ލަންޑަން (އޮކްޓޫބަރު 4) - މި ސީޒަނުގައި ޓޮޓެންހަމް ހޮޓްސްޕާސްއާ ގުޅި ރަނގަޅު ކުޅުމެއް ދައްކަމުން އަންނަ ފޯވާޑް، ޑޮމިނިކް ސޮލާންކޭ، އިންގްލެންޑް ޓީމަށް ނެގިއިރު، މި ފަހަރުގެ ސްކޮޑުން މަޝްހޫރު ކުޅުންތެރިންތަކެއް ބާކީވެއްޖެ އެވެ.
ސޮލާންކޭ އަށް މީގެ ކުރިން، އިންގްލެންޑް ޓީމުން ފުރުސަތެއް ލިބުނީ، 2017 ވަނަ އަހަރު އެވެ. އެއީ، އޭނާ ލިވަޕޫލަށް ކުޅުނުއިރު އެވެ. އޭގެ ފަހުން، އޭނާ ވަނީ ބޯންމައުތަށް ބަދަލުވެފަ އެވެ. މި ސީޒަނުގައި ޓޮޓެންހަމާ ގުޅި، އެންމެ ފަހުން ކުޅުނު މެޗުތަކުގައި ދެއްކި ކުޅުމުގެ ސަބަބުން، އިންގްލެންޑްގެ ވަގުތީ ކޯޗު، ލީ ކާސްލީ މި ވަނީ ސޮލާންކޭ އަށް ފުރުސަތު ދީފަ އެވެ.
އެ ގޮތުން، ކާސްލީ ބުނީ، އެންމެ ފަހުން ނެގި އިންގްލެންޑް ސްކޮޑުގައި ވެސް ސޮލާންކޭ ހިމެނޭނެ ކަމަށާއި އެކަމަކު، ފަހު ވަގުތު އޭނާ އަށް އަނިޔާވެ، ބާކީވީ ކަަމަށެވެ.
އިންގްލެންޑުން ސްކޮޑު ނަގާފައި މި ވަނީ ޔުއެފާ ނޭޝަންސް ލީގުގައި މި މަހު، ގްރީސް އާއި ފިންލެންޑާ ބައްދަލުކުރާ މެޗުތަކަށެވެ.
މި ފަހަރުގެ ސްކޮޑުން ޖާގަ ނުލިބުނު ކުޅުންތެރިންނަށް ބަލާއިރު، މެންޗެސްޓާ ޔުނައިޓެޑްގެ ހެރީ މެގުއާ އާއި މާކަސް ރަޝްފޯޑް، ކްރިސްޓަލް ޕެލަސްގެ އެބްރެޗީ އެޒޭ، ޓޮޓެންހަމްގެ ޖޭމްސް މެޑިސަން، ވެސްޓް ހޭމްގެ ކެޕްޓަން ޖެރޮޑް ބޮވެން އަދި މި ފަހުން އެސްޓަން ވިލާގައި މޮޅު ކުޅުމެއް ދައްކަމުން އަންނަ މޯގަން ރޮޖާސް ހިމެނެ އެވެ.
ސެޕްޓެމްބަރު މަހު ނެގި އިންގްލެންޑް ސްކޮޑުން އެކި ސަބަބުތަކާ ހުރެ ބާކީވި، ސީނިއާ ދެ ކުޅުންތެރިން ކަމަށްވާ ކައިލް ވޯކާ އާއި ޖޫޑް ބެލިންހަމް މި ފަހަރު ސްކޮޑުގައި ހިމެނެ އެވެ. ސެޕްޓެމްބަރު މަހު، ނޭޝަންސް ލީގުގައި އިންގްލެންޑުން ވަނީ ފިންލެންޑާއި އަޔަލެންޑް ބަލިކޮށްފަ އެވެ.
އިންގްލެންޑުން މި ފަހަރު ނޭޝަންސް ލީގުގައި މި މަހު 10 ވަނަ ދުވަހު، ވެމްބްލީގައި ގްރީސްއާ ކުޅުމަށް ފަހު، ތިން ދުވަސް ފަހުން ފިންލެންޑާ ކުޅޭނީ ހެލްސިންކީގަ އެވެ.
