ރާއްޖޭގައި މިހާރު ކުރިއަށްދާ ސެންޓްރަލް އޭޝިއާ ވޮލީބޯލް އެސޯސިއޭޝަން (ކާވާ) ވިމެންސް ކްލަބް ޗެމްޕިއަންޝިޕުގައި ރާއްޖޭގެ ކުލަބް ވެމްކޯ އާއި ޕޮލިސް ކުލަބުން އިއްޔެ ކުޅުނު މެޗުތަކުން ބަލިވެއްޖެ އެވެ.
ވެމްކޯ އިން ވަނީ މި މުބާރާތުގައި އެ ޓީމުން ކުޅުނު ފުރަތަމަ މެޗުގައި ސްރީ ލަންކާގެ އެއާފޯސް މައްޗަށް 3-1 ސެޓުން ކުރިހޯދައިފަ އެވެ. އަދި ދެ ވަނަ މެޗުގައި ޕޮލިސް ކުލަބްގެ މައްޗަށް ކުރިހޯދީ ސީދާ ތިން ސެޓުންނެވެ.
އެކަމަކު، އިއްޔެ ހަވީރު، އުޒްބެކިސްތާންގެ ހޫމޯ ވީސީގެ އަތުން ވެމްކޯ ބަލިވީ 3-1 ސެޓުންނެވެ. މި މެޗުގެ ސެޓުތައް ދިޔައީ, 25-19, 18-25, 19-25, 18-25 އިންނެވެ.
މި މެޗުގެ ފުރަތަމަ ސެޓުގައި ވެމްކޯގެ ފަރާތުން މޮޅު ކުޅުމެއް ފެނިގެންދިޔަ އެވެ. އެ ސެޓުގައި ވެމްކޯގެ އައިޝަތު މާޖިދާ, ޖޫޒާން ޒަރީރް އަދި ބިދޭސީ ދެ ކުޅުންތެރިންގެ ފަރާތުން ފެނިގެންދިޔަ ކުޅުމާއެކު ވެމްކޯ އިން ވަނީ 25-19 އިން ގެންގޮސްފަ އެވެ.
އެކަމަކު ޖެހިގެން އައި ތިން ސެޓުގައި, ވެމްކޯގެ ފަރާތުން ފެނިގެންދިޔައީ އާދައިގެ ކުޅުމެކެވެ. މި ތިން ސެޓުގައި ވެސް ވެމްކޯ އަތުން ބޮޑަށް ގެއްލުނީ ސާވިސް ރިސީވް ނުކުރެވިގެން ގެއްލުން ޕޮއިންޓްތަކެވެ.
ވެމްކޯ އާއި ހޫމޯ ވީސީ ބައްދަލުކުރި މެޗުގެ ތެރެއިން - ފޮޓޯ: އަތޫފް އާތިފް / އަދަދު
މީގެ އިތުރުން ރޭ ރާއްޖޭގެ ޕޮލިސް ކުލަބުން ނުކުތީ ލަންކާގެ އެއާ ފޯސްއާ ދެކޮޅަށެވެ. މި މެޗު ސީދާ ތިން ސެޓުން ލަންކާގެ އެއާ ފޯސް އިން ވަނީ ކާމިޔާބު ކޮށްފަ އެވެ. މި މެޗުގެ ސެޓުތައް ދިޔައީ, 25-15, 25-15 އަދި 25-19 އިންނެވެ.
މި މެޗުގެ ފުރަތަމަ ސެޓު ފަށައިގެން ޕޮލިސް ކުލަބުން ލީޑު ކޮށްގެން ކުޅުނު ނަމަވެސް ލަންކާގެ އެއާފޯސް އިން ވަނީ ސެޓުގެ ވަކި ހިސާބަކުން ކުޅުން ރަނގަޅުކޮށް ބޮޑު ލީޑެއް ނަގާފަ އެވެ. އެއާއެކު މި ސެޓު ނިމުނީ 25-15 އިންނެވެ.
ޖެހިގެން އައި ދެ ސެޓުވެސް ފަށައިގެން ލަންކާގެ އެއާފޯސް އިން ވަނީ ބޮޑު ލީޑަކާއެކު ކުޅެފަ އެވެ. މި ސެޓު އެ ޓީމުން ގެންދިޔައީ, 25-15 އަދި 25-19 އިންނެވެ.
މުބާރާތުގެ މެޗުތައް ދެން އޮންނާނީ މާދަމާ އެވެ. މާދަމާ ފުރަތަމަ މެޗުގައި އެއާފޯސް އާއި ޑިއަމެޑް ކުޅޭއިރު، ދެ ވަނަ މެޗުގައި، ނޭޕާލުގެ ޕޮލިސް ކްލަބުން ބައްދަލުކުރާނީ ރާއްޖޭގެ ވެމްކޯއާ އެެވެ. އަދި މާދަމާރޭ ކުޅޭ މެޗުގައި، ރާއްޖޭގެ ޕޮލިހުން ހޫމޯއާ ކުޅޭނެ އެވެ.
