އެމެރިކާގެ ރިޔާސީ އިންތިހާބުގައި ވާދަކުރައްވާ އެ ގައުމުގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް އަންހެނަކާއެކު އޮތް ގުޅުން އޮއްބާލަން ފައިސާ ދިންކަން ސާބިތުވި މައްސަލާގައި ހުކުމް ކުރުން އިންތިހާބުގެ ފަހަށް ފަސްކޮށްފި އެވެ.
ޓްރަމްޕްގެ ގާނޫނީ ވަކީލުން ހުކުމް ފަސްކޮށްދޭން މިދިޔަ މަހު ހުށަހެޅި ހުށަހެޅުން ގަބޫލުކޮށް، ނިއުޔޯކްގެ ފަނޑިޔާރަކު ހުއާން މާޗަން ވަނީ ޓްރަމްޕަށް ހުކުމް ކުރުން ނޮވެމްބަރު، 26 އަށް ފަސްކޮށްފައިވާކަން ހާމަކޮށްފަ އެވެ.
"ހުކުމް ކުރުން މަޑުޖައްސާލީ ދައުވާ ލިބޭ ފަރާތަކީ ކެންޑިޑޭޓަކަށްވާތީ، ދައުވާގެ ސަބަބުން އިންތިހާބަށް އަސަރުކޮށްފާނެތީ،" މާޗަން ވިދާޅުވި އެވެ.
ނޮވެމްބަރު، 5 ގައި އޮންނަ އިންތިހާބުގައި ރިޕަބްލިކަން ޕާޓީގެ ފަރާތުން ވާދަ ކުރައްވާ ޓްރަމްޕްގެ މައްސަލާގައި ހުކުމް ކުރަން ކުރިން ތާވަލުކުރީ ސެޕްޓެމްބަރު، 18 އަށެވެ.
ހުކުމް ފަސްކުރުމާ ގުޅިގެން ޓްރަމްޕް ވަނީ އެކަމަށް މަރުހަބާ ވިދާޅުވެ، މުޅި މައްސަލަ ވެސް އެއްކޮށް ބާތިލުކުރަން ޖެހޭ ކަމަށް ވިދާޅުވެފަ އެވެ.
ޓްރަމްޕްގެ މައްޗަށް ސާބިތުވީ ރައީސް ކަމަށް ކުރިން ފަހަރު ވާދަކުރެއްވި ދުވަސްވަރު އެފަހަރުގެ ކެމްޕޭނަށް ލިބިދާނެ ގެއްލުން ކުޑަ ކުރަން، ސްޓޯމީ ޑެނިއަލްސް ނަމަކަށް ކިޔާ އަންހެނަކަށް ފައިސާ ދިން މައްސަލައިގަ އެވެ.
ޓްރަމްޕް، ސްޓޯމީއަށް 130،000 ޑޮލަރު ދީފައިވާއިރު، އެ ފައިސާ ދިނުމަށް މަގުފަހިކުރީ ޓްރަމްޕް ވިޔަފާރީގެ ހިސާބުތައް އޮޅުވާލައްވައި އޭނާގެ ކުރީގެ ވަކީލް ކޯއެން މެދުވެރިކޮށް ކަމަށްވެސް ދައުވާގައި ބުނެފައިވެ އެވެ.
އެމެރިކާގެ ގާނޫނުގައިވާ ގޮތުން، މި ދައުވާތައް ސާބިތުވުމާއެކު ޖަލު ހުކުމެއް އިއްވިޔަސް ނޮވެމްބަރު މަހު ބާއްވާ އެ ގައުމުގެ ރިޔާސީ އިންތިހާބުގައި ޓްރަމްޕަށް ވާދަކުރެވޭނެ އެވެ. އެމެރިކާގެ ރައީސަކަށް ވުމުގެ ގާނޫނީ ޝަރުތުތަކަކީ 35 އަހަރުވެފައި ވުމާއި، އެމެރިކާގައި ވިހާފައިވާ ރައްޔިތަކަށް ވުން ނުވަނަ އެމެރިކާ ރައްޔިތަކަށްވިތާ 14 އަހަރުވުމެވެ.
