ސޯޝަލް މީޑިއާ އިންފްލުއެންސާއެއް ގޮތަށް މަޝްހޫރުވެފައިވާ އާސިމް ވަހީދު (ޗިންޗޮން) ކ. މާފުށިން މާވަހަރެއް ކަމަށް ބެލެވޭ އެއްޗެއް މިއަދު ހޮވައިފި އެވެ.
"އަދަދު" އާ ވާހަކަ ދައްކަމުން އާސިމް ބުނީ މާވަަހަރު ފެނުނީ ހެނދުނު 6:30 ހާއިރު މާފުށީ އަތިރިމަތިން ކަމަށެވެ.
"ހެނދުނު 06:30 ހާއިރު ކޮފީއެއް ބޯލައިގެން ބީޗުގައި ހިނގާލާފައި ދަނިކޮށް އޭތި ފެނުނީ. އެ ނަގައިގެން ގޮސް ލޮނު ފެނަށް އަޅާފައި ބާއްވާފައި މިހާރު އެ އޮތީ. ބިޒީކޮށް އުޅޭތީ އެކަމާ އަދި މާ ބޮޑަށް ނޫޅެވޭ. ގެސްޓުންގެ ކަންތައް ނިންމާފައި އެކަމާ އުޅެވޭނީ،" ވޯޓާސްޕޯޓްސްގެ މަސައްކަތުގައި އުޅޭ އާސިމް ބުންޏެވެ.
އާސިމް ވަހީދު (ޗޮން) އަށް ކ. މާފުށިން ފެނުނު މާވަހަރު
އާސިމް ބުނީ މިހާތަނަށް ވެސް އޭތީގެ ބަރުދަނުގައި ހުރީ ކިހާ ވަރެއްތޯ ވެސް ނުބަލާ ކަމަށާއި ރަހުމަތްތެރިންގެ އިރުޝާދާއެކު އެއީ މާވަހަރެއްކަން ޔަގީން ކުރުމަށް ޓެސްޓުތައް ހަދަން މާލެ ގެނައުމުގެ ވިސްނުން އެބަ ހުރި ކަމަށެވެ.
ސޯޝަލް މީޑިއާގައި ޗޮން މަޝްހޫރު ވެގެންދިޔައީ "ބިލީވް މީ ސެންސް މޭކް" ގެ ނަމުންނެވެ. އޭނާ އެ ނަމުން މަޝްހޫރު ވެގެންދިޔައީ ވީޑިއޯތަކުގައި އެހެން ބުނާތީ އެވެ.
އެންމެ ފަހުން ރާއްޖެއިން މާވަހަރެއް ކަމަށް ބެލެވޭ އެއްޗެއް ހޮވާފައި ވަނީ މިދިޔަ އޯގަސްތް މަހު ގއ. ކޮލަމާފުށިންނެވެ.
މީގެ ކުރިން ވެސް ރާއްޖޭގެ އެކި ސަރަހައްދުތަކުން މިގޮތަށް މާވަހަރު ފެނިފައިވެ އެވެ. އަދި ވަރަށް ބޮޑެތި އަގުތަކުގައި ވެސް މާވަހަރު ވިއްކާފައި އެބަހުއްޓެވެ.
