ބާސެލޯނާ (ސެޕްޓެމްބަރު 26) - ސްޕެނިޝް ލީގުގައި ރޭ ރޮބަޓް ލެވަންޑޯސްކީ ޖެހި ގޯލުން ބާސެލޯނާ އިން 1-0 އިން ގެޓަފޭ ބަލިކޮށް، ލީގުގައި މޮޅުވުމުގެ ސައްތަ އިން ސައްތަ ރެކޯޑް ދަމަަހައްޓައިފި އެވެ.
ހަންސީ ފްލިކްގެ ކޯޗުކަމުގައި ބާސެލޯނާ އިން ސްޕެނިޝް ލީގުގައި މި ފަހަރު ކުޅުނު ހަތް މެޗުން ވެސް މޮޅުވެފައިވާއިރު، އެ ޓީމަށް ވަނީ 21 ޕޮއިންޓް ލިބިފަ އެވެ. އެންމެ ފަހުގެ ޗެމްޕިއަން، ރެއާލް މެޑްރިޑްގެ އޮތީ ހަތް މެޗުން 17 ޕޮއިންޓެވެ.
މެޗުގައި ފެނިގެންދިޔަ ހަމައެކަނި ލަނޑު 19 ވަަނަ މިނިޓްގައި ކާމިޔާބުކުރީ މި ސީޒަނުގައި ރަނގަޅު ފޯމެއް ދަމަހައްޓަމުން އަންނަ ތަޖުރިބާކާރު ފޯވާޑް، ރޮބަޓް ލެވަންޑޯސްކީ އެވެ. އޭރިއާތެރެއިން ލިބުނު ފުރުސަތުގައި ލެވަންޑޯސްކީ ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
މެޗުގެ ބާކީ ބައިގައި ދެ ވަނަ ލަނޑެއް ޖަހަން ބާސެލޯނާ އިން ފުރުސަތު ތަނަވަސްކުރަމުންދިޔަ ނަމަވެސް ގޯލެއް ޖެހޭގޮތްނުވި އެންމެ ބޮޑު ސަބަބަކީ ގެޓަފޭގެ ގޯލްކީޕަރު ޑޭވިޑް ސޮރިއާ އެވެ. އޭނާ ވަނީ ބާސެލޯނާގެ ލަމީން ޔަމާލް އާއި ރަފީނިއާ ހުއްޓުވުމުގައި ރަނގަޅު ކުޅުމެއް ދައްކައިފަ އެވެ.
ގެޓަފޭ އަށް އެއްވަރުކުރަން މެޗުގެ ފަހުކޮޅުގައި ރަނގަޅު ފުރުސަތެއް ލިބުނެވެ. އެކަމަކު، އެ ޓީމުގެ ފޯވާޑް، ބޯހާ މަޔޯރާލް އަށް އެ ފުރުސަތުގެ ބޭނުމެއް ނުހިފުނެވެ.
