ރާއްޖޭގައި ކުރިއަށްދިޔަ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ވިމަންސް ވޮލީބޯލް ކްލަބް ޗެމްޕިއަންޝިޕްގެ ފައިނަލުގައި އުޒްބެކިސްތާންގެ ހޫމޯ ވޮލީބޯލް ކްލަބްގެ މައްޗަށް ސީދާ ތިން ސެޓުން ކުރިހޯދާ, ނޭޕާލް ޕޮލިހުން މުބާރާތުގެ ޗެމްޕިއަންކަން ހޯދައިފި އެވެ.
ނޭޕާލްގެ ގިނަ އަދަދެއްގެ ސަޕޯޓަރުން ކުރިމަތީ ރޭ, ޒުވާނުންގެ މަރުކަޒު އެތެރޭ ކޯޓުގައި ކުޅުނު މި މެޗުގެ ސެޓުތައް ދިޔައީ, 25-16، 25-22 އަދި 25-23 އިންނެވެ.
މި މެޗުގެ ފުރަތަމަ ސެޓު ފަށައިގެން ހޫމޯ އިން ވަނީ ނޭޕާލް ޕޮލިހަށް ބޮޑު ލީޑެއް ނެގިޔަ ނުދީ, ހިފަހައްޓައިފަ އެވެ. އެކަމަކު ސެޓުގެ މެދުތެރެއިން ނޭޕާލް ޕޮލިހުގެ އުޝާ ކައިރިކައިރީގައި އެ ޓީމަށް ހޯދަދިން ފަސް ޕޮއިންޓާއެކު, ސެޓު އެނބުރި ނޭޕާލް ޕޮލިހުން މި ސެޓު ކާމިޔާބުކުރީ 25-16 އިންނެވެ.
ހޫމޯ އާއި ނޭޕާލް ޕޮލިސް ބައްދަލުކުރި ފައިނަލް މެޗުގެ ތެރެއިން - ފޮޓޯ: އަތޫފް އާތިފް / އަދަދު
މި މެޗުގައި ފެނިގެންދިޔަ އެންމެ ފޯރިގަދަ ސެޓަކީ ދެވަނަ ސެޓެވެ. މި ސެޓުގައި ދެ ޓީމަށްވެސް ބޮޑު ލީޑެއްގައި އޮވެގެން ކުޅެވޭ ގޮތް ނުވިއެވެ. މި ސެޓުގައި ވެސް ނޭޕާލް ޕޮލިސް ޓީމުގެ ތަފާތަކަށްވީ އެ ޓީމުގައި ތިބި ތަޖުރިބާކާރު ކުޅުންތެރިންނެވެ. މި ސެޓު ނޭޕާލް ޕޮލިހުން ކާމިޔާބުކުރީ 25-22 އިންނެވެ.
ތިންވަނަ ސެޓު ފަށައިގެން ވެސް ލީޑުކޮށްގެން ކުޅުނީ ނޭޕާލް ޕޮލިހުންނެވެ. މި ސެޓުގެ މެދުތެރެއިން ނޭޕާލް ޕޮލިހުން ވަނީ ފަސް ޕޮއިންޓްގެ ލީޑެއްވެސް ނަގާފަ އެވެ. އަދި ސެޓުގެ ފަހުކޮޅު ނޭޕާލް ޕޮލިހުން ވަނީ ޒުވާން ކުޅުންތެރިންނަށް ފުރުސަތު ދީފަ އެވެ. މި ސެޓު އެ ޓީމުން ގެންދިޔައީ, 25-23 އިންނެވެ.
މީގެ އިތުރުން އިއްޔެ ހަވީރު ކުޅުނު ލޯ މެޑަލް މެޗު ރާއްޖޭގެ ކުލަބް ވެމްކޯ އިން ކާމިޔާބުކުރީ ފަހަތުން އަރާ 3-2 ސެޓުންނެވެ.
މި މެޗުގެ ފުރަތަމަ ދެ ސެޓުގައި ވެމްކޯގެ ފަރާތުން ފެނިގެންދިޔައީ ދަށް ކުޅުމެކެވެ. އެއާއެކު, މި ދެ ސެޓު ލަންކާ އެއާފޯސް އިން ގެންދިޔައީ ފަސޭހަކަމާއެކު, 11-25, 17-25 އިންނެވެ.
އެކަމަކު ޖެހިގެން އައި ތިން ސެޓުގައި ވެސް ވެމްކޯ ފެނިގެންދިޔައީ ތަފާތުކޮށެވެ. އެގޮތުން މި ތިން ސެޓުގައި ވެމްކޯގެ ޖޫޒާން ޒަރީރް, އައިޝަތު މާޖިދާ އަދި ބިދޭސީ ދެ ކުޅުންތެރިން މޮޅު ކުޅުން ފެނިގެންދިޔަ އެވެ. މި ސެޓުތައް ވެމްކޯ އިން ގެންދިޔައީ, 25-13، 25-23 އަދި 15-13 އިންނެވެ.
ލަންކާ އެއާފޯސް ބަލިކޮށް މުބާރާތުގެ ލޯ މެޑަލް ހޯދީ ރާއްޖޭގެ ވެމްކޯ އިން / ފޮޓޯ: އަތޫފް އާތިފް / އަދަދު
މި މުބާރާތުގައި ފަސް ގައުމަކުން ހަ ކްލަބް ވާދަކުރި އެވެ. އެއީ ރާއްޖޭގެ ޕޮލިސް ކުލަބާއި, ވެމްކޯގެ އިތުރުން, ލަންކާގެ އެއާފޯސް ޓީމާއި, ނޭޕާލް, ޕޮލިސް ކުލަބާ, އުޒްބެކިސްތާންގެ ހޫމޯގެ އިތުރުން ތަޖިކިސްތާންގެ ވީސީ ޑިއަމެޑް އެވެ.
