މިހާރު ރާއްޖެއަށް ކުރަމުންދާ ވިއްސާރާގައި ވައި ގަދަވެ ވެލާނާ އިންޓަނޭޝަނަލް އެއާޕޯޓަށް ދަތުރުކުރާ ފުލައިޓުތައް ޖެއްސުމުގައި ދަތިތަކެއް ކުރިމަތިވެއްޖެ އެވެ.
ހުޅަނގު މޫސުމުގެ ބާރު ގަދަވެ ކުރަމުންދާ ވިއްސާރައާ ގުޅިގެން މޫސުމާ ބެހޭ ގައުމީ އިދާރާ (މެޓު އޮފީސް) އިން މިހާރުވެސް ރާއްޖޭގެ ބޮޑު ސަރަހައްދަކަށް ވަނީ ޔެލޯ އެލާޓު ނެރެފަ އެވެ. މާލެ ސަރަހައްދު ހިމެނޭހެން ނެރުނު މި އެލާޓުގައި 50 މޭލާ ހަމައަށް ވައި ގަދަވާނެ ލަފާކޮށްފައިވެ އެވެ.
ވައިގެ އުޅަނދުތައް ޓްރެކްކުރާ ސައިޓުތަކާއި ފުލައިޓު ޝެޑިއުލްތައް ދައްކާގޮތުން މިހާރުވެސް ވީއައިއޭއަށް ނުޖެއްސި ގިނަ ފުލައިޓުތައް ދަނީ އެނބުރެމުންނެވެ. އޭގެ ތެރޭގައި ސިންގަޕޫރު، ކޮލަމްބޯ، މުމްބާއީ، އަދި ބެންކޮކް އިން ދަތުރުކުރި ފުލައިޓުތައް ހިމެނެ އެވެ.
ސިންގަޕޫރު އެއާލައިންސްގެ އުޅަނދެއް ވީއައިއޭގައި ނުޖެއްސިގެން އެނބުރެނީ --- ފޮޓޯ: ފުލައިޓު ރާޑަރު
މީގެއިތުރުން މިއަދު އިންޑިއާގެ ކޮޗިން އިން ހުޅުލެއަށް ދަތުރުކުރި އިންޑިގޯގެ ފުލައިޓެއް ނުޖެއްސި މިހާރު ދަނީ އެނބުރި އެ ގައުމަށް ދަތުރުކުރަމުންނެވެ.
އާންމުކޮށް ވިއްސާރަ ދުވަސްވަރު ފުލައިޓުތައް ޑިލޭ ވުމުގެ އިތުރުން ވީއައިއޭގެ އޮޕަރޭޝަނަށްވެސް އަސަރުކުރެ އެވެ. ނަމަވެސް މިއަދު އެފަދަ ހާދިސާއެއް ހިނގިކަން އެނގިފައެއް ނުވެ އެވެ.
މެޓު އޮފީހުން ލަފާކުރާ ގޮތުގައި ކުރިއަށް އޮތް ހަފުތާ ބަންދުގައިވެސް މޫސުން ގޯސްވާނެ އެވެ. މިއީ ހުޅަނގު މޫސުމުގެ ފަހު ދުވަސްވަރުގެ ވިއްސާރައެއް ކަމަށްވެސް މޫސުމާ ބެހޭ އިދާރާއިން ބުނެފައިވެ އެވެ.
