މި މަހު ބާއްވާ ގައުމީ ދިގުފެތުމުގެ މުބާރާތުގައި (އޯޕަން ވޯޓާ ސްވިމިން ކޮމްޕެޓިޝަންގައި) ބައިވެރިވުމުގެ ފުރުސަތު ސްވިމިން އެސޯސިއޭޝަން އޮފް މޯލްޑިވްސް އިން އިތުރުކޮށްދީފި އެެވެ.
ކުޑަގިރި ޕިކްނިކް އައިލެންޑްގައި ގައުމީ ދިގުފެތުމުގެ މުބާރާތް ކުރިއަށްދާނީ މި މަހުގެ 27 އާއި 28 ވަނަ ދުވަހު އެވެ.
ދިގުފެތުމުގެ މުބާރާތުގައި ބައިވެރިވުމުގެ ފުރުސަތު ސްވިމިން އެސޯސިއޭޝަން އިން ފުރަތަމަ ދިނީ މި މަހުގެ 12 ވަނަ ދުވަހުގެ ނިޔަލަށެވެ. އެކަމަކު، މުބާރާތުގެ ފޯރި އިތުރުކުރުމާއި ގިނަ ބަޔަކަށް ފުރުސަތު ދިނުމުގެ ބޭނުމުގައި ބަައިވެރިވުމުގެ ފުރުސަތު ސްވިމިން އެސޯސިއޭޝަނުން އިތުރުކޮށްދީފައިވަނީ، މި މަހުގެ 15 ވަނަ ދުވަހުގެ 12:00 ގެ ނިޔަލަށެވެ.
މުބާރާތުގައި ހަތަރު ވަނަ އެއް ހޮވާނެ އެވެ. އެ ގޮތުން، ގައުމީ ދިގު ފެތުމުގެ އަންހެން ފިރިހެން ޗެމްޕިއަނާއި ގައުމީ ދިގުފެތުމުގެ ޖޫނިއާ އަންހެން ފިރިހެން ޗެމްޕިއަންގެ އިތުރުން، ސްވިމް ޗެލެންޖް އާއި ކިޑްސް ސްވިމް ޗެލެންޖްގެ ވަނަތަކެވެ.
ނެޝަނަލް ލެވަލްގައި ފަސް ކިލޯމީޓަރު ފަތާއިރު، ޖޫނިއާ ނެޝަނަލް ލެވަލްގައި ތިން ކިލޯމީޓަރަށް ފަތާނެ އެެެވެ. ސްވިމިން ޗެލެންޖްގައި އެއް ކިލޯމީޓަރު ފަތާނެ އެވެ. އަދި ކިޑްސް ސްވިމް ޗެލެންޖް ފަން އިވެންޓެއްގެ ގޮތުގައި ކުރިއަށްދާއިރު، މި އިވެންޓުގައި 500 މީޓަރަށް ފަތާއިރު، ރޭސް ނިންމާ ކޮންމެ ކުއްޖަކަށް، ފިނިޝިން މެޑަލް ދޭނެ އެވެ.
މިއީ، އޯޕަންވޯޓާ ސްވިމިން މުބާރާތް ކުޑަގިރީގައި ބާއްވާ ދެ ވަނަ ފަހަރެެވެ. މާލެއާ 15 ވަރަކަށް މިނެޓު ރާސްތާއެއްގައި އޮތް ބަންގަލް ފަޅުގައި ހެދި 8.5 ހެކްޓަރުގެ ކުޑަގިރީގައި މިދިޔަ އަހަރު ބޭއްވި ދިގުފެތުމުގެ މުބާރާތުގައި 200 އަށް ވުރެ ގިނަ އެތުލީޓުން ވާދަކުރި އެވެ. ގައުމީ ދިގު ފެތުމުގެ ގައުމީ ފެތުންތެރިން ވާދަކުރި، ސީނިއާ ލެވަލްގެ ފަސް ކިލޯމީޓަރު ބައިގެ ޗެމްޕިއަންކަން ހޯދީ މުހައްމަދު ރިހާން ޝިޔާމް އާއި ހަމްނާ އަހުމަދު އެވެ. ދިގު ފެތުމުގެ މުބާރާތުގެ އެއް ކިލޯ މީޓަރުގެ ފިރިހެން ބައިގެ އެއް ވަނަ ހޯދީ އިފްޒާލް އިބްރާހިމް މަހުފޫޒު އެވެ. އިޒްޔާން ނާޒިމް ދެ ވަނަ ހޯދިިއިރު، ތިން ވަނަ ހޯދީ އަލީ އަޔާން ނިސްޔާން އެވެ. އަންހެން ބައިގެ ޗެމްޕިއަންކަން އަމްނާ ތަޒްކިޔާ މިރުޝާދު ހޯދިއިރު، ދެވަނަ ހޯދީ މަރިޔަމް އަޒްކާ ހުސައިން އެވެ. ތިން ވަނަ އައިޝަތު ތީޝާ މުހައްމަދު އެވެ.
މީގެ ކުރިން ވެސް ގައުމީ ދިގު ފެތުމުގެ މުބާރާތް ވަނީ އެހެން ސަރަހަައްދެއްގައި ބާއްވައިފަ އެވެ. އެ ގޮތުން، ސްވިމިން އެސޯސިއޭޝަނާއި މާލޭ ފިޓްނަސް ކްލަބް ގުޅިގެން 2018 ވަނަ އަހަރު ގައުމީ ދިގު ފެތުމުގެ މުބާރާތް ބާއްވާފައިވަނީ ކ. ދިއްފުށީގަ އެވެ. އެ ފަހަރުގެ މުބާރާތަށް ވެސް ވަނީ ބޮޑު ތަރުހީބެއް ލިބިގެން ގޮސްފަ އެވެ.
