އިންޑިއާ ސަރުކާރުގެ އެހީގައި ހިންގާ ވެރިރަށް މާލެ އާއި، ވިލިމާލެ، ގުޅީފަޅު އަދި ތިލަފުށި ބްރިޖަކުން ގުޅައިލުމުގެ މަޝްރޫއު ނިމުމުން ރާއްޖޭގެ އިގުތިސޯދު ބަދަލުކޮށްލާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސްގެ ދެ ކަނބަލުންގެ ޝަރަފުގައި އެ ގައުމުގެ ރައީސް ދުރޫޕަދީ މުރުމޫ ވެރިރަށް ދިއްލީގައި ރޭ ދެއްވި ފަރިތްކޮޅުގައި ވާހަކަ ދައްކަވަމުން ރައީސް ވިދާޅުވީ، އަންނަ އަހަރު ދެ ގައުމަށް 60 އަހަރު ފުރިގެންދާނެ ކަމަށާއި އެ މުނާސަބަތާއެކު ރާއްޖެ-އިންޑިއާ ގުޅުން އިތުރު ހަރުފަތަކަށް ދާނެ ކަމަށް ގަބޫލުކުރައްވާ ކަމަށެވެ.
އިންޑިއާ އާއެކު އޮތް ހާރިޖީ ގުޅުމަކީ ދެ ގައުމަށް ފައިދާވާ ވިޔަފާރީގެ އެއްބަސްވުންތަކާއި އެކި ސިއްހީ، އަދި ފަތުރުވެރިކަމުގެ ދާއިރާ ފަދަ ބޮޑެތި ސިނާއަތްތަކުން އެކުގައި މަސައްކަތް ކުރުމުގެ މައްޗަށް ބިނާވެފައިވާ ގުޅުމެއް ކަންވެސް އެމަނިކުފާނު ފާހަގަކުރެއްވި އެވެ. ރާއްޖޭގެ ތަރައްގީގެ އެންމެ ގާތް އެއް ބައިވެރިޔަކީ އިންޑިއާ ކަމަށްވެސް ރައީސް ވިދާޅުވި އެވެ.
"ގްރޭޓާ މާލެ ކަނެކްޓިވިޓީ ބްރިޖު [ތިލަމާލެ ބްރިޖު] މަޝްރޫއާ އެކު ރާއްޖޭގެ އިގުތިސޯދު ބަދަލުކޮށްލާނެ، އެކަމަށް އިންޑިއާއަށް އިންތިހާއަށް ޝުކުރުވެރިވަން."
"ރާއްޖޭގެ މުޖުތަމައު ތަރައްގީ ކުރުމަށް އިންޑިއާގެ ރައްޔިތުންވެސް ވަނީ ގިނަ މަސައްކަތްތަކެއް ކޮށްދީފަ. އޭގެން ކޮންމެ މީހަކަށްވެސް އަޅުގަނޑު ޝުކުރުވެރިވަން. އިންޑިއާއަކީ ރާއްޖެއަށް އެންމެ ގިނައިން ފަތުރުވެރިން އަންނަ އެއް ގައުމު. އަޅުގަނޑު އެ އެންމެންނަށްވެސް މަރުހަބާ ދަންނަވަން،" ރައީސް ވިދާޅުވި އެވެ.
އޭގެއިތުރުން، ރާއްޖެއާއި އިންޑީއާއާ ދެމެދު އޮތް ހާރިޖީ އަދި ވިޔަފާރީގެ ގުޅުމުގެ ބޭރުން ދޭދޭ މީހުންގެ މެދުގައި އޮތް ގުޅުންތައްވެސް ރައީސް ފާހަގަކުރެއްވި އެވެ. އެގޮތުން ބޭސްފަރުވާއަށް ކޮންމެ އަހަރަކު ރާއްޖެއިން އިންޑިއާއަށް ދަތުރުކުރާ އެތައް ސަތޭކަ ދިވެހިންނަކީ އެކަމުގެ ހެއްކެށް ކަމަށް އެމަނިކުފާނު ރޭ ވަނީ ވިދާޅުވެފަ އެވެ.
ރާއްޖޭގެ އިގުތިސޯދު ބަދަލުކޮށްލާނެ ކަމަށް ރައީސް ވިދާޅުވި ތިލަމާލެ ބުރިޖުގެ މަޝްރޫއަކީ 500 މިލިއަން ޑޮލަރުގެ އަގުހުރި މަޝްރޫއެކެވެ. އޭގެ ތެރޭގައި ހިމެނެނީ އިންޑިއާގެ އެގްޒިމް ބޭންކުން ދޭ 400 މިލިއަން ޑޮލަރުގެ ލޯނަކާއި, އިންޑިއާއިން ދޭ ހިލޭ އެހީގެ ގޮތުގައި ދޭ 100 މިލިއަން ޑޮލަރެވެ.
މާލެ ސަރަހައްދުގެ ހަތަރު ރަށެއް ގުޅުވައިލަދޭ 6.7 ކިލޯމީޓަރުގެ އެ ބްރިޖުގެ މަޝްރޫއުގެ މަސައްކަތް މެއި، 2024، ގެ ނިޔަލަށް ނިންމަން އަމާޒު ހިފި ނަމަވެސް، އެކި ސަބަބުތަކާހެދި ޓައިމްލައިނަށް ބަދަލުތަކެއް އޭރު ގެނެ އެވެ.
އެގޮތުން ވިލިމާލެއާ ހަމައަށް ބްރިޖު ގުޅައިލަން މިހާރު ނިންމަން ހަމަޖެހިފައި ވަނީ މާޗު 31، 2026 ގަ އެވެ. އަދި ގުޅީފަޅުން ތިލަފުއްޓަށް ބްރިޖު ގުޅާލަަން ހަމަޖެހިފައި ވަނީ ސެޕްޓެމްބަރު 30، 2026 ގަ އެވެ.
