ސިއްހީ ދާއިރާއަށް އަންނަ ކުރިއެރުމާއެކު އެ ދާރިއާ ރިފޯމްވާން ޖެހޭ ކަމަށް އޭޑީކޭގެ މެނޭޖިން ޑިރެކްޓަރު އަހުމަދު އަފްއާލް މިއަދު ވިދާޅުވެއްޖެ އެވެ.
އޭޑީކޭއިން އިންތިޒާމުކޮށްގެން ބާއްވާ "މޯލްޑިވްސް ބްރެއިން އެންޑް ސްޕައިން ކޮންފަރެންސް 2024" ގައި އަފްއާލް ވިދާޅުވީ އަލަށް ތައާރަފްކުރާ ޓެކްނޮލޮޖީތަކާއެކު ރާއްޖޭގެ ސިއްހީ ދާއިރާ ވެސް ދުވަހަކަށްވުރެ ދުވަހެއް ކުރިއަރަމުން އަންނަ ކަމަށެވެ.
އައްފާލް ވިދާޅުވީ އެ ކުރިއެރުންތަކާއެކު ސިއްހީ ދާއިރާ ރެސްޕޮންސިވްވާން ޖެހޭ ކަމަށާއި ސިއްހީ ދާއިރާ ރިފޯމް ކުރުން ވަރަށް މުހިންމު ކަމަށެވެ.
"ސާޖަރީތަކަށްފަހު ހަފްތާއެއް ވަންދެން ހޮސްޕިޓަލުގައި ތިބުމުގެ ބަދަލުގައި، ސާޖަރީއަށްފަހު އެއް ދުވަސް ތެރޭގައި ހޮސްޕިޓަލުން އެބަ ދޫކޮށްލާ. އެއީ އަހަރުމެން ކުރިއަރާފައިވާ މިންވަރު. މުޅި ސިސްޓަމް ރެސްޕޮންސިވް ނުވާ ނަމަ ވަކި ހިސާބަކުން ސިއްހީ ދާއިރާ ކުރިއެރުމަށް މަޑުޖެހުން އަންނާނެ،" އަފްއާލް ވިދާޅުވި އެވެ.
ބްރެއިން އެންޑް ސްޕައިން ކޮންފަރެންސް 2017 ގައި ފެށި ފަހުން ބޮޑެތި ކުރިއެރުންތަކެއް ކޮންފަރެންސްއަށް ގެނެވިފައިވާކަން ފާހަގަކުރައްވައި އަފާލް ވިދާޅުވީ ދެން އޮންނަ ކޮންފަރެންސަކަށް އާޓިފިޝަލް އިންޓެލިޖެންސް (އޭއައި) އަދި ރޮބޮޓްސްގެ ޓެކްނޮލޮޖީ ގެންނާނެ ކަމަށެވެ.
އޭގެ އިތުރުން އަފްއާލް ވިދާޅުވީ ރާއްޖޭގެ ސިއްހީ ނިޒާމަށް އިންވެސްޓުތަކެއްކޮށް، ނިޒާމު ހަރުދަނާ ކުރަން މަސައްކަތްތަކެއް ކުރަންޖެހޭ ކަމަށެވެ.
ކޮންފަރެންސްގެ ތެރެއިން އޭޑީކޭގެ ހުށަހެޅުންތައް ދައްކާލުމުގެ އިތުރުން ޕެނަލް ޑިސްކަޝަންތައް މިއަދު ކުރިއަށް ގެންދާނެ އެވެ.
މާދަމާގެ ނިޔަލަށް ކުރިއަށްދާ ބްރެއިން އެންޑް ސްޕައިން ކޮންފަރެންސްގައި އެކި ވޯކްޝޮޕްތަކާއި ޝަފިއްޔާ އިންސްޓިޓިއުޓް އޮފް ހެލްތުއާ ގުޅިގެން ލައިވްކޮށް ސާޖަރީއެއް ކުރާތަން ވަނީ ދުރަށް ދައްކާފަ އެވެ.
