ކަނޑެވާރެހާގައި ފަތުރުވެރިކަން ތަރައްގީ ކުރާނެ ބަޔަކު ހޯދަން ގދ. ހޯނޑެއްދޫ ކައުންސިލުން އަންގާރަ ދުވަހު އިއުލާނެއްކޮށްފި އެވެ.
ގާތްގަނޑަކަށް 4.6 ހެކްޓަރުގެ ކަނޑެވާރެހާއަކީ ހޯނޑެއްދޫގެ އިހުތިސާސުގެ ތެރޭގައި އޮންނަ އޮންނަ ކުޑަ ރަށެކެވެ. ރަށަށް ބިޑު ކުރުމުގެ ސުންގަޑި ހަމަވާނީ ނޮވެމްބަރު 17، ގަ އެވެ.
ކަނޑެވާރެހާ ކައިރީގައި ވަރަށް ރީތި ޑައިވިން ސްޕޮޓުތަކެއް ހުރެ އެވެ. އަދި ރަށް ކައިރީގައި ވަރަށް ގިނަ ފަޅުރަށްތައް ހުރެ އެވެ. އެ ރަށް ކައިރީގައި ގާތްގަނޑަކަށް 70 ފަޅު ރަށް އޮވެ އެވެ.
ރަށް ކުއްޔަށް ދެނީ 50 އަހަރުގެ މުއްދަތަކަށެވެ. ބިޑު ކާމިޔާބު ކުރާ ފަރާތުން ގިނަވެގެން 30 ދެ އަހަރާއި ހަ މަސް ދުވަހުގެ ތެރޭގައި ކޮންސްޓްރަކްޝަން މަސައްކަތް ނިންމަންޖެހޭނެ އެވެ. ރަށުގެ ލީސް އެކުއިޒިޝަން ކޮސްޓެއްގެ ގޮތުގައި ހަމަޖެއްސީ 700،000 ޑޮލަރެވެ. އެއީ 10.7 މިލިއަން ރުފިޔާ އެވެ.
ކަނޑެވާރެހާގައި ރިސޯޓު ތަރައްގީ ކުރާ ބަޔަކަށް އަހަރަކު 38 މިލިއަން ޑޮލަރުގެ ވިޔަފާރި ކުރެވޭނެ ކަމަށް ކައުންސިލުން ލަފާ ކުރެ އެވެ. އަދި ހިންގުމަށް އަދި އެހެނިހެން ކަންކަމަށް ކުރާ ހަރަދު ކެނޑުމަށްފަހު ސާފު ފައިދާގެ ގޮތުގައި އަހަރަކު 22 މިލިއަން ޑޮލަރުގެ ފައިދާއެއްވާނެ ކަމަށް ވެސް ކައުންސިލުން ލަފާ ކުރެ އެވެ.
