މިދިޔަ ހަފުތާގައި މާލެއާއި ހުޅުމާލެ މަގުތައް ފުރާލީ "ލިބޭ" ލިޔެފައި ހުރި ޕޯސްޓަރުތަކުންނެވެ. އެ ޕޯސްޓަރުތައް ފެނިގެން ގިނަ ބަޔަކު އެކި ގޮތް ގޮތަށް ވާހަކަ ދެއްކި އެވެ. ބައެއް މީހުން ހީކުރީ އާ ފިލްމެއް ނެރެން ތައްޔާރުވާ ކަމަށެވެ. އަނެއް މީހުން ހީކުރީ ޑޮލަރު މައްސަލައާ ގުޅޭ ޕޯސްޓަރުތަކެއް ކަމަށެވެ.
ނަމަވެސް އުރީދޫއިން އެއީ އެ ކުންފުނިން ރާއްޖޭގެ އާބާދީގެ 60 ޕަސަންޓަށް 5ޖީ ގެ ހިދުމަތް ފޯރުކޮށްދޭ ވާހަކަކަން މިހާރު ވަނީ ހާމަކޮށްފަ އެވެ.
އުރީދޫގެ ޗީފް ކޮމާޝަލް އޮފިސާ (ސީސީއޯ) ހުސެއިން ނިޔާޒް "އަދަދު" އަށް ކުރިން ވިދާޅުވީ އެ ކުންފުނީގެ 5-ޖީ ނެޓްވޯކް ވަރުގަދަވެ، ކުރެވޭ ތަޖުރިބާ ރަނގަޅުވާނެ ކަމަށާއި އެކަން މިހާރު ރާއްޖޭގެ ބޮޑު ސަރަހައްދަކަށް އެނގޭނެ ކަމަށެވެ.
އުރީދޫ 5-ޖީ ފުޅާކުރި ރަށްތައް:
- އއ. ތޮއްޑޫ އަދި އއ. ރަސްދޫ.
- އދ. މާމިގިލި، އދ. މަހިބަދޫ އަދި އދ. ދަނގެތި.
- ބ. އޭދަށުފި.
- ދ. ކުޑަހުވަދޫ.
- ގއ. ވިލިނގިލި، ގދ. ތިނަދޫ.
- ހއ. ދިއްދޫ އަދި ހއ. އިހަވަންދޫ.
- ހދ. ކުޅުދުއްފުށި.
- ކ. ގުރައިދޫ، ކ. މާފުށި.
- ޅ. ހިންނަވަރު އަދި ޅ. ނައިފަރު.
- ނ. ވެލިދޫ.
- ރ. ދުވާފަރު އަދި ރ. އުނގޫފާރު.
- ސ. ހިތަދޫ
އިންޑިއާ އާއި ސްރީލަންކާ މަގުން ނުގޮސް ފުރަތަމަ ފަހަރަށް ސީދާ ރާއްޖެއިން ސިންގަޕޫރާއި ޔޫރަޕަށް ސަބްމެރިން ކޭބަލްތަކުން ޑޭޓާ ސެންޓަރުތައް ގުޅާލެވުމުން 5-ޖީ ގެ އެންމެ ރަނގަޅު ތަޖުރިބާ ކުރެވެ އެވެ.
ރާއްޖެ އާއި ސިންގަޕޫރު ސަބްމެރިން ކޭބަލުން ގުޅާލެވުނީ ކުޅުއްދުއްފުށީގައި ހުރި އުރީދޫގެ ޑޭޓާ ސެންޓަރު މެދުވެރިކޮށެވެ. އުރީދޫގެ ޑޭޓާ ސެންޓަރެއް ހުޅުމާލޭގައި ވެސް ހުރެ އެވެ.
އުރީދޫއިން ފުރަތަމަ 5-ޖީ ގެ ޓެސްޓުތައް ރާއްޖޭގައި ހަދަން ފެށީ 2019 ގައެވެ. އަދި 2020 ނިމުނުއިރު ގްރޭޓާ މާލެ ސަރަހައްދަށް އެ ކުންފުނިން 5-ޖީ ތައާރަފް ކުރި އެވެ.
އުރީދޫއިން އަންނަނީ ރާއްޖޭގެ މުއާސަލާތީ ހިދުމަތަށް އިންގިލާބީ ބަދަލުތައް ގެނެސް، މުޅިން އާ ކަންތައްތައް ތައާރަފް ކުރަމުންނެވެ.
