ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މ. އަތޮޅުގެ ފަސް ރަށަކަށް ކުރައްވަމުންގެންދަވާ ދަތުރުފުޅުގެ ފުރަތަމަ މަންޒިލެއްގެ ގޮތުގައި މ. ރަތްމަންދުއަށް ވަޑައިގެންފި އެވެ.
ރައީސް ސޯލިހް ރަތްމަންދުއަށް ވަޑައިގެންނެވުމުން، އެ ރަށުން ވަނީ އެމަނިކުފާނަށް ހޫނު މަރުހަބާއެއް ދަންނަވާފަ އެވެ.
މި ދަތުރުފުޅުގައި ރައީސް ސޯލިހް ވަޑައިގެންނެވުމަށް ހަމަޖެހިފައި ވަނީ މ. ރަތްމަންދޫ, މަޑުއްވަރީ، ދިއްގަރުގެ އިތުރުން ވޭވަށް އަދި މުއްޔަށެވެ. ދެ ދުވަހުގެ މުއްދަތަށް ކުރައްވާ މި ދަތުރުފުޅުގައި މިއަދު ރަތްމަންދު އާއި، މަޑުއްވަރީގެ އިތުރުން ދިއްގަރަށް ވަޑައިގަންނަވާނެ އެވެ. އަދި މާދަމާ ވަޑައިގަންނަވަން ހަމަޖެހިފައި ވަނީ ވޭވަށާއި މުއްޔަށެވެ.
ރައީސް ސޯލިހް، މި ރަށްތަކަށް ވަޑައިގެން، ރަށުގެ ހާލަތާއި، ރަށުގައި ކުރިއަށްދާ ތަރައްގީގެ މަޝްރޫއުތަކުގެ މަސައްކަތް ހިނގަމުންދާ ގޮތް ބައްލަވަލެއްވުމުގެ އިތުރަށް އެ ރަށްތަކުގެ ރައްޔިތުންނާ ބައްދަލު ކުރައްވާގޮތަށް ވެސް ވަނީ ހަމަޖެހިފަ އެވެ.
މީގެ އިތުރުން، ދިއްގަރު ގޮނޑުދޮށް ހިމާޔަތްކުރުމުގެ މަޝްރޫއު ނިންމުމުގެ ރަސްމިއްޔާތާއި ވޭވަށު ބަނދަރާއި އިންޖީނުގެ ހުޅުވުމުގެ ރަސްމިއްޔާތުގައި ވެސް ރައީސް ބައިވެރިވެ ވަޑައިގަތުމަށް ވަނީ ހަމަޖެހިފަ އެވެ.
