ސޯޝަލް މީޑިއާގައި ރައީސް ޑރ. މުހައްމަދު މުއިއްޒު އަވަހާރަކޮށްލާނެ ކަމަށް ބުނެ އިންޒާރުދިން މައްސަލައިގައި މީހަކު ރޭ ހައްޔަރުކޮށްފި އެވެ.
ފުލުހުން ބުނީ މި މައްސަލާގައި ހައްޔަރުކުރީ މާލެ، ގ. ސަންސަންގެއާގެ، އަބްދުﷲ މިޔާދު، 40، ކަމަށެވެ. އޭނާ ހައްޔަރުކުރީ ބޭރު ގައުމެއްގައި ހުރުމަށްފަހު ރޭ އެނބުރި މާލެ އައުމުންނެވެ.
ރައީސް މުއިއްޒުގެ އިތުރުން ވެސް ދައުލަތުގެ އެކި އިސްވެރިންނާއި އާންމުންގެ ބަޔަކު ވެސް މަރާލާނެ ކަމަށް އަދި އެ ނޫން ވެސް ގޮތް ގޮތުން ގެއްލުންދޭނެ ކަމަށް ބުނެ މިޔާދު އިންޒާރު ދީފައިވާ ކަމަށް ވެސް ފުލުހުން ބުންޏެވެ.
މަރުގެ އިންޒާރުތަކުގެ އިތުރުން މިޔާދު ވަނީ ސޯޝަލް މީޑިއާގައި ހަޑިހުތުރު ބަހުން އެކި ޕޯސްޓުކޮށް އެއްޖިންސުން ގުޅުން ހިންގުމަށް ހިތްވަރުދީފައި ކަމަށް ވެސް ވެ އެވެ.
ރޭ ހައްޔަރުކުރި މިއާދުގެ ބަންދުގެ މުއްދަތާމެދު އަދި ގޮތެއް ނުނިންމަ އެވެ. ނަމަވެސް ފުލުހުން ބުނީ މި މައްސަލަ އިތުރަށް ތަހުގީގުކުރަމުންދާ ކަމަށެވެ.
ރައީސް "މަރާލާނެ" ކަަމަށް ބުނެ މީހަކު ކޮމެންޓު ކުރީ މިދިޔަ މަހު ފަހުކޮޅު އެމަނިކުފާނު އދ. ގެ ގައުމީ އާންމު މަޖިލީހުގެ ހަވާސާގައި ކުރިއަށްދިޔަ އިވެންޓެއްގައި ތަގުރީރު ކުރައްވާ މަންޒަރު ފޭސްބުކް މެދުވެރިކޮށް ގެނެސްދެމުންދިޔަ ލައިވް އެއްގަ އެވެ.
އެ ދަތުރަށްފަހު އެނބުރި މާލެ ވަޑައިގަތުމަށްފަހު ރައީސް މުއިއްޒު މިހާރު ހުންނެވީ ފުރަމާނަ ދަތުރެއްގައި އިންޑިއާގަ އެވެ. އިންޒާރުތަކާ ގުޅިގެން ރައީސްގެ ސަލާމަތީ ކަންކަން ވަރުގަދަ ކުރި ކަމެއް ސިފައިން ހާމައެއް ނުކުރެ އެވެ.
