ލަންޑަން (ސެޕްޓެމްބަރު 29) - އިނގިރޭސި ޕްރިމިއާ ލީގުގައި ކޯލް ޕާމާ ހަތަރު ގޯލު ޖަހައި ރެކޯޑެއް ހެދި މެޗުގައި ޗެލްސީން 4-2 އިން ބްރައިޓަން ބަލިކުރިއިރު، އާސެނަލުން ފަހު ވަގުތު ޖެހި ގޯލުތަކުން 4-2 އިން ލެސްޓާ ސިޓީ ބަލިކޮށްފި އެވެ.
އަދި ލިވަޕޫލުން 2-1 އިން ވުލްވްސްގެ މައްޗަށް ކުރިހޯދައި ލީގު ތާވަލުގެ ކުރިއަށް ވަނީ ޖެހިލައިފަ އެވެ. އެއީ، އެއް ވަނައިގައި އޮތް ސިޓީ އިއްޔެ ކުޅުނު މެޗުން ނިއުކާސަލް ޔުނައިޓެޑާ 1-1 އިން އެއްވަރުވުމުގެ ފައިދާ ނަގައިގެންނެވެ.
ލިވަޕޫލަށް ހަ މެޗުން 15 ޕޮއިންޓް ލިބުނުއިރު، ދެ ވަނައިގައި އޮތް ސިޓީ އާއި ތިން ވަނައިގައި އޮތް އާސެނަލަށް ވަނީ ހަ މެޗުން 14 ޕޮއިންޓް ލިބިފަ އެވެ.
ރޭގެ މެޗުގައި އިބްރާހިމާ ކޮނާޓޭގެ ގޯލުން ލިވަޕޫލުން ލީޑުނެގިއިރު، ރަޔާން އައިޓް ނޫރީގެ ލަނޑުން ވުލްވްސ އެއްވަރުކުރި އެވެ. ލިވަޕޫލް މޮޅުވީ ދެ ވަނަ ހާފުގައި މުހައްމަދު ސަލާހު ޖެހި ޕެނަލްޓީންނެވެ.
އާސެނަލުން ގަބްރިއެލް މާޓިނެލީ އާއި ލެއަންޑްރޯ ޓްރޮސާޑްގެ ލަނޑުތަކުން، 2-0 އިން ކުރީގައި އޮއްވައި، ޖޭމްސް ޖަސްޓިން ދެ ގޯލު ޖަހައި، ލެސްޓާ އަށް އެއްވަރުކޮށްދިނެވެ. އާސެނަލުން މޮޅުވީ އިތުރު ވަގުތުގައި ދެ ގޯލު ޖަހައިގެންނެވެ. ފުރަތަަމަ ލަނޑަކީ، ލެސްޓާގެ ވިލްފްރެޑް އެންޑީޑީ އަތުން ބައިކޮޅަށް ވަން ގޯލެކެވެ. ފަހު ލަނޑު ޖެހީ، ކައި ހަވާޓްޒް އެވެ.
ޗެލްސީ އަށް ރޭގެ މެޗުގެ ފުރަތަމަ ހާފުގައި ކޯލް ޕާމާ ވަނީ ހަތަރު ލަނޑު ޖަހައިދީފަ އެވެ. ޕާމާ އަކީ އިނގިރޭސި ޕްރިމިއާ ލީގުގެ ތާރީހުގައި ވެސް މެޗެއްގެ ފުރަތަމަ ހާފުގައި ހަތަރު ގޯލު ޖެހި ފުރަތަމަ ކުޅުންތެރިޔާ އެވެ.
މި މެޗުގައި ބްރައިޓަންގެ ގޯލުތައް ޖެހީ ޖިއޮޖީނިއޯ ރޫޓޭއާ އާއި ކާލޯސް ބަލޭބާ އެވެ.
ލީގުގައި ރޭ ސިޓީން ކުޅުނު މެޗުގައި ޖޮސްކޯ ގްވާޑިއޯލްގެ ގޯލުން ލީޑުނެގިއިރު، ނިއުކާސަލް އިން އެއްވަރުކުރީ އެންތަނީ ގޯޑަން ޖެހި ޕެނަލްޓީންނެެވެ.
ލީގުގައި ރޭ ކުޅުނު އެހެން މެޗުތަކަށް ބަލާއިރު، އެވަޓަން އިން 2-1 އިން ކްރިސްޓަލް ޕެލަސް ބަލިކުރިއިރު، ނޮޓިންހަމް ފޮރެސްޓް އަތުން ފުލަމް ވަނީ 1-0 އިން މޮޅުވެފަ އެވެ. ބްރެންޓްްފޯޑުން ލީޑުނެގި ނަމަވެސް ވެސްޓް ހޭމް އިން ވަނީ 1-1 އިން އެއްވަރުކޮށްފަ އެވެ.
