ބޮލީވުޑުން ދިވެހިރާއްޖޭގައި ފިލްމު އުފައްދަން އެދިވަޑައިގަންނަވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ރައީސް މުއިއްޒު އިންޑިއާއަށް ކުރައްވާ ރަސްމީ ދަތުރުގައި މުމްބާއީގައި ބޭއްވި ބިޒްނަސް ފޯރަމްގައި ވާހަކަ ދައްކަވަމުން ވިދާޅުވީ މުސްތަގުބަލުގައި ރާއްޖޭގެ ރީތިކަން ބޭނުންކޮށްގެން ބޮލީވުޑުން ފިލްމްތައް ރާއްޖޭގައި އުފައްދަން އެމަނިކުފާނު އެދިވަޑައިގަންނަވާ ކަމަށެވެ.
"އިންޑިއާ ފަތުރުވެރިން ތަފާތު ތަޖުރިބާތައް އަންނަނީ ހޯދަމުން. އެގޮތުން އިކޯޓޫރިޒަމް، ވެލްނެސް ޓޫރިޒަމް، އަދި މައިސް ޓޫރިޒަމް އަދި ފިލްމް ޓޫރިޒަމް ފަދަ ދާއިރާތަކުގެ ޑިމާންޑްތައް ފުއްދުމަށް އަޅުގަނޑުމެން މިތިބީ ތައްޔާރަށް. ބޮލީވުޑް ފިލްމްތައް ރާއްޖޭގެ ރީތިކަން ބޭނުން ކޮށްގެން ފިލްމް އުފައްދަން ހުށަހަޅަން،" ރައީސް ވިދާޅުވި އެވެ.
ރައީސް މުއިއްޒު ވިދާޅުވީ ރާއްޖެއަކީ އިންޑިއިން ޒިޔާރަތްކުރާ ފަތުރުވެރިންނަށް އަގުހުރި ތަނެއް ކަމަށާއި އާދަޔާ ހިލާފު ރަނގަޅު ތަޖުރިބާތައް ފޯރުކޮށް ދިނުމަށް އެކި މަސައްކަތްތަކެއް ކުރަމުންދާ ކަމަށެވެ.
އެގޮތުން ވެލާނާ އިންޓަނޭޝަނަލް އެއާޕޯޓާއި ހަނިމާދޫ އިންޓަނޭޝަނަލް އެއާޕޯޓް އަންނަ އަހަރު ނިމުމާއެކު، ރާއްޖެއަކީ މި ސަރަހައްދުގެ އެންމެ ބޮޑު ޓްރެވެލް ހަބަށް ވެގެންދާނެ ކަމަށް ވެސް ރައީސް ވިދާޅުވި އެވެ.
ރާއްޖެއަށް މި އަހަރު އެކަނި ވެސް ލައްކައެއްހާ އިންޑިއާ ފަތުރުވެރިން ޒިޔާރަތް ކޮށްފައިވާކަން ފާހަގަކުރައްވާ ރައީސް މުއިއްޒު ވިދާޅުވީ އެއަށްވުރެ ފަތުރުވެރިންގެ އަދަދު އިތުރު ކުރެވޭނެ ފުރުސަތު އޮތުމުން، އެކަމަށް މަަސައްކަތް ކުރާނެ ކަމަށވެެ.
ރައީސް މިހެން ވިދާޅުވެފައިވާއިރު، އެމަނިކުފާނުގެ ވެރިކަން ފެށިގެން ކުރީކޮޅު ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސްކޮށް ސޯޝަލް މީޑިއާގައި ވާހަކަ ދެއްކުމުން އިންޑިއާގެ ފިލްމީ ތަރިން ހިމެނޭ ގޮތަށް ގިނަ ބަޔަކު ރާއްޖެ ބޮއިކޮޓް ކުރުމުގެ ކެމްޕެއިނެއް ފެށި އެވެ.
ނަމަވެސް ސަރުކާރުން ވަނީ އެ ޑެޕިއުޓީ މިނިސްޓަރުން ފަހުން ސަސްޕެންޑުކޮށް، އިންޑިއާ އާއި ރާއްޖެއާ ދެމެދު އޮތް ގުޅުން ރަނގަޅު ކުރަން މަސައްކަތް ކޮށްފަ އެވެ. އެ ގުޅުން އިތުރަށް ރަނގަޅުވީ ރައީސް އިންޑިއާއަށް ކުރައްވާ ދަތުރުފުޅުގަ އެވެ.
ރައީސް އިންޑިއާއަށް ވަޑައިގެންނެވުމުގެ ކުރިން މޯދީއަށް ކުޑައިމީސްކޮށް ސޯޝަލް މީޑިއާގައި ވާހަކަ ދެއްކި ޑެޕިއުޓީ މިނިސްޓަރުން ވަނީ މަގާމުން އިސްތިއުފާ ދީފަ އެވެ.
