އިޒްރޭލުން ލުބްނާނުގައި ހިންގަމުން އަންނަ ގަތުލް އާންމުގައި ފާއިތުވެދިޔަ 24 ގަޑިއިރު ތެރޭގައި ވައިގެ މަގުން ދިން ހަމަލާތަކުގައި 105 މީހުން މަރާލައިފި އެވެ.
ލުބްނާނުގެ ހެލްތު މިނިސްޓްރީން ބުނީ އިޒްރޭލުން އެ ގައުމަށް ދެމުން އަންނަ ހަމަލާތައް ވަރުގަދަ ކުރަމުން އަންނަ ކަމަށާއި 24 ގަޑިއިރު ތެރޭގައި ދިން ހަމަލާތަކުގައި 359 މީހުން ޒަހަމްވިއިރު އޭގެ ތެރެއިން ބައެއް މީހުންގެ ހާލު ސީރިއަސް ކަމަށެވެ.
ލުބްނާނަށް ދިން ބައެއް ހަމަލާތައް އާންމުން ހިޔާވެހިކަން ހޯދައިގެން ތިބި އިމާރާތްތަކަށް އަމާޒުކޮށްފައިވާއިރު، އިޒްރޭލުން ބުނީ ހަމަލާތައް ދެމުން ދަނީ ހިޒްބުﷲ އަށް އަމާޒުކޮށް ކަމަށެވެ.
ލުބްނާނަށް އަމާޒުކޮށް މެދުނުކެނޑި އިޒްރޭލުން ފުލުފުލުގައި ހަމަލާތައް ދެމުން އަންނަތާ ދެ ހަފްތާއެއްހާ ދުވަސް ވެފައިވާއިރު، ހަމަލާތަކުގައި މިހާތަނަށް 1،000 އަށްވުރެ ގިނަ މީހުން ވަނީ މަރުވެފަ އެވެ.
އިޒްރޭލުން އަންނަނީ ލުބްނާނުގެ ރައްޔިތުންނަށް ބިރު ދައްކައި، ވެރިރަށް ބެއިރޫތުއިން ފައިބަން އަންގަމުންނެވެ. އަދި ބޯޑަރު ކައިރީގައި ޓޭންކަރުތައް އަތުރާލައި، އެއްގަމުން އަރައިގަންނަން ވެސް އިޒްރޭލުން އަންނަނީ ތައްޔާރުވަމުންނެވެ.
އިޒްރޭލުގެ އަމަލުތައް ހުރި ގޮތުން ލުބްނާނުގެ ބައެއް ރައްޔިތުން އަންނަނީ އެ ގައުމު ދޫކޮށް، އެހެން ގައުމުތަކަށް ހިޖުރަ ކުރަން މަސައްކަތް ކުރަމުންނެވެ.
ލުބްނާނުގެ އިތުރުން އިޒްރޭލުން އަންނަނީ ފަލަސްތީނުގެ ގާޒާއަށް ވެސް މިދިޔަ އަހަރުގެ އޮކްޓޯބަރު 7، އިން ފެށިގެން ހަމަލާތައް ދެމުންނެވެ. އެ ހަމަލާތަކުގައި 41،595 މީހުން ވަނީ މަރުވެފަ އެވެ.
