ރާއްޖެއިން ބޭނުންވި ކޮންމެ ހާލަތެއްގައި އެންމެ އެހީތެރިވެދިން ގައުމަކީ އިންޑިއާ، އެއީ ހަގީގަތް: ރައީސް

ދިވެހިރާއްޖެއަށް ބޮޑުވެގެންދިޔަ ކޮންމެ ހާލަތެއްގައި އެންމެ އެހީތެރިވެދިން ގައުމަކީ އަވައްޓެރި އިންޑިއާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބުދަ ދުވަހު ވިދާޅުވެއްޖެ އެވެ.

އިންޑިއާގެ، ބެންގަލޫރުގައި ދިރިއުޅޭ ދިވެހިންނާ ވާހަކަ ދައްކަވަމުން ރައީސް ވިދާޅުވީ، އިންޑިއާ އާއި ރާއްޖެއަކީ "އެތައް ގަރުނެއްގެ ގާތް ގުޅުމެއް" އޮތް ދެ ގައުމު ކަމަށެވެ. އަދި ވިދާޅުވީ، ރާއްޖެއިން އެހީތެރިކަމަށް ބޭނުންވި ކޮންމެ ހާލަތެއްގައި ވެސް އެންމެ އެހީތެރިވެދިނީ އިންޑިއާއިން ކަމަށެވެ.

"އަޅުގަނޑުމެންނަށް ބޮޑުވެގެން ދިޔަ ކޮންމެ ހާލަތެއްގައި، އަޅުގަނޑުމެންނަށް އެހީތެރިކަން ބޭނުންވި ކޮންމެ ވަގުތެއްގައި، އެންމެ ފުރަތަމަ އިސްކަން ދިން އެއް ގައުމަކަށް ވާނީ އަދި ބައެއް ފަހަރު އެންމެ ފުރަތަމަ އިސްކަން ދިން ގައުމަކަށް ވެސް ވަނީ އިންޑިއާ. މިއީ ހަގީގަތް," ރައީސް މުއިއްޒު ވިދާޅުވި އެވެ.

ރައީސް މުއިއްޒުގެ ހާރިޖީ ސިޔާސަތު ބަދަލު ކުރައްވާފައިވާ ކަމަށް ބުނެ އާންމުން ކިޔާ ފާޑުކިޔުމަށް ރައްދު ދެއްވަމުން އެމަނިކުފާނު ބުދަ ދުވަހު ވިދާޅުވީ، މިހާރު ވެސް ތަންފީޒު ކުރައްވަމުން ގެންދަވަނީ ކެމްޕެއިނުގައި ވެސް އިއުލާނު ކުރެއްވި ސިޔާސަތު ކަމަށެވެ.

"އަޅުގަނޑު މަސައްކަތް ކުރާ ގޮތް ފެންނާނެ. ދައްކާ ވާހަކައާ އެއްގޮތަށް ހާރިޖީ ސިޔާސަތު މި ގެންދަނީ. އިންޑިއާއަކީ އަޅުގަނޑުމެންނާ ވަރަށް ގާތް ގުޅުމެއް އޮތް ގައުމެއް. ޒަމާންވީ، އެތައް ގަރުނެއްގެ ގާތް ގުޅުމެއް އޮތް ގައުމެއް،" ރައީސް ވިދާޅުވި އެވެ.

ރައީސް މުއިއްޒު އިންޑިއާއަށް ކުރައްވަމުން ގެންދަވާ ދަތުރުގެ ތެރެއިން ވަރަށް ގިނަ، މުހިންމު ކަންކަން ވަނީ ހަމަޖެހިފަ އެވެ. އެގޮތުން އިންޑިއާގެ އިތުރު އަަސްކަރީ އުޅަނދުތަކެއް ރާއްޖެއަށް ގެނައުމާއި އުތުރުތިލަފަޅުގައި އިންޑިއާއިން އަޅާ އަސްކަރީ ބަނދަރު ހަދަން ފުރިހަމަ އެއްބާރުލުން ދިނުމާއި ދިވެހި ސިފައިންނަށް މާލީ އެހީތެރިކަން ދިނުމާއި ސިފައިންނާއި ފުލުހުން އިންޑިއާގެ އެހީގައި ތަމްރީނު ކުރުން ހިމެނެ އެވެ.

ރައީސްގެ ދަތުރު ނިންމާލެއްވުމަށްފަހު މިއަދު މާލެ ވަޑައިގަންނަވާނެ އެވެ. އެމަނިކުފާނު ހިމެނޭ ގޮތަށް 50 މީހުންގެ ވަފުދަކާއެކު ރައީސް މުއިއްޒު އިންޑިއާއަށް ވަޑައިގެންނެވީ މިދިޔަ އާދީއްތަ ދުވަހެވެ. އެ ދަތުރުގައި އިންޑިއާގެ ރައީސް ދްރޫޕާދީ މުރްމުރް އާއި ބޮޑުވަޒީރު ނަރެންދުރަ މޯދީއާ ބައްދަލު ކުރެއްވި އެވެ. އަދި އިންޑިއާގެ ވެރިކަން ކުރާ ޕާޓީ ބީޖޭޕީގެ އިސްވެރިންނާ ވެސް ރައީސް ބައްދަލު ކުރެއްވި އެވެ.