ޒިއުރިކް، ސްވިޒަލެންޑް (ސެޕްޓެމްބަރު 17) - އަންނަ އަހަރު ބޭއްވުމަށް ހަމަޖެހިފައިވާ އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގެ އިންތިހާބުގައި އެ ކޮމިޓީގެ ރައީސް ކަމަށް ހަތް ކެންޑިޑޭޓަކު ކުރިމަތިލުމަށް ކެންޑިޑެސީ ހުށަހަޅައިފި އެވެ
ޖަރުމަނުގެ ވަކީލު، ތޯމަސް ބަކް، އަންނަނީ 2013 ވަނަ އަހަރުން ފެށިގެން އައިއޯސީގެ ރައީސްގެ މަގާމު ފުރުއްވަމުންނެވެ. ދެ ވަނަ ދައުރަށް ފަހު، މަގާމުން ވަކިވެ، އިތުރު ދައުރަކަށް ކުރިމަތިނުލައްވާނެ ކަމަށް މިދިޔަ މަހުގެ އޮލިމްޕިކްސްގެ ތެރެއިން ވަނީ އިއުލާނުކުރައްވައިފަ އެވެ. އެއީ ގަވާއިދު ވެސް އޮތްގޮތުންނެވެ.
ބަކް، އައިއޯސީގެ ރައީސްގެ މަގާމުގައި ހުންނަވާ ދައުރު އިތުރުކުރާނަމަ، އޮލިމްޕިކް ޗާޓަރަށް ބަދަލުގެންނަން ޖެހޭނެ އެވެ. މިހާރު އޮތްގޮތުން، ރައީސަކަށް އެންމެ ގިނަވެގެން މަގާމުގައި ހުރެވޭނީ 12 އަހަރު އެވެ. އެއީ، އަށް އަހަރުގެ އެއް ދައުރާއި، ހަތަރު އަހަރުގެ އެއް ދައުރު ގުނާ ގޮތަށެވެ. މިއީ، ބަކްގެ ވެސް ތާއީދާ އެކު، ޗާޓަރަށް ގެނެވިފައިވާ ބަދަލެކެވެ.
އަންނަ އަަހަރު މުޅިން އާ ފަރާތަކަށް، 10 އަހަރަށް ފަހު، ދުނިޔޭގެ ކުޅިވަރުގެ އެންމެ ނުފޫޒުގަދަ އެއް މަގާމު، އައިއޯސީގެ ރައީސްކަން ފުރުއްވުމުގެ ފުރުސަތު ލިބިގެންދާނެ އެވެ.
އެ ގޮތުން، ކުރިމަތިލައްވާފައިވާ ކެންޑިޑޭޓުންނަށް ބަލާއިރު، ޖޯޑަން އޮލިމްޕިކް ކޮމިޓީގެ ރައީސް އަދި ކުރީގެ ރެސްލަރު، ޕްރިންސް ފައިސަލް އަލް ހުސެއިން، އިނގިރޭސި އޮލިމްޕިކް ކޮމިޓީގެ އެކި މަގާމުތައް ފުރުއްވާފައިވާ ކުރީގެ މިޑްލް ޑިސްޓެންސް ދުވުންތެރިޔާ، ސަބެސްޓިއަން ކޯއި، ޒިމްބާބްވޭގެ ސްޕޯޓްސް މިނިސްޓަރު، ކާސްޓީ ކޮވެންޓްރީ، އިންޓަނޭޝަނަލް ސްކީ އެންޑް ސްނޯބޯޑް ފެޑެރޭޝަންގެ ރައީސް، ސްވިޑެންގެ ޖޯހަން އެލިއާޝް، ފްރާންސްގެ އޮލިމްޕިކް ކޮމިޓީ އާއި ދުނިޔޭގެ ސައިކްލިން ޔޫނިއަން ރައީސް، ޑޭވިޑް ލަޕޯޓިއޯންޓް، އައިއޯސީގެ ނައިބު ރައީސް، ހުއާން އެންޓޯނިއޯ ސަމަރާންޝް ޖޫނިއާ އަދި އިންޓަނޭޝަނަލް ޖިމްނާސްޓިކް ފެޑެރޭޝަންގެ ރައީސް އަދި ޓޯކިޔޯ އޮލިމްޕިކްސް އިންތިޒާމްކުރުމުގައި ހަރަކާތްތެރިވި ޖަޕާނުގެ މޮރިނާރީ ވަތަނާބޭ ހިމެނިވަޑައިގަންނަވަ އެވެ.
މި ފަހަރުގެ ކެންޑިޑޭޓުންގެ ތެރެއިން ގިނަ ބަޔެއްގެ ސަމާލުކަން ހުއްޓުނީ ހަމައެކަނި އަންހެން ކެންޑިޑޭޓް، ޒިމްބާބްވޭގެ ކޮވެންޓްރީ އަށެވެ. ފަސް އޮލިމްޕިކްސްގައި ވާދަކުރުމުގެ ޝަރަފް ހޯދި ކޮވެންޓްރީ އަކީ އޮލިމްޕިކްސްގެ ސްވިމިން އިވެންޓްތަކުން ހަތް މެޑަލް ހޯދާފައިވާ އެތުލީޓެކެވެ. އޭނާ ކެންޑިޑެސީ ހުށަހެޅިއިރު ފާހަގަކޮށްފައިވަނީ، އައިއޯސީގެ ރައީސަކަށް އިންތިހާބުވެވަޑައިގަންނަވާ ފުރަތަމަ އަންހެން އަދި އެފްރިކާގެ ފަރާތަށް ވުމުގެ ޝަރަފް ހޯދަން ބޭނުންވާ ކަމަށެވެ
އައިއޯސީގެ ރައީސްކަން މުޅިން ފުރުއްވާފައިވަނީ ފިރިހެނުންނެވެ. މީގެ ކުރިން ފެނިގެންދިޔަ، އައިއޯސީގެ ނުވަ ރައީސުންގެ ތެރެއިން އަށް ފަރާތެއް ނިސްބަތްވަނީ ޔޫރަޕް އަށެވެ. ދެން އެ މަގާމު ފުރުއްވީ އެމެރިކާގެ ފަރާތެކެވެ
މި ހުރިހާ ކެންޑިޑޭޓުން އަންނަ ޖެނުއަރީ މަހު، ސްވިޒަލެންޑުގެ ލުޒޭންގައި ކުރިއަށްދާ ބައްދަލުވުމެއްގައި ޕްރެޒެންޓޭޝަނެއް ހުށަހަޅާނެ އެވެ. އައިއޯސީގެ އިންތިހާބު އޮންނާނީ އަންަނަ އަހަރުގެ މާޗް 18-21 އަށެވެ. އަދި މަގާމަށް ހޮވޭ އާ ރައީސެއްގެ ދައުރު ފެށޭނީ އަންނަ އަހަރު ޖޫން މަހުން ފެށިގެންނެވެ
