އިންޑިއާއަށް މިހާރު ކުރައްވަމުން ގެންދަވާ ދަތުރަކީ ރާއްޖޭގެ އިގުތިސާދު ކޮޅަށް ޖެހުމަށް ކުރަމުންދާ މަސައްކަތަށް ވަރަށް ބޮޑު ކުރިއެރުމެއް ލިބުނު ދަތުރެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އިންޑިއާގެ ބެންގަލޫރުގައި ދިރިއުޅޭ ދިވެހިންނާ ބައްދަލު ކުރައްވައި ވާހަކަ ދައްކަވަމުން ރައީސް ރޭ ވިދާޅުވީ މި ސަރުކާރާ ވަރިކަން ހަވާލުވީ ވަރަށް ބޮޑު ދަރަންޏަކާ އެކުގައި ކަމަށެވެ. ނަމަވެސް ފާއިތުވި 11 ވަރަކަށް މަސްދުވަހު، އިތުރު ދަރަންޏެއް ނުނަގައި ކުރަމުންދާ މަސައްކަތަށް މި ދަތުރު ވަރަށް ބޮޑު ކުރިއެރުމެއް ލިބުނު ކަމަށެވެ.
"އެހެންވީމާ އެ ދަރަނި، އަޅުގަނޑުމެން އެ ދުވަހުން ފެށިގެން މިއަދާ ހަމައަށް މި ގާތްގަނޑަކަށް 11 ވަނަ މަސް މި ހިނގަނީ، ވާއިރު، އަޅުގަނޑުމެން ނެގި މިކަހަލަ އެއްވެސް ދަރަންޏެއް ނެތި، އެ ދަރަނި ދެއްކުމަށްޓަކައި އެހައިތަނަށް އަޅުގަނޑުމެންނާ ހަވާލުވިއިރުގައި އިގުތިސޯދު ކޮޅަށް ޖެހުމަށްޓަކައި ކުރެވޭ މަސައްކަތްތަކުގައި ވެސް ވަރަށް ބޮޑު ކުރިއެރުމެއް މި ދަތުރުން ލިބިގެން މި ދިޔައީ،" ރައީސް ވިދާޅުވި އެވެ.
އިންޑިއާއަށް މިހާރު ރައީސް ކުރައްވަމުން ގެންދަވާ ރަސްމީ ދަތުރުގެ ތެރެއިން، އިންޑިއާއިން ވަނީ ރާއްޖެއަށް 400 މިލިއަން ޑޮލަރާއި 30 ބިލިއަން ރުޕީސްގެ ކަރަންސީ ސްވޮޕް ފެސިލިޓީއެއްގައި ސޮއިކޮށްފަ އެވެ.
އޭގެއިތުރުން ރާއްޖޭގެ ބަންކަރިން ހިދުމަތް ތަރައްގީ ކުރުމަށާއި ވިޔަފާރި ބަނދަރު ތިލަފުށްޓަށް ބަދަލު ކުރަން އެހީވެދޭން އިންޑިއާއިން ވަނީ ނިންމައިފަ އެވެ.
އަދި، އިންޑިއާގެ ރުޕޭ ކާޑު ރާއްޖޭގައި ބޭނުން ކުރެވޭ ގޮތް ހެދުމުގެ އިތުރުން އެގައުމުގެ އެހީގައި ރާއްޖޭގައި އެގްރިކަލްޗާ އިކޮނޮމިކް ޒޯނަކާއި މަސް ފެކްޓްރީއެއް އަޅަން ވެސް ވަނީ މި ދަތުރުގެ ތެރެއިން އެއްބަސްވެފަ އެވެ.
ރޭގެ ވާހަކައިގައި ރައީސް ވިދާޅުވީ އިންޑިއާގެ އިސްވެރިންނާ ކުރެވުނު މަޝްވަރާތަކުގެ ތެރެއިން ރާއްޖޭގެ އިގުތިސާދު ފުޅާ ކުރުމުގެ މަގުތަކެއް ފަހިވެގެންދިޔަ ކަމަށެވެ.
"ތަރައްގީގެ މަގުގައި ގެދޮރު ބިނާކުރުން އުމުރާނީ ތަރައްގީގެ ދާއިރާއިން އެކި ކަންކަން އަޅުގަނޑުމެންގެ އިގުތިސޯދު ފުޅާކުރުމަށްޓަކައި ޓޫރިޒަމާއި އެގްރިކަލްޗާ، މަސްވެރިކަން މިހެން ގޮސް ވަރަށް ގިނަ ދާއިރާތަކަށް އިންވެސްޓުމެންޓު ގެނައުމާއި އަދި އެހީތެރިކަން، އެކި ކަހަލަ ލުއި ގޮތްގޮތަށް އެހީތެރިކަން ލިބޭނެ މަގުތައް ފަހިކުރުން،" ރައީސް ވިދާޅުވި އެވެ.
އިންޑިއާއަށް ކުރައްވާ ރަސްމީ ދަތުރު ނިންމަވައިލުމަށްފަހު މިއަދު ރައީސް ރާއްޖެ ވަޑައިގަންނަވާނެ އެވެ. އިންޑިއާއަށް ރައީސް ވަޑައިގެން އުޅުއްވަނީ 50 މީހުންގެ ވަފުދަކާ އެކު އެވެ.
