ރަށުން ބަދަލުވުމަށް ރަތްމަންދޫ ރައްޔިތުން ސޮއިކޮށް ހުށައަޅާފައިވާ ޕެޓިޝަނެއް އެ ރަށު ކައުންސިލުން ސަރުކާރަށް ހުށައަޅައިފި އެވެ.
އެ ރަށުގެ 114 މީހުން ސޮއިކޮށް ކައުންސިލަށް ހުށައަޅާފައިވާ މި ޕެޓިޝަނުގައި ވަނީ އަސާސީ ހިދުމަތްތައް ރަށުން ލިބުމުގައި ދަތިތައް ހުރުމުގެ ސަބަބުން ރަށުން ބަދަލުވުމަށް އެދޭ ކަމަށެވެ. ޕެޓިޝަނުގައި ގިނައީ ރަށުގައި ދިރިނޫޅޭތާ ގިނަ ދުވަސްތަކެއް ވެފައިވާ މީހުންގެ ސޮޔެވެ.
މިކަމާ ގުޅޭގޮތުން އެ ރަށު ކައުންސިލުގެ ރައީސް އިސްމާއިލް ނާހިދު ވިދާޅުވީ ޕެޓިޝަން ސަރުކާރަށް ހުށައެޅީ ކައުންސިލުގެ ބައްދަލުވުމުގައި އެގޮތަށް ނިންމުމަށް ފަހުގައި ކަމަށެވެ.
"ޕެޓިޝަނާ ބެހޭގޮތުން ވާހަކަދެއްކުމަށް ފަހު ކައުންސިލުން ނިންމީ އެއްވެސް ބަދަލެއް ނުގެނައިސް އެ އޮތްގޮތަށް ސަރުކާރަށް ހުށައަޅަން. ޕެޓިޝަނުގައި އެ މީހުން ބުނެފައި ވަނީ މިގޮތަށް ހުށައެޅީ އަސާސީ ގިނަ ހިދުމަތްތައް ރަށުން ނުލިބޭ ކަމަށް ބުނެ" ނާހިދު ވިދާޅުވި އެވެ.
މީގެ އިތުރުން ނާހިދު ވިދަޅުވީ ކުދި އާބާދީތަކަށް ސަރުކާރުގެ ވިސްނުން ހުރި ގޮތަކީ ކޮބައިކަން ހޯދަން އެދިފައިވާނެ ކަމަށެވެ.
ރަތްމަންދޫ ރަޖިސްޓަރީގައި 240 ވަރަކަށް މީހުން ތިބިއިރު ރަށުގައި ދިރިއުޅެމުން އަންނަނީ 100 އެއްހާ މީހުންނެވެ. އަދި ރަށުގައި ދަށްކަމަށް ފާހަގަކުރެވެނީ ހަމައެކަނި ތައުލީމުކަމަށް އެރަށުން ވާހަކަދެއްކި ރައްޔިތަކު ބުންޏެވެ.
ނަމަވެސް ސިއްހީ ހިދުމަތާއި ކައިރީގައި އޮތް މަޑިފުށި ރިސޯޓުގެ ސަބަބުން ވަޒީފާގެ ފުރުސަތުތައް ރަށަށް ލިބި ފަހިވެފައިވާނެ ކަމަށް އޭނާ ފާހަގަކުރި އެވެ.
ރަތްމަންދޫގައި މީހުން ދިރިއުޅޭ ސަރަހައްދުގައި ހުރި އިންޖީނުގެ މީހުން ނޫޅޭ ސަރަހައްދަކަށް ބަދަލުކޮށް ޒަމާނީ ފެންވަރަކަށް ނިމިދިޔަ ރައީސް ސޯލިހުގެ ވެރިކަމުގައި ވަނީ ހަދައިފަ އެވެ. އަދި ފެނާއި ނަރުދަމާގެ މަސައްކަތް ވެސް އެ ރަށުގައި ގާއިމުކުރުމުގެ މަސައްކަތް ދަނީ ކުރަމުންނެވެ.
