މެންޗެސްޓާ (ސެޕްޓެމްބަރު 4) - މި ސީޒަަނަށް ފަހު މެންޗެސްޓާ ސިޓީއާ އެކު، އޭނާ ހަދާފައި އޮތް ކޮންޓްރެކްޓް ހަމަވި ކަމުގައި ވިޔަސް، މި ވަގުތު އެކަމާ ގުޅިގެން ވިސްނަން ޖެހޭ އެއްވެސް ކަމެއް ނެތް ކަމަށް ސިޓީގެ ކެޕްޓަން، ކެވިން ޑި ބްރޭނާ ބުނެފި އެވެ.
ސިޓީ ދޫކޮށް ބޮޑު މުސާރަ އަކަށް ސައުދީ ޕްރޮފެޝަނަލް ލީގަށް (ޕްރޯ ލީގަށް) ބަދަލުވާން ޑި ބްރޭނާ، 33، އަށް މި ފަހަރު ފުރުސަތު ވެސް ލިބުނެވެ.
ސައުދީ ޕްރޯ ލީގުގެ ކުލަބަކުން ހުށަހެޅި ހަފްތާ އަކު، އެއް މިލިއަން ޑޮލަރުގެ މުސާރައެއް ލިބޭ ޑީލަށް ޑި ބްރޭނާ ވަނީ ނޫނެކޭ ބުނެފަ އެވެ. ޑި ބްރޭނާ އަށް ސައުދީ ޕްރޯ ލީގުގެ ވަރުގަދަ ތިން ޓީމުން ވެސް ހުށަހެޅުން ލިބުނެވެ.
ސިޓީގައި މި ވަގުތު ޑި ބްރޭނާ ހުރީ ހަފްތާ އަކު، 420،000 ޑޮލަރު ލިބޭ ގޮތަށެވެ. އެ އެއްބަސްވުން އިތުރު ދެ އަހަރަށް އާ ކުރަން އުޅޭ ވާހަކަ މީޑިއާގައި ދެކެވެ އެވެ.
ޑި ބްރޭނާ، ސިޓީއާ އެކު ހަދާފައި އޮތް އެއްބަސްވުން އާ ކުރާނެ ކަމުގެ ޔަގީންކަން އެބައޮތް ކަމަށް ސިޓީގެ ކޯޗު ޕެޕް ގާޑިއޯލާ ވެސް ވަނީ މީގެ ކުރިން ބުނެފަ އެވެ. ޑި ބްރޭނާ ވެސް މި ވަނީ އެ ފަދަ އިޝާރާތެއް ދީފަ އެވެ.
"ސީޒަން ކުރިއަށްދާ ވަރަކަށް ކޮންޓްރެކްޓްގެ ވާހަކަ ވެސް ފެށިގެންދާނެ. އަހަރެން ބޭނުންވަނީ ހިތްހަމަޖެހިގެން ފުޓްބޯޅަ ކުޅެން، އެކަން ހާސިލް އެބަކުރެވޭ. ކޮންޓްރެކްޓްގެ ކަންކަން ވެސް އަންނާނެ. އަހަރެން އެއްވެސް ކަމެއް އަވަސް އަރުވާލައިގެން ނޫޅެން،" މި ސީޒަނުގައި، ސިޓީގެ ހަތަރު މެޗުގައި ވެސް ކުޅެފައިވާ ޑި ބްރޭނާ ބުންޏެވެ.
ޖަރުމަނުގެ ކުލަބް ވުލްފްސްބާގް އިން ސިޓީ އަށް ޑި ބްރޭނާ ބަދަލުވީ 63 މިލިއަން ޑޮލަރަށެވެ. ސިޓީއާ އެކު ޑި ބްރޭނާ ގިނަ ކާމިޔާބީތަކެއް ހޯދާފައިވެ އެވެ. އިންޑިވިޖުއަލް ގިނަ ޓްރޮފީތަކެއް ވެސް ސިޓީގައި ހުރެ ހޯދި، ޑި ބްރޭނާ ސިޓީއާ އެކު ހޯދި އެންމެ ބޮޑު ކާމިޔާބީ އަކީ ޗެމްޕިއަންސް ލީގެވެ.
ކުރިން އިނގިރޭސި ޕްރިމިއާ ލީގުގެ ޗެލްސީ އަށް ވެސް ކުޅުނު ޑި ބްރޭނާ ވަނީ ސިޓީ އަށް، 2015 ވަނަ އަހަރު ބަދަލުވުމަށް ފަހު އެ ޓީމާ އެކު، ހަ ފަހަރު ޕްރިމިއާ ލީގު ކާމިޔާބުކުރި އެވެ. އަދި ދެ ފަހަރު ޕްރިމިއާ ލީގުގެ މޮޅު ކުުޅުންތެރިޔާގެ މަގާމު ހޯދި އެވެ.
