި ސަރުކާރުގެ ހަރަދު މެނޭޖު ނުކުރެވުމުގެ ސަބަބުން ސިޔާސީ 228 މުވައްޒަފުން ވަކި ކުރަން ރައީސް މިއަދު ވަނީ ނިންމަވައިފަ އެވެ.
ސަރުކާރުން ވަކިކުރަން ނިންމި ސިޔާސީ މުވައްޒަފުންގެ ތެރޭގައި ހަތް ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، ސީނިއާ ޕޮލިޓިކަލް ޑިރެކްޓަރުންނާއި، 69 ޕޮލިޓިކަލް ޑިރެކްޓަރުން ހިމެނެ އެވެ.
ސަރުކާރުން ބުނާ ގޮތުގައި އެ މުވައްޒަފުން ވަކި ކުރުމުން މަހެއްގެ މައްޗަށް ދައުލަތުގެ ބަޖެޓުން 5.71 މިލިއަން ރުފިޔާ ސަލާމަތްވާނެ އެވެ.
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންއިރު ވިދާޅުވީ ސަރުކާރުގެ ސިޔާސީ މުވައްޒަފުންގެ އަދަދު 700 އަށްވުރެ އިތުރު ނުވާނެ ކަމަށެވެ. އެހެންވެ، އިންތިހާބަށް މުވައްޒަފުން އިތުރުކުރުމުން ކުންފުނިތަކަށް ވަނީ މާލީ ދަތިކަން ކުރިމަތިވެފަ އެވެ.
