ގާހިރާ، މިސްރު (އޮކްޓޫބަރު 13) - އެފްރިކަން ކަޕް އޮފް ނޭޝަންސްގައި މިސްރުން ދެން ކުޅެން އޮތް މެޗު އާޓިފިޝަލް ޓާފެއްގައި ކުޅެން ޖެހޭތީ އާއި އެކި ކަހަލަ ސަލާމަތީ ސަބަބުތަކަށް ބަލައިފައި، އެ ޓީމުގެ ކެޕްޓަން، މުހައްމަދު ސަލާހު ޓީމުން ވީއްލަން މިސްރުން ނިންމައިފި އެވެ.
އެފްރިކަން ކަޕް އޮފް ނޭޝަންސް ކޮލިފައިން ފުރަތަމަ ލެގުގައި، ހުކުރު ދުވަހު މޮރިޓާނިއާ އަތުން މިސްރު ވަނީ 2-0 އިން މޮޅުވެފަ އެވެ. އެ މެޗުގައި ސަލާހު ލަނޑު ވެސް ޖެހި އެވެ. އަންގާރަ ދުވަހު، ދެ ވަނަ ލެގުގައި، މޮރިޓާނިއާ ދަނޑުގައި ކުޅޭއިރު، އެ މެޗުގެ ކުރިން ސަލާހު މި ވަނީ ޓީމު ކޭމްޕުން ވީއްލައިފަ އެވެ.
މިސްރުގެ މީޑިއާތަކުން އެ ޓީމުގެ ކޯޗު، ހޮސާމް ހަސަންއާ ހަވާލާދީފައި ބުނެފައިވަނީ، މޮރިޓާނިއާ އިން އިންޓަނޭޝަނަލް މެޗުތައް ކުޅޭ އާޓިފިޝަލް ޓާފް ދަނޑުގެ ހާލަތު މި ވަގުތު ހުރި ގޮތުން، އަނިޔާވުމުގެ ފުރުސަތު އޮތުމާ އެކު، ސަލާހު ޓީމުން ވީއްލީ ކަމަށެވެ.
މި ނިންމުމާ އެކު، ސަލާހު، ލިވަޕޫލްގެ ކޭމްޕާ ގުޅޭނެ އެވެ. އޭނާގެ އިތުރުން، ލިވަޕޫލްގެ ކެޕްޓަން، ވާޖިލް ވެން ޑައިކް ވެސް އަވަހަށް ޓީމާ ގުޅޭނެ އެވެ. އެއީ، ނޭޝަންސް ލީގުގައި ހަންގޭރީއާ އެއްވަރުވި މެޗުގައި ވެން ޑައިކް އަށް ވަނީ ރަތް ކާޑެއް ދައްކައިފަ އެވެ. އެހެންވެ، ދެން އޮތް މެޗަށް ވެން ޑައިކް ސަސްޕެންޑްވެފައިވާތީ، ނެދަލެންޑްސް އިން ނިންމީ އޭނާ ރިލީސްކުރުމަށެެވެ.
