އޭދަފުށި ކަޕް 2024 ގެ ޗެމްޕިއަންކަން ވެލާ ސްޕޯޓްސް ކްލަބުން ހޯދައިފި އެވެ.
އޭދަފުށީ ޓާފް ދަނޑުގައި ކުރިއަށްދިޔަ މި މުބާރާތުގެ ޗެމްޕިއަންކަން ވެލާ އިން ހޯދީ ފައިނަލުގައި އިރުމަތި އެފްސީގެ މައްޗަށް 5-1 އިން ކުރިހޯދައިގެންނެވެ. މިއީ، މި މުބާރާތުގެ ފައިނަލުން މީގެ ކުރިން ދެ ފަހަރު (2021 އާއި 2023 ގައި) ބަލިވި، ވެލާ އިން މި ތަށި އުފުލާލި ފުރަތަމަ ފަހަރެވެ.
ފައިނަލް މެޗުގައި ވެލާ ޓީމަށް ލަނޑުތައް ޖަހައިދިނީ، މުހައްމަދު ފާސިރު (ފާއްޓޭ) ހަތަރު ގޯލާއި އިޝާން އިބްރާހިމް (ސައްޓު) އެއް ގޯލެވެ. އިރުމަތި އަށް ލަނޑު ޖަހައިދިނީ، ނ. މާފަރަށް ނިސްބަތްވާ، ގައުމީ ޒުވާން ޓީމުގެ ކުރީގެ ކެޕްޓަން، އައްޒާމް އަބްދުﷲ (އެޑޫ) އެވެ.
މި މެޗުގައި، އިރުމަތި އެފްސީގެ އިމްތިސާލް އަބްދުއްރަހްމާން އަށް ވަނީ ރަތް ކާޑެއް ދައްކައިފަ އެވެ.
މި ފަހަރުގެ އޭދަފުށި ކަޕްގެ މޮޅު ކުޅުންތެރިޔާގެ މަގާމާއި އެންމެ މޮޅު ފޯވާޑުގެ މަގާމާއި އެންމެ ގިނަ ގޯލު ޖެހި (9 ގޯލު ޖެހި) ކުޅުންތެރިޔާގެ މަގާމު ހޯދީ ފާއްޓެ އެވެ. މީގެ ކުރިން، 2021 ވަނަ އަހަރު އެމްއޭ ޔުނައިޓެޑުން ތަށި ހޯދިއިރު ވެސް ފާއްޓެ ވަނީ މި ހުރިހާ ކާމިޔާބެއް ހާސިލްކޮށްފަ އެވެ.
މި ފަހަރުގެ މުބާރާތުގެ އެހެން މަގާމުތަކަށް ބަލާއިރު، އެންމެ މޮޅު ގޯލުކީޕަރަކީ އިރުމަތި އެފްސީގެ އަބްދުއްސަދާދް އާދަމް އެވެ. މުބާރާތުގެ އެންމެ އުންމީދީ ކުޅުންތެރިއަކީ، ވެލާގެ އަހުމަދު ޖައުޝަން އަބްދުﷲ އެވެ. މިއީ، މި މަގާމު ޖައުޝަން ހޯދި ޖެހިޖެހިގެން ދެ ވަނަ ފަަހަރު އެވެ. އެންމެ މޮޅު ކޯޗަކަށް ވެލާގެ އަހުމަދު ނިޔާޒް (ނިޔާ) ހޮވުނުއިރު، ފެއާ ޕްލޭ ޓީމަކީ، ހުސް ސޮނގުންނެވެ.
އޭދަފުށީ ކައުންސިލުން މީގެ ހަތަރު އަހަރު ކުރިން، އިންތިޒާމުކުރަން ފެށި އޭދަފުށި ކަޕްގެ ފުރަތަމަ ދެ އަހަރު، 2021 އާއި 2022 ވަނަ އަހަރު ޗެމްޕިއަންކަން ހޯދީ އެމްއޭ ޔުނައިޓެޑް އެވެ. އަދި އެންމެ ފަހުން، 2023 ވަނަ އަހަރު ތަށި އުފުލާލީ ހުސް ސޮނގުންނެވެ.
