ރާއްޖޭގެ ކުރީގެ ބޮޑުވަޒީރު އަދި ކުރީގެ މަޖިލިސް ރައީސް ސުމުއްވުލް އަމީރު އަލްމަރުހޫމް އިބްރާހީމް ފާމުދޭރި ކިލެގެފާނުގެ ދަރިކަނބަލުން ހ. އެއްގަމުގެއާގެ އައްނަބީލާ ހަދީޖާ އިބްރާހީމް ދީދީ, 68 ނިޔާވުމުން ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.
ރައީސް މުއިއްޒު "އެކްސް" ގައި ކުރެއްވި ޕޯސްޓެއްގައި, އެކަމަނާ ރާއްޖޭގެ ތައުލީމީ ދާއިރާ އާއި، އަންހެނުންނަށް ކުރިއެރުމާއި ފުރުސަތުތައް ފަހިކޮށްދިނުމުގެ ދާއިރާ އާއި، ހާރިޖީ ގުޅުންތަކުގެ ދާއިރާގައި ވެސް ސަރުކާރަށް ހިދުމަތް ކުރައްވާފައިވާ ކަން ފާހަގަކުރެއްވި އެވެ.
"އައްނަބީލާ ޚަދީޖާ އިބްރާހީމް ދީދީ އަވަހާރަވުމުގެ ހިތާމައިގާ ބައިވެރިވެ، މަރުޙޫމާގެ ޢާއިލާއަށް ތަޢުޒިޔާ ދަންނަވަން،" ރައީސް ވިދާޅުވި އެވެ.
"އަދަދު" އަށް މައުލޫމާތު ލިބިފައިވާ ގޮތުގައި ހަދީޖާ އިބްރާހީމް ދީދީ އަވަހާރަވީ އައިޖީއެމްއެޗް ހޮސްޕިޓަލުގަ އެވެ. ކަށުނަމާދު އޮތީ މައުރިބު ނަމާދަށް ފަހު އާސަހަރާގަ އެވެ.
