ސަރުކާރު ހޮސްޕިޓަލްތަކުގައި މަސައްކަތް ކުރާ ޑޮކްޓަރުން އަމިއްލަ ކްލިނިކްތަކުގެ ވަޒީފާއަށް ދިޔުމާ ގުޅޭ ގަވާއިދެއް ހަދަައި އެއަށް އަމަލު ކުރަންޖެހޭ ކަމަށް އެންޓި ކޮރަޕްޝަން ކޮމިޝަނުން މިއަދު ބުނެފި އެވެ.
ވެލްފެއާ ނިޒާމުގެ މައްސަލަތައް ބެލުމަށްފަހު މިއަދު އޭސީސީއިން ނެރުނު ބަޔާނެއްގައި ވަނީ ނިޒާމު ހަރުދަނާ ކުރަން ޖުމުލަ 20 ލަފަޔެއް ދީފަ އެވެ. އޭގެ ތެރޭގައި އެންމެ މުހިންމު އެއް ކަންތައް ގޮތުގައި ފާހަގަ ކުރެވެނީ ސަރުކާރު ހޮސްޕިޓަލްތަކުގައި މަސައްކަތް ކުރާ ޑޮކްޓަރުން ޕްރައިވެޓް ކްލިނިކްތަކަށް ދިޔުމުގެ ގަވާއިދެއް ހަދަން ދިން ލަފަ އެވެ.
އާސަންދައިން ދައުލަތުގެ ބަޖެޓަށް ކުރާ އަސަރު ކުޑަ ކުރުން މުހިންމު ކަމަށް ފާހަގަކޮށް އޭސީސީއިން ބުނެފައި ވަނީ، އެންމެ ފުރިހަމައަށް އާސަން ދެވޭނެ ގޮތުގެ ދިރާސާއެއް ކޮންމެހެން ވެސް ހަދަންޖެހޭ ކަމަށެވެ. އަދި އެންމެ އަގުބޮޑުކޮށް ބޭސް ވިއްކޭނެ އަގާއި އެންމެ އަގުބޮޑުކޮށް ހިދުމަތް ދެވޭނެ އަގު ވެސް ކަނޑައަޅަންޖެހޭނެ ކަމަށް އޭސީސީއިން ބުނެ އެވެ.
އޭގެ އިތުރުން، ޑޮކްޓަރުންނާއި ބޭސް ބޭނުން ކުރުމާއި ހިދުމަތް ދިނުމުގެ ކްލިނިކަލް އަދި ޕްރެކްޓިސް ގައިޑްލައިންތަކެއް ހަދަންޖެހޭ ކަމަށް ވެސް އޭސީސީއިން ބުނެ އެވެ. އަދި ވެލްފެއާ ނިޒާމު ހަރުދަނާ ކުރަން ގާނޫނީ އޮނިގަނޑު ހަރުދަނާ ކުރަންޖެހޭ ކަމަށް ވެސް އެ ކޮމިޝަނުން ބުނެ އެވެ.
އޭސީސީއިން ފާހަގަ ކުރި މައްސަލަތަކުގެ ތެރޭގައި، އެންސްޕާއިން އެހީ ދޫކުރުމުގައި ހަމަހަމަކަން ނެތުމާއި ކުންފުނިތަކަށް އާސަންދައިން ފައިސާ ދޫކުރުމުގައި ކޮރަޕްޝަނަށް މަގުފަހިވާނެ ފަދަ ގޮތަކަށް އަމަލު ކުރުން ހިމެނެ އެވެ. އަދި ވެލްފެއާ ނިޒާމުގެ ގާނޫނީ އޮނިގަނޑު ހަރުދަނާނުވުމުގެ ސަބަބުން ނަޒާހާތްތެރިކަން ކަށަވަރުނުވާ ކަމަށް އޭސީސީން ބުނެ އެވެ.
އެންސްޕާ އާއި އާސަންދައިން ފައިސާ ދޫކުރާއިރު، ފައިސާ ދޫކުރެވެނީ ހޯދާފައިވާ ހިދުމަތަށްކަން ކަށަވަރުނުވާ ކަމަށް ވެސް އޭސީސީއިން ބުނެ އެވެ. އަދި ބުނެފައި ވަނީ ސިއްހީ ވެލްފެއާ ނިޒާމު ވަށައިޖެހޭނެ ގޮތަށް ޒިންމާދާރު ކުރެވޭނެ ވަކި މީހަކު ނެތުމަކީ ވެސް މައްސަލައެއް ކަމަށެވެ.
