ރައީސް ޑރ. މުހައްމަދު މުއިއްޒުގެ ޕްރިންސިޕަލް އެޑްވައިޒާ އޮން ޓްރޭޑް އެންޑް އިންވެސްޓްމަންޓު، އަދި ވިޔަފާރިވެރިޔާ މުހައްމަދު އަލީ ޖަނާހު އަށް، ހުޅުމާލޭގެ ފޭސް އެކެއްގެ އެންމެ މުހިއްމު ސަރަހައްދުން ބޮޑު ބިމެއް ދީފި އެވެ.
މިދިޔަ އަހަރުގެ ތެރޭގައި ޖަނާހު އަށް ހުޅުމާލޭން ދިނީ، ސެންޓްރަލް ޕާކް ކުރިމަތިން އުރީދޫ ބިލްޑިންއާ ޖެހިގެން ހުޅަނގަށް އޮތް 300،000 އަކަފޫޓުގެ ބިމުން ގާތްގަނޑަކަށް 100،000 ފޫޓެވެ.
ރައީސް ޑރ. މުހައްމަދު މުއިއްޒު އާއި ޖަނާހު
މި މުއާމަލާތުގެ މައުލޫމާތު އެނގޭ މަސްދަރަކުން މިއަދު "އަދަދު" ނޫހަށް ބުނީ އެ ބިން ޖަނާހު އަށް ދީފައި ވަނީ މަތީފަންތީގެ ޝޮޕިން މޯލެއް ހެދުމަށެވެ. އެ މޯލްގެ ކޮންސެޕްޓުގައި އޮތީ އެކި ހަރަކާތްތަކަށް ބޮޑު ހުސް ޖާގައެއް ބާއްވާ ގޮތަށް ކަމަށް ވެސް އެ މީހާ ބުންޏެވެ.
"އެކަން ކުރަން ޖަނާ ރާވާފައި އޮތީ ބޭރުގެ ކުންފުންޏަކާ ގުޅިގެން. ނަމަވެސް އަދިވެސް މަޝްރޫއުގެ އިތުރު ކުރިއެރުމެއް ނެތް،" އޭނާ ބުންޏެވެ.
އެ މަޝްރޫއުއާ ގުޅޭ ގޮތުން ޖަނާހުގެ އެއްވެސް ބަހެއް ނުލިބުނެވެ.
އިއުލާނު ކުރުމެއް ނެތި ވިޔަފާރި ބޭނުންތަކަށް ހުޅުމާލޭން ގިނަ ބިންތަކެއް އެޗްޑީސީގެ މިހާރުގެ މެނޭޖުމެންޓުން ދޫކޮށްފައިވެ އެވެ. ސަރުކާރާ ގުޅުން އޮތް އެކި ފަރާތްތަކަށް އެފަދަ ބައެއް ބިންތައް ދިނީ ކުލީގެ އިތުރުން ސީއެސްއާރުގެ ގޮތުގައި ފައިސާ ދައްކާ ގޮތަށް ނުވަތަ އެހެން ކަމެއް ކުރަންޖެހޭ ގޮތަށެވެ.
ބޮޑު ބިމެއް ޖަނާހުއަށް ދިނީ ކޮން އަގެެއްގައި ކަމެއް، އަދި ޝަރުތުކުރި ކަންކަމަކީ ކޮބައިކަމެއް އެޗްޑީސީން ހާމަކޮށްފައެއް ނެތެވެ. އެކަމާ ގުޅޭ ގޮތުން އެ ކުންފުނީގެ ބަހެއް ނުލިބުނެވެ.
